Yɩɩ mɛ sə ba bʋ ʋ nə
65
1 Gwàgá yáá tíú gwaran. Davidə gwaran. Nuŋə.
2 Ooo à tíú Yɩɩ tə n nə wulə Siyon tɩʋ tə wa,
lìù nə yɩ səgisəgi n yáá con,
kʋ də tətə yɩ bʋra.
Kʋ mɛ sə ba tʋn yìə̀n tə,
ba nə poli nii də mʋ́ ba pa tə sú.
3 N mʋ̀ Yɩɩ tə n nə cʋga yɩjʋnɩ,
lɩ̀à tə mama wá bà n con.
4 À yuu yolwana tə dáá tə doni nə.
Yá n mʋ̀ nə wá kwɛn nə cʋna tə n lɩ.
5 Pupwən lìù nə yɩ lìù tə n nə kúrí,
sə ʋ bà ʋ ya n dəwoo tə wa.
Nə wá sú də n dìə̀ tə wozəŋə tə,
də ka waa wiən tə nə yɩ parɩ.
6 N mʋ̀ nə tíú Yɩɩ tə, n nə yɩ nə jonu,
n tʋŋa yìə̀n tə nə ba kamando jə,
n ma le nəba, kʋ twá cɩ́gá cwəŋə nə.
Dwíə́ tə mama tɩa yuu wa,
kʋ va kʋ yí mʋʋ nii nə, jələ n yuu wa.
7 Ʋ mʋ̀ dɩ̀àn nə pɩn
pɛɛn zɩga tə dəkurən wa.
Wanʋ nə yɩ ʋ tàŋá voru.
8 Ʋ mʋ̀ nə pɩn mʋʋ zizigu zwɛ̀,
ʋ pɩn nakulə zizigu zwɛ̀,
ʋ ga pɩn dwíə́ nəkaran* tə də zizigu zwɛ̀.
9 Fən zʋa lɩ̀à tə nə wulə lʋʋ yígúrə́ wa,
ba nə nɩ kʋ tə n nə fwa tə yɩrɩ.
N pɩn pupwən sú yɩɩ yipɩan con,
də yɩɩ yizwɩa con lʋʋ níə́ tə.
10 N tanɩ tɩa tə,
n pa dwà nɩ̀ ka bwànɩ̀ ka,
n ga pa ka sú də jɩjə wiən.
Yɩɩ nacwəŋə tə súə́ də nɩ́á.
N tanɩ ləzwənə nii wodiu.
Nə̀ń nətʋ tə n nə yàá tanɩ tɩa tə:
11 N yàá gàrɩ̀ ka sangulə tə də nɩ́á,
n ga lwa ka kukulə tə.
N yàá pa dwà cú ka zuri tɩa tə,
n ga pa dɩ̀àn wobɩa nə, tə ma pɛ́n.
12 Bɩnɩ tə yígúrə́ wa,
n yàá pa wiən bʋ́rɩ́ nəba,
yá máŋá tə n nə kɛ̀ń,
jɩjə wiən yàá sú tɩa.
13 Gaʋ yàá nan kʋ piri kasɔɔ lanworu tə nə,
pɛɛn də ga wulə pupwən titəŋi wa.
14 Vàná yàá pú galɩʋ yuu nə,
kárɩ́ tə nii ga sú də mɩna.
Kʋ dàń yɩ pupwən cə̀rí, də ba baa gwaran.