Ləzwənə tə ʋ nə yəri Yɩɩ
53
1 Gwàgá yáá tíú gwaran, ba nuŋə də wúə́. Davidə bʋra.
2 Ləbibənu yàá swɩ̀n ʋ waa con,
ʋ wʋ́: «Yɩɩ tə̀lə́ mɩ́ámɩ́án!»
Ba ken ba tɩ̀àn yokʋkwɩnan wa,
ba tʋn yìə̀n tə nə lwara zənzən,
lìù nədʋ tà ba wa, ʋ nə tʋŋa zəni.
3 Yɩɩ jə̀ń lanworu tə wa,
ʋ guni ʋ ywàŋá ləzoni,
sə ʋ jə́n pubʋnzəŋu tíú wulə ba wa,
kʋ tíú nə pɩ̀à ʋ mʋ̀ Yɩɩ.
4 Ba mama dʋgʋ cwəŋə ba jɛ́n,
ba zʋa tʋtʋnkʋkwɩnan wa,
lìù nədʋ tà ba wa, ʋ nə tʋŋa zəni,
ladʋa tətə tə̀lə́ ba wa.
5 Lɩ̀à tə nə tʋŋa kʋ̀nkʋ̀n yìə̀n tə cɩ́gá yəri swɩan.
Ba vɩrɩ à lɩ̀à tə, ba ma kʋ̀nɩ̀ ba tɩ̀àn,
ba ga ba boŋə ba kəni à mʋ̀ Yɩɩ nə.
6 Mə kʋ mʋ̀ nə wá pa fən ja ba,
ba vɩvaga, yá fən yoo tə̀lə́.
Cɩ́gá, Yɩɩ wá laga ba kurən duən wa,
ba mʋ̀ lɩ̀à tə nə zɩga ʋ lɩ̀à tə nə.
Yɩɩ lɩ̀à tə wá kə cavɩra ba nə,
Yɩɩ nə vɩga ba ʋ dʋgʋ yɩrɩ.
7 Wàà nə wá nan Siyon* ʋ bà ʋ jon Yɩzərayɛlə lɩ̀à tə?
Máŋá tə Yɩɩ nə wá jon ʋ lalʋʋ tə wa lɩ̀à tə,
ba yà nə wulə yongaʋ, ʋ ja pìí ʋ bà,
Zwakɔbə dwíí tə wá ya pupwən wa,
yá Yɩzərayɛlə lɩ̀à wá jwɛ.