Gwaran ba ma jəri Yɩɩ tə ʋ nə dí dɩ̀àn
68
1 Gwàgá yáá tíú gwaran. Davidə gwaran. Nuŋə.
2 Yɩɩ zàn, yá ʋ dʋŋa laga duən yáá nə,
lɩ̀à tə nə culi wá dəri ba jɛ́n ʋ yáá nə.
3 N laga ba duən yáá nə,
ndə ŋwɩn nə laga duən yáá nə.
Wʋlʋnyɩna tə jɛ́n Yɩɩ yáá con,
ndə tʋ̀ràn mɔɔ nə nyɩan mən wa.
4 Yá cɩ́gá tɩ̀án tə mʋ̀ jwɛ
də ba làrɩ̀ Yɩɩ yáá con,
ba bɩrɩ ba pupwən tə nə yɩ nətʋ.
5 Á dɩa gwaran á ma siən Yɩɩ,
á nuŋə á ma bʋ ʋ yɩrɩ nə.
Á tuŋə cwəŋə á pa lìù tə nə,
ʋ nə jə̀ə́ səsən yuu, digə tə wa.
Ʋ yɩrɩ nə yɩ Ba-Yígúrə́-Jə-Tiu.
Á fwa pupwən ʋ yáá con.
6 Yɩɩ yɩ bitara nyɩna,
ʋ ga zɩga kadənə jɩrɩmʋ,
ʋ dìə̀ tə wa ka nə yɩ parɩ.
7 Yɩɩ yàá pa lɩ̀à ya ləzwəndʋa də dìə̀ wa.
Ʋ yàá lɩ bandiə lɩ̀à də ʋ dʋgʋ,
sə ba ya pupwən wa.
Yá lɩ̀à tə ba nə vɩ ʋ nii cɩcɩ
nə wá mɛn tɩkʋrʋ wa.
8 Ooo à tíú Yɩɩ,
máŋá tə n nə yɩn n lɩ̀à tə yáá, n ja ba n nan,
máŋá tə n nə vəli kasɔɔ lanworu tə wa, Zɩgɩ sìí bwálɩ́.
9 tɩa tə vɩvaga, lanworu tə ga nyɩan,
kʋ curi nɩ́á n yáá con,
n mʋ̀ Sinayi Yɩɩ tə yáá con,
n yɩ Yɩzərayɛlə lɩ̀à Yɩɩ.
10 Ooo à tíú Yɩɩ,
n mʋ̀ nə pɩn dwà nà, ka fwa zəni nə yɩra.
N pɩn n lɩ̀à tə ba yà nə gwàrɩ̀ dɩ̀àn pìí tə bwin.
11 Ooo à tíú Yɩɩ, mə bwálɩ́ kʋ tə nə n pɩn, sə n lɩ̀à tə ya kʋ wa.
N mʋ̀ nə tanɩ kʋ də n sonu tə, n pa yinənyiən nə.
12 Yuu-Tiu yàá swɩ̀n sʋgʋ,
yá kana tə ba nə yɩ sʋywáŋʋ́ tʋntʋna,
dàń yɩ kwatara púlí nəfarʋ.
13 Dʋŋa kwatara pɛ̀gá tə dəri,
ba dəri napɩrɩ dɩ̀àn!
Yá kana tə nə ga dìə̀ tə wa,
dàń tarɩ jɩjə tə ba nə dəri ba yá.
14 Máŋá tə à nə tígə́ najɩra titəŋi wa,
gunpwənə tə vànà yɩ wárʋ́ nə mwàlɩ̀ tə nə,
ka kʋran ga yɩ səmun ndə sɩ́án nə.
15 Máŋá tə wa Yɩɩ tə nə wulə tə mɛ yuu wa
nə laga pɛ̀gá tə,
nyʋ̀nʋ̀ yà vwə Saləmon Paan tə yuu wa.
16 Yɩɩ paan, Baswan paan,
Paan tə ka yun nə dáá, Baswan paan,
17 bɛ̀ɛ̀ nə pɩn, n mʋ̀ paan tə n yun nə dáá,
fwa sɩsaban də paan tə,
Yɩɩ nə kúrí sə ʋ ya ka wa?
Ba-Yígúrə́-Jə-Tiu wá pa
ka ya ʋ wúlú bwálɩ́ máŋá mama wuuu.
18 Ba-Yígúrə́-Jə-Tiu səsen kòrə̀n tə yɩ
mʋ̀rʋ̀ sapʋa sapʋa, də mʋ̀rʋ̀ mʋ̀rʋ̀.
Yuu-Tiu dàń wulə tə titəŋi wa,
Sinayi paan tə wulə bwálɩ́ tə nə yɩ parɩ wa.
