Yɩɩ le ʋ lɩ̀à tə, ba nə ta ba ba də́
60
1 Gwàgá yáá tíú gwaran. Davidə gwaran ba nuŋə də kwànʋ́, ba ma kàrɩ̀ lɩ̀à.2 Kʋ yɩn máŋá tə wa, Davidə nə ta kʋ̀ʋ̀ də Siiri tɩ̀án tə Aramə nə, də Soba nə. Ba nə pìí ba vìrí, Zʋabə ta Edomə tɩ̀án kwatara tə ʋ də́, nəkuə vara tə wa, ʋ gʋ ba lɩ̀à mʋrʋ fugə də bələ.
3 Ooo à tíú Yɩɩ, n vɩga nəba n dʋgʋ,
n pɩn nə pwɛ̀ duən yáá nə.
N lɩŋa zàn nə yuu wa.
Pìí n kwɛn nəba n tún!
4 N vuvugu tɩa tə,
n tún luloo ka yɩra.
Kwɛn ka lulwərən tə.
Cɩ́gá, ka wulə ka vuvugə.
5 N pɩn n lɩ̀à tə na càn zənzən.
N pɩn nə nyʋn divɛn tə nə viviri yɩ́á.
6 N pɩn mɩmɩnʋ lɩ̀à tə nə ba nə dəri n fən,
sə ba dəri ba jɛ́n kwatara cɩan yáá nə. Zɩgɩ sìí bwálɩ́.
7 Jon nə mʋ̀ lɩ̀à tə n nə swə,
də n jɩzən vàn tə, n ga le nəba.
8 Yɩɩ swɩ̀n ʋ wúlú bwálɩ́ tə wa, ʋ wʋ́:
«À mʋ̀ nə dí dɩ̀àn,
à wá tara Siswɛmə tɩʋ tə,
à wá man Sukotə vara tə.
9 Galadə yɩ à mʋ̀ nə tɩ,
Manase də yɩ à mʋ̀ nə tɩ,
Efərayimə yɩ à yukoli,
yá Zwida yɩ à pàrɩ̀ dafɩla.
10 Mʋabə yɩ à naswɩa canbo,
Edomə yɩ bwálɩ́, à nə túŋə́ à natɩra lá.
Filisi lʋʋ nii tə mà kʋ̀ʋ̀ cə̀rə́, kʋ kəni à nə!
11 Wàà nə wá ja nə ʋ va tɩʋ tə wa,
ba nə lwə̀ ba kɩkarɩ də biritaŋʋ?
Wàà nə wá ja nə ʋ va Edomə wa?
12 Kʋ yɩ n mʋ̀ à tíú Yɩɩ cɩcɩ.
Yá n dàń vɩga nəba n dʋgʋ,
n kʋ́ʋ̀ ba tɛ n pɩn nə kwatara púlə́ tə nə.
13 Bàá san nəba, n ta nə jarɩduən tə!
Cɩ́gá, ləzoni sáŋʋ́ yɩ tʋtʋ.
14 Yɩɩ wulə də nəba, nə wá də́ dɩ̀àn.
Ʋ mʋ̀ nə wá tɩtaga nə jarɩduən tə.