À swə sə à ya n dìə̀ tə wa máŋá mama
61
1 Gwàgá yáá tíú gwaran, ba nuŋə nə də gwaran zɩla, ba nə sán də ŋoni. Davidə gwaran.
2 Ooo à tíú Yɩɩ, cʋgʋ à bubwiə.
Cʋgʋ à yɩjʋnɩ tə zəni!
3 À jɩ̀àn gwàrɩ̀ lʋʋ yígúrə́ wa,
yá à bubwi à kə n nə.
Kwé nə n ja dɩ̀ pɩ̀ʋ̀ nədarʋ tə yuu wa,
à nə wàrɩ̀ à dɩ̀.
4 Cɩ́gá, n mʋ̀ nə yɩ à yisəgə bwálɩ́.
N yɩ ndə tɩʋ nə, ba nə lwə̀ biritaŋʋ
ba kɩkarɩ, dʋŋa yɩrɩ.
5 À swə sə à ya n dìə̀ tə wa máŋá mama wuuu.
À swə sə à səgə n vànà tə də̀ń nə. Zɩgɩ sìí bwálɩ́.
6 Cɩ́gá, n mʋ̀ à tíú Yɩɩ cʋga à nipoli tə,
n ga pa nə tori tə n nə pɩn lɩ̀à tə nə,
ba nə dəri n fən.
7 Pa mɩdarɩ pɩ̀ʋ́ tə nə,
pa ʋ bɩna súrí wuuu, tə ba zwɛ̀.
8 Pa ʋ də́ pàrɩ̀ máŋá mama wuuu,
kʋ nə ba zwɛ̀ n mʋ̀ Yɩɩ yáá con.
Pa n wʋywaŋʋ* tə də n cɩ́gá tə ywàń ʋ yuu nə.
9 Cɩ́gá, à wá dɩ gwaran máŋá mama,
à ma siən mʋ́,
à ga tʋn yìə̀n tə à nə poli nii də mʋ́,
à pa tə sú.