19 N dɩ̀gà n yí ka yuu wa, n ja ywə́ŋə́.
Yɩɩ tə n nə yɩ Ba-Yígúrə́-Jə-Tiu,
lɩ̀à pɩn mʋ́ zìlə́ wiən,
lɩ̀à tə də tətə ba nə ba n nii sɛ̀
pɩn mʋ̀ zìlə́ wiən,
sə ba ma lwà n wúlú bwálɩ́ tə.
20 Yuu-Tiu mɛ də bʋra dɩɩn mama!
Ʋ mʋ̀ Yɩɩ tə ʋ nə yɩ nə jonu, ywàŋá nə yuu. Zɩgɩ sìí bwálɩ́.
21 Ʋ mʋ̀ Yɩɩ təntə yɩ Yɩɩ tə ʋ nə joŋə nəba.
Ba-Yígúrə́-Jə-Tiu, ʋ nə yɩ Yuu-Tiu jə coŋi,
sə ʋ ma lɩ nəba tɩan jɩɩn wa.
22 Yá Yɩɩ cɩ́gá wá lwa ʋ dʋŋa yuu.
Ʋ wá lwa lìù tə də tətə yuu,
ʋ yukʋran nə daraa,
ʋ ga yɩ lagʋrʋ.
23 Yuu-Tiu swɩ̀n, ʋ wʋ́:
«À wá pìí à ja ba, à nan Baswan à bà.
À wá pìí à ja ba, à nan mʋʋ tə də̀ń nə à bà.
24 Kʋ wá pa n nɩŋa n nɛɛ jana wa,
n kukuri də ga na tə tori n dʋŋa tə tɩga tə wa.»
25 Ooo à tíú Yɩɩ,
ba nɩ n kwatara púlí tə vəlu!
À tíú Yɩɩ, à pɩ̀ʋ́,
ba nɩ n kwatara púlí tə vəlu, n wúlú bwálɩ́ tə wa!
26 Gwàgá nə yàá wulə yáá,
ba tə nə dwí gwaran zɩla pú ba kwa,
kacɩan ga wulə ba titəŋi wa, ba mà zɩnzɩran.
27 Á bwɩa Yɩɩ nə púlə́ tə wa.
Á bwɩa Ba-Yígúrə́-Jə-Tiu nə,
á mʋ̀ lɩ̀à tə á dəkuu nə nan Yɩzərayɛlə dwíí tə wa.
28 Nə̀ń Bɛnzwamɛn, ʋ nə yɩ ba mama wa nəmaa,
ʋ wulə ba yáá.
Kʋ kwa nə, kʋ yɩ Juda pàbɩ̀á tə ba ganmʋla wa,
Zabulon pàbɩ̀á tə zàn ba danɩ lá,
Nɛfətali pàbɩ̀á tə zàn ba pú.
29 N Yɩɩ tə pɩn mʋ́ nii, sə n ya dɩ̀àn tíú.
Ooo à tíú Yɩɩ,
n dɩ̀àn tə fwa yìə̀n kapʋpʋ tə pa nəba.
30 N wulə n dìə̀ tə wa,
n ga də́ pàrɩ̀ Zwerizalɛmə yuu wa.
Pɛ̀gá wá bà ba pa mʋ́ zìlə́ wiən.
31 Baa vànɩ́ tə nii nə,
kʋ nə wulə mɩncanɩ tə wa.
Baa nabɩran najɩrɩ tə, də nabii púlí tə nii nə.
Tə mʋ̀ nə yɩ lɩ̀à tə nə twɩ ba nadwana yuu,
ba pɩn mʋ́ səbilurən.
Laga dwíə́ tə nə swə sə ba ta kʋ̀ʋ̀.
32 Ləzwənfaran nan Ezwipətə ba bɩ̀àn.
Kuswəb tɩ̀án dəri ba vələ Yɩɩ con,
ba ga te ba jɩ̀àn ʋ con.
33 Á mʋ̀ tɩa payun tə dɩa gwaran, á ma siən Yɩɩ.
Á bwɩa Yuu-Tiu nə. Zɩgɩ sìí bwálɩ́.
34 Ʋ mʋ̀ nə dɩ̀gà səsən,
ʋ ja vəli baan baan lanworu tə wa.
Nə̀ń, ʋ pɩn ba nì ʋ kori,
ʋ kori tə nə jə dɩ̀àn.
35 Á lwara də Yɩɩ nə jə dɩ̀àn.
Ʋ mʋ̀ nə də́ pàrɩ̀ Yɩzərayɛlə lɩ̀à yuu wa,
ʋ dɩ̀àn tə ga dɩ̀ tə yí bakwan tə wa.
36 Ooo à tíú Yɩɩ,
n zɩgɩ n wúlú bwálɩ́ tə wa,
n bɩrɩ də n ba kamandon jə.
N yɩ Yɩzərayɛlə lɩ̀à Yɩɩ tə,
n nə pɩn dɩ̀àn də wànʋ́ n lɩ̀à tə nə.
Yɩɩ mɛ də bʋra!