Lʋʋ ləzoni dwíə́ tə mama mɛ, sə ba bʋ Yɩɩ nə
67
1 Gwàgá yáá tíú gwaran, ba nə nuŋə də gwaran zɩla, ba nə san də ŋoni. Gwaran. Nuŋə.
2 Yɩɩ wá dəri nə yinəgə,
ʋ ga fwa zəni nə yɩra.
Ʋ wá poli ʋ yáá nə yuu wa. Zɩgɩ sìí bwálɩ́.
3 Kʋ nətʋ wá pa, tɩa yuu ləzoni lwarɩ n fɩra tə,
yá dwíə́ nəkaran* tə mama wá yəni də n yɩ jonu!
4 Ooo à tíú Yɩɩ, lʋʋ ləzoni dwíə́ tə bwɩ n nə!
Lʋʋ ləzoni dwíə́ tə mama bwɩ n nə!
5 Lalʋʋ tə jwɛ,
ba ga dɩ pupwən gwaran.
Cɩ́gá, n bʋ̀rɩ̀ lʋʋ ləzoni tə bʋra,
kʋ twá cɩ́gá nə,
n ga kəni lalʋʋ tə cwəŋə nə, tɩa yuu wa. Zɩgɩ sìí bwálɩ́.
6 Ooo à tíú Yɩɩ, lʋʋ ləzoni dwíə́ tə bwɩ n nə!
Lʋʋ ləzoni dwíə́ tə mama bwɩ n nə!
7 Tɩa tə yàá zɩn ka lənə,
Yɩɩ tə ʋ nə yɩ nə tíú Yɩɩ fwa zəni nə yɩra.
8 Yɩɩ tə wá fwa zəni nə yɩra, ʋ súrí,
yá lʋʋ ləzoni dwíə́ tə mama wá dəri ʋ fən.