Lìù tə nə jələ ʋ jɩjə yuu wa
52
1 Gwàgá yáá tíú gwaran. Davidə bʋra.2 Kʋ yɩn máŋá tə wa, Dowɛgə ʋ nə yɩ Edomə tíú, nə vəli ʋ swɩ̀n Sayulə con, ʋ wʋ́: «Davidə vəli ʋ zʋ Ahimelɛkə dìə̀ wa.» Davidə swɩ̀n, ʋ wʋ́:
3 Bɛ̀ɛ̀ nə pɩn n mʋ̀ babɩʋ tə ma bwɩ n tɩ̀àn nə,
n nə tʋn yolwan yɩrɩ?
Yɩɩ wʋywaŋʋ* tə wulə máŋá mama wuuu.
4 N nii yɩ sʋ̀ràn tə nə cʋ̀gà lɩ̀à nə kʋ swɩ̀n,
n nəndəli yɩ ndə fɩna nə, ka nə jə nii.
N mʋ̀ tɩjanyiən!
5 N swə lwanɩ n doni zəni,
n swə kʋ̀nkʋ̀n n doni cɩ́gá. Zɩgɩ sìí bwálɩ́.
6 N jə nicaʋ,
n mʋ̀ vivirinyiən!
7 Kʋ mʋ̀ nə pɩn, Yɩɩ wá cʋ̀gʋ̀ mʋ́ mɩ́ámɩ́án.
Ʋ wá van mʋ́ ʋ lɩ n dìə̀ tə wa,
ʋ wá gùrì mʋ́ ʋ lɩ ləzoni wa, tɩa yuu wa. Zɩgɩ sìí bwálɩ́.
8 Cɩ́gá tɩ̀án wá na kʋ nətʋ tə, fən ga zʋ ba,
yá ba wá mʋn mʋ́, ba ga swɩ̀n, ba wʋ́:
9 Á nəŋə bɛɛ tə,
ʋ yà nə ba Yɩɩ jələ ndə ʋ cɩ̀rʋ́ nə,
ʋ yà nə jələ ʋ jɩjə nəfarʋ yuu wa,
ʋ ga tʋŋa wʋlʋŋʋ, ʋ ma cɩ̀ ʋ tɩ̀àn nə!»
10 Yá à mʋ̀ yɩ à wulə Yɩɩ dìə̀ tə wa,
ndə Olivə tɩ̀ʋ́ nə, kʋ nə twə̀ vʋbwalan.
À jələ Yɩɩ wʋywaŋʋ tə yuu wa,
máŋá mama wuuu.
11 À tíú Yɩɩ, à wá bʋ n nə máŋá mama,
kʋ tə yɩrɩ n nə tʋn.
À jə n yala,
n nə swə n lɩ̀à tə nə yɩ pùə́ nədʋ tɩ̀án* tə yɩrɩ.