Fən ba nə jə Yɩɩ səpuni nə
62
1 Gwàgá yáá tíú Yedutunəa gwaran. Davidə gwaran.
2 Cɩ́gá, Yɩɩ cɩcɩ con nə à wulə sìə́ wa,
ʋ mʋ̀ nə yɩ à jonu.
3 Ʋ mʋ̀ cɩcɩ nə yɩ ndə à pɩ̀ʋ̀ kòlú nə,
ʋ yɩ à jonu.
Ʋ yɩ à dɩ̀àn dəkuu bwálɩ́,
won wàrɩ̀ nə kʋ vuvugə.
4 Kʋ wá dán kʋ mɛ nətə,
á mama nə wá pú bɛɛ nədʋ yuu nə,
sə á gʋ, ndə biritaŋʋ nə guni sə kʋ tʋ,
nə à yə̀ə́ ndə dəwoo bírə́ nə tʋa nə?
5 Cɩ́gá, ba vʋrɩ duən nə,
sə ba pa ʋ kwɩ̀n ʋ dun bwálɩ́ tə nə.
Ba swə sə ba kʋna kʋ̀nkʋ̀n.
Ba yàá swɩ̀n sə Yɩɩ tʋn zəni,
yá ba bɩcanɩ súə́ də zɩra. Zɩgɩ sìí bwálɩ́.
6 Cɩ́gá, Yɩɩ cɩcɩ yáá con nə
à jə̀rə́ tə wulə sìə́ wa,
ʋ mʋ̀ nə pɩn à jə yala.
7 Ʋ mʋ̀ cɩcɩ nə yɩ ndə à pɩ̀ʋ̀ kòlú nə,
ʋ yɩ à jonu.
Ʋ yɩ à dɩ̀àn dəkuu bwálɩ́,
won wàrɩ̀ nə kʋ vuvugə.
8 Yɩɩ nə yɩ à jonu,
ʋ mʋ̀ nə pɩn à jə dun.
Ʋ yɩ ndə pɩ̀ʋ̀ kòlú nə,
à nə də́ dɩ̀àn kʋ wa!
9 Á mʋ̀ lalʋʋ tə, á yágá á tɩ̀àn
ʋ jɩɩn wa máŋá mama wuuu.
Á bɩra wá kʋ tə nə wulə á bɩcanɩ wa.
Yɩɩ yɩ nə yisəgə bwálɩ́. Zɩgɩ sìí bwálɩ́.
10 Adamə nɩ̀án yɩ vʋʋ cɩcɩ!
Ləzoni yɩ kʋ̀nkʋ̀na.
Ba mama nə dɩ̀gà səkəri yuu wa,
ba dun wà vʋʋ yí.
11 Á dànà ká jələ ka tʋn dɩ̀àn yuu wa,
á dànà ká kə á yala wiən tə nə, ba nə ŋʋan.
Á jɩjə nə pùlì zənzən,
á dànà ká kə á waa ka nə.
12 Yɩɩ təntən ʋ swɩ̀n,
yá à nì də Yɩɩ swɩ̀n nɛɛ bələ nii nə, ʋ wʋ́:
«À mʋ̀ nə yɩ dɩ̀àn tíú!»
13 N mʋ̀ Yuu-Tiu nə yɩ wʋywaŋʋ* tíú də.
Cɩ́gá, n mʋ̀ nə yàá ŋwɩ́n lìù mama
tʋtʋnɛɛ ŋwɩ́rán, n pa wá.