Lìù tə Yɩɩ nə jon sʋlwana jɩɩn wa
64
1 Gwàgá yáá tíú gwaran. Davidə gwaran.
2 Ooo à tíú Yɩɩ, cʋgʋ à kori máŋá tə wa, à nə wulə càn wa.
Ywàń à mɩɩ tə yuu à dʋŋa tə yɩrɩ, ba fən nə jə nə.
3 Jon nə wʋlʋnyɩna vʋ́rá tə jɩɩn wa,
də ba tə nə kun duən nə, sə ba tʋn yolwana jɩɩn wa.
4 Ba deri ba níə́ ndə kwatara sɩ̀ʋ́ nə,
ba nii sʋ̀ràn yɩ ndə cɩan nə,
5 ba nə yàá səgə ba ma tɛ lìù tə nə yɩ təgətəgə.
Ba yàá ta wá kʋ dɩ̀ ʋ yuu, yá fən ba ba jə.
6 Ba yàá daŋa duən jɩɩn də sʋkʋkwɩnan.
Ba yàá swɩ̀n pwìí bələ yìə̀n tə yoo ba nə tʋŋa, ba wʋ́:
«Wàà nə wá na tə?»
7 Ba yàá pɩ̀à coŋi, sə ba ma tʋn yolwana,
ba ga swɩ̀n, ba wʋ́:
«Nə ken nə sírí nə zwɛ̀,
nə pubʋŋa tə zɩga zəni.
Wàà nə wàá ləzwənə bɩcan yosəgu ʋ lwarɩ?»
8 Yá Yɩɩ ta ba də cɩɩn, kʋ dɩ̀ ba yuu wa.
Naa nədʋ də cɩɩn tə jɩn ba.
9 Ba nii sʋ̀ràn tə dɩga ba,
yá lɩ̀à tə mama nə ywàŋá ba, zwɩn ba yun.
10 Fən zʋa lɩ̀à tə mama,
ba ga maŋa kʋ tə Yɩɩ nə tʋn ba bɩrɩ.
Ba nì kʋ tə də̀ń Yɩɩ nə fwa.
11 Cɩ́gá tíú wá jwɛ Ba-Yígúrə́-Jə-Tiu yáá con,
ʋ ga kwálɩ́ ʋ yuu ʋ con.
Ba tə mama, ba bɩcanɩ nə yɩ mənəmənə wá bʋ ba tɩ̀àn nə.