Cʋna kwɩan yɩjʋnɩ
51
1 Gwàgá yáá tíú gwaran. Davidə gwaran.2 Kʋ yɩn máŋá tə wa, Yɩɩ nii sʋ̀sʋ̀nʋ̀ Natan nə vəli Davidə con, Davidə nə pə̀ń də Batəsweba kwa nə.
3 Ooo à tíú Yɩɩ, tàá n wʋywaŋʋ* tə yɩrɩ,
n fwa pubwanʋ à yɩra.
Tàá n nə dəri ləzoni yinəgə zənzən tə yɩrɩ,
n púpùgú à cʋna tə, n lɩ.
4 Sɩ̀n à yolwan tə, n lɩ à yɩra, mɩ́ámɩ́án,
kwɛn nə, n lɩ à lwanɩ tə wa, sə à ya parɩ.
5 Cɩ́gá, à tətə yə̀ə́ cʋna tə, à nə tʋn,
yá à bʋŋa à lwanɩ tə yoo, máŋá mama wuuu.
6 À tʋn cʋna à zɩgɩ n cɩcɩ nə,
à tʋn kʋ tə nə lwara n yáá con,
kʋ mʋ̀ nə pɩn, kʋ tə mama,
n nə wá swɩ̀n n zɩgɩ à nə, yɩ cɩ́gá,
n bʋra tə wa ba tʋ́tʋ̀ná jə.
7 Cɩ́gá, à yɩ ba lɩrɩ lwanɩ wa,
à nuu jɩn à pùə́ cʋna wa.
8 Yá n mʋ̀ swə lìù tə, ʋ bɩcan nə twá cɩ́gá nə.
N dàń pa à yəni wʋbʋŋa, à bɩcan wa.
9 Ja yɩzɔpəa vʋran,
n ma pèrì à cʋna tə, n lɩ, sə à ya parɩ.
Swɛ nə, yá à wá ya parɩ, à doni gunən.
10 Pa sə à sú də pupwən də ywánɩ́,
yá à mʋ̀ lìù tə, n nə nyʋnyʋgʋ, dàń wá jwɛ.
11 Vəvəri n yáá n kə kwa,
dàn ká ywàń à cʋna tə.
Púpùgú à yolwana tə mama, n lɩ.
12 Ooo à tíú Yɩɩ, pa nə bɩcan kʋ nə yɩ parɩ,
kə pubʋŋa nədʋn à waa,
ka nə pɩn nə bɩcan sìə́.
13 Dàn ká dɩŋa nə n yáá con, n kə yiŋʋnɩ.
Dàn ká jon n Siŋu tə nə yɩ parɩ* à con.
14 Pìí n pa nə pupwən tə,
ka nə bɩrɩ də n jon nə.
San nə də pubʋnzