Ka lòrì Yɩɩ sáŋʋ́
69
1 Gwàgá yáá tíú gwaran, ba nə nuŋə də kwànán. Davidə gwaran.
2 Ooo à tíú Yɩɩ, jon nə!
Cɩ́gá, nɩ́á dɩ̀gà tə ja à bɩan nə.
3 À mʋrɩ tɩtɛɛ wa,
won nə tə̀lə́ sə à nɛɛ nɩŋa kʋ yuu wa.
À liri nɩ́á tə də̀ń mɩ́ámɩ́án,
navoo tə ga tì nə kʋ ja kɛ̀ń.
4 À bubwi à gwàrɩ̀, à kələru də kʋa.
À dàn à tíú Yɩɩ à yɩ́á gwàrɩ̀.
5 Lɩ̀à tə nə zɩga à nə tʋtʋ,
dáá ba doni à yukʋran tə.
Ba mʋ̀ lɩ̀à tə nə zɩga à nə,
sə ba cʋ̀gʋ̀ nə tʋtʋ jə dɩ̀àn zənzən.
Won tə à nə wà ŋwɩ̀n,
kʋ mɛ sə à ŋwɩ́n kʋ naaa?
6 N yə̀ə́ à ləyiri tə, à tíú Yɩɩ,
yá à cʋna tə ba n yáá nə səgə.
7 Pa sə cavɩra dàn ka yí lɩ̀à tə
nə jələ n yuu wa, à mʋ̀ yɩrɩ,
Yuu-Tiu, Ba-Yígúrə́-Jə-Tiu, kwatara Yɩɩ.
Pa sə lɩ̀à tə nə twarɩ mʋ́ dàn ká viviə,
à mʋ̀ yɩrɩ, Yɩzərayɛlə Yɩɩ.
8 Cɩ́gá, à pɩn ba fʋfʋlɩ nə n mʋ̀ yɩrɩ.
N mʋ̀ yɩrɩ nə à də́ cavɩra tə.
9 À jìgə̀ lìù tə à dwíí tɩ̀án nə yəri.
À jìgə̀ ndə vee nə à nubɩa yáá con.
10 Cɩ́gá, nətʋ tə à nə swə n dìə̀ tə,
kʋ yɩ ndə mən nə kwé à bɩcan wa.
Tʋran tə ba nə twɩn mʋ́ yɩ à mʋ̀ nə tə yɩ̀.
11 À kwi, à ga fwa nivori,
yá kʋ nətʋ tə pɩn lɩ̀à twɩn nə.
12 À zwɩ ganlɔɔ gànʋ̀ ndə à nə wulə lúə́ wa,
yá à dàń jìgə̀ lìù ba nə pwɛ́.
13 Ba nə jə̀ə́ kunə wa,
à mʋ̀ nə yɩ ba viə yoo.
À jìgə̀ sanyʋra tə,
ba nə nywɩn sana tə dà nii nuŋə.
14 Yá à mʋ̀ jʋnɩ mʋ́, ooo Ba-Yígúrə́-Jə-Tiu!
Ooo à tíú Yɩɩ, pa sə kʋ ya à yuywaŋʋ máŋá,
à tíú Yɩɩ, wʋywaŋʋ* nəfarʋ tíú.
Le nə, n cɩ́gá nə wá jon nə yɩrɩ.
15 Lɩ nə mɩmɩrʋ tə wa,
sə à kʋ́ʋ̀ dàn ká mʋrɩ!
Jon nə ba tə nə culi nə jɩ̀àn wa!
Lɩ nə naluŋə tə wa!
16 Dàn ká yá n pa navoo tə ja nə ka vìí!
Dàn ká yá n pa naluŋə tə də́ nə!
Dàn ká yá n pa vɩlɩ tə də kɛ́n kʋ pú à yuu nə!
17 Ba-Yígúrə́-Jə-Tiu, le nə.
Cɩ́gá, n yɩ sonu də wʋywaŋʋ tíú.
Vəvəri n yáá n kə à con,
n nə dəri yinəgə zənzən tə yɩrɩ.
18 Dàn ká viviri n kwa,
n ma sà à mʋ̀ n tʋtʋnʋ tə!
Le nə lala, à nə wulə jɩgwarʋ wa yɩrɩ.
19 Fwarɩ n yí à jə̀rə́ tə yɩra, n jon ka!
Jon nə à dʋŋa tə yɩrɩ!
20 N mʋ̀ yə̀ə́ ba nə fʋfʋlɩ nə,
də ba kəni cavɩra à nə,
ba ga viviə nə nətʋ.
À jarɩduən tə mama wulə n yáá con.
21 Ba tʋran tə pɩn à pùə́ cʋ̀gʋ̀ zənzən,
yá à dàń à jìgə̀ yayɩŋʋ.
À dànɩ̀ sə à na mɩmɩnʋ,
kʋ nə bɩrɩ də n dəri yinəgə,
yá à ba won mama na.
À twarɩ lìù sə ʋ kòrì nə,
yá à ba lìù mama na.
22 À dʋŋa ken fwanan à wodiu wa.
Nanyʋnɩ nə jə nə,
ba yàá pa nə nanyʋna à nyʋn.
23 Pa ba cànɩ̀ tə ba nə də́
jì won kʋ ja ba, ndə nyalɩ nə.
Pa ba jɩjə wiən tə ja ba, ndə gəgəlu nə.
24 Pa ba yɩ́á də̀gə̀,
ba kʋ́ʋ̀ dàn ká na lá.
Kə càn ba nə zənzən,
n pa ba kwá tɩa, máŋá mama.
25 Fwi n lɩŋa nəfarʋ tə ba yuu wa!
Pa n lɩŋa tə pupwin tə də́ ba ndə mən nə!
26 Pa dʋŋa cʋ̀gʋ̀ ba dəkuu bwálɩ́ tə,
lìù mama kʋ́ʋ̀ dàn ká ya ba gansilə tə wa!
27 Cɩ́gá, ba mʋ̀ nə kəni càn lìù tə nə,
n tətə nə dí yáá n kə càn ʋ nə.
Ba mʋ̀ nə yàá maŋa càn tə
n nə ken lɩ̀à nə, ba bɩrɩ.
28 Jələ yolwan təntə n súrí ba yolwana nə,
sə ba kʋ́ʋ̀ dàn ká na n cɩ́gá cwəŋə tə!
29 Púpùgú ba yɩrɩ n lɩ mɩɩ sagɩ tə wa.
Dàn ká pʋ́pʋ́nɩ́ ba, n kə cɩ́gá tɩ̀án wa!
30 À mʋ̀ yɩ yinənyiən, à wulə càn wa!
Ooo à tíú Yɩɩ, jon nə, n ywàń à yuu.
31 À wá nun à ma bʋ Yɩɩ nə,
à wá bʋ ʋ nə, à ga siən wá:
32 Kʋ nətʋ tə ziən
kʋ pa Ba-Yígúrə́-Jə-Tiu nə,
kʋ doni naʋ, nə à yə̀ə́ nabɩʋ,
də kʋ nyʋran də kʋ napaŋa.
33 Lɩ̀à tə nə muŋə ba tɩ̀àn
nɩ kʋ nətʋ tə, ba ga jwɛ.
Yɩɩ wá pa mɩdarɩ á mʋ̀ lɩ̀à tə nə,
á nə pɩ̀à wá!
34 Cɩ́gá, Ba-Yígúrə́-Jə-Tiu cʋga kʋ tə
yinənyɩna nə swɩ̀n.
Ʋ ba bandiə lɩ̀à tə,
ba nə yɩ ʋ mʋ̀ lɩ̀à vɩ ʋ dʋga.
35 Lanworu tə də tɩa tə wá bʋ Yɩɩ nə,
mʋran tə də tə wiən tə mama,
tə nə ye tə wa, wá bʋ ʋ nə.
36 Cɩ́gá, Yɩɩ wá jon Siyon tɩ̀án,
ʋ ga pìí ʋ lwà Zwida tɩan tə.
Ʋ lɩ̀à tə wá ya kʋ wa, ba tɩnɩ kʋ.
37 Tɩʋ tə wá ya ʋ tʋ̀tʋ̀nà tə bɩ̀á tori,
yá ba tə nə swə ʋ yɩrɩ tə, wá ya kʋ wa.