Nə bwɩa Yɩɩ nə, ʋ yɩ nə jonu
66
1 Gwàgá yáá tíú gwaran. Nuŋə. Gwaran.
Á maga pupwən cə̀rí á pa Yɩɩ nə,
á mʋ̀ tɩa yuu lɩ̀à tə mama.
2 Á nuŋə á ma siən wá,
Á dɩa gwaran á ma pa wá dun.
3 Á swɩ̀án Yɩɩ con, á wʋ́:
«N tʋ̀tʋ̀nán tə ba kamandon jə.
N dɩ̀àn tə nə dáá yɩrɩ,
n dʋŋa yàá pɩ̀à sə ba gɩgarɩ mʋ́.
4 Tɩa yuu ləzoni tə mama mɛ
sə ba tʋ ba nadwana yuu n yáá con,
ba ga dɩ gwaran ba ma siən mʋ́.
Ba nuŋə ba ma səni mʋ́.» Zɩgɩ sìí bwálɩ́.
5 Á bɩ̀àn á balɩ Yɩɩ tʋ̀tʋ̀nán tə!
Ʋ ba kamandon jə,
də ʋ nə wulə ʋ tʋŋa ləzoni titəŋi wa.
6 Ʋ lwàń mʋʋ ʋ pa kʋ jì tɩkʋrʋ,
lɩ̀à twá mʋʋ tə wa də nɛɛ ba nan.
Mə kʋ mʋ̀ nə pɩn nə fwa pupwən də wá.
7 Ʋ wulə tə mɛ yuu wa máŋá mama,
ʋ yɩ́á cəə dwíə́ nəkaran* tə yuu,
sə ba tə nə vɩ ʋ nii, dàn ká fwa fwiə! Zɩgɩ sìí bwálɩ́.
8 Lʋʋ lɩ̀à-ba, á bwɩa nə tíú Yɩɩ tə nə,
á zɩan á kwərə yɩɩ nə, á ma bʋ ʋ nə!
9 Ʋ mʋ̀ nə pɩn nəba mɩɩ,
ʋ ga cɩ̀ sə nə dàn ká mà nə nɛɛ, nə tʋ.
10 Ooo nə tíú Yɩɩ, n dídə́n nəba,
n kwɛn nə durən n lɩ ndə wárʋ́ nə,
ba nə nyɩan mən wa, ba lɩ kʋ durən.
11 N pɩn nə tʋ vɩnvan wa,
yá n dàń pɩn càn yí nəba,
ndə nə zɩŋa zɩlɩ kʋ nə du.
12 N pɩn səsədɩra twá nə yuu wa ba lɛ.
Nə zʋa mən, də nɩ́á wa,
yá n pɩn nə nan nə zʋ sìə́ wa.
13 À wá zʋ n dìə̀ tə wa,
à fwa jwəŋə ba nə sʋ̀rɩ́* à pa mʋ́.
À wá tʋn kʋ tə à nə poli nii də mʋ́,
à pa kʋ nii sú.
14 À tətə nəndəli nə swɩ̀n yìə̀n təntə.
À swɩ̀n yìə̀n təntə à nii wa,
də à yà wulə jɩgwarʋ wa.
15 À wá gʋ vàná tə nə jə nʋga,
də pabɩran, à súrí wusənə tə nə,
à ma fwa jwəŋə ba nə sʋ̀rɩ́, à pa mʋ́.
À wá gʋ vanfaran də bʋtɩlan,
à ma tʋn kʋ. Zɩgɩ sìí bwálɩ́.
16 Á mʋ̀ lɩ̀à tə mama, á nə dəri Yɩɩ fən,
á bɩ̀àn sə à man kʋ tə ʋ nə tʋn ʋ pa nə,
à bɩrɩ aba.
17 À bubwi à kə ʋ nə, də à nii,
yá à bʋ̀à ʋ nə, də à nəndəli.
18 À yà nə jə pubʋnkʋkwɩʋn, à bɩcan wa,
Yuu-Tiu yà bá cʋgʋ à sʋgʋ.
19 Yá Yɩɩ dàń cʋgʋ à sʋgʋ,
ʋ jələ à yɩjʋnɩ tə ʋ yáá con.
20 À bwɩ à tíú Yɩɩ nə,
ʋ wà à yɩjʋnɩ tə vɩ ʋ dʋgʋ,
ʋ ga wà nə ʋ wʋywaŋʋ* tə voŋi.