Yɩɩ wʋywaŋʋ* tə kʋ́kwà mɩɩ
63
1 Davidə gwaran. Kʋ yɩn máŋá tə wa, ʋ nə wulə Zwida kasɔɔ lanworu tə wa.
2 Ooo à tíú Yɩɩ, n mʋ̀ nə yɩ à Yɩɩ,
à ga twarɩ mʋ́.
N yoo jə nə ndə nanyʋnɩ nə jə lìù nətʋ.
À yatana tə pɩ̀à mʋ́,
ndə tɩa nə kʋa ka ga pɩ̀à nɩ́á nətʋ.
3 Mə à ywàń mʋ́ n wúlú bwálɩ́ tə wa nətʋ.
À nɩ n dɩ̀àn tə, də n dun tə.
4 Cɩ́gá, n wʋywaŋʋ tə kʋ́kwà mɩɩ.
À wá nun à ma bʋ n nə.
5 Nətʋ nə à wá bʋ n nə,
à lʋʋ wúlú tə mama wa,
à ga zɩ̀n à jɩ̀àn yɩɩ nə,
à ma pa mʋ́ dun.
6 À jə̀rə́ tə wá sú də pupwən,
ndə à na dí wodiywaŋʋ,
à ga nun pupwən nuŋi,
à ma bʋ n nə.
7 Máŋá tə wa à nə tígə́,
à yàá lìí n yoo,
à yàá bʋ́n n yoo tɩtɩn tə mama.
8 Cɩ́gá, n yɩ à sáŋʋ́,
à wá mà pupwən cə̀rə́,
n vànà tə də̀ń nə.
9 À jə̀rə́ tə vwə ka tɩ̀àn n yɩra,
n jɩzən vàn tə yɩ à sáŋʋ́.
10 Yá lɩ̀à tə nə pɩ̀à ba lɩ à mɩɩ tə,
wá tɩ ba va ciru*.
11 Kʋ mɛ sə ba gʋ ba də kwatara sɩ̀ʋ́,
ba pa cirəkuri də́.
12 Yá pɩ̀ʋ́ tə wá jwɛ Yɩɩ yáá con.
Lìù tə mama ʋ nə dùə̀ də Yɩɩ yɩrɩ tə,
mɛ sə ʋ bʋ ʋ tɩ̀àn nə.
Cɩ́gá, kʋ̀nkʋ̀na níə́ wá pú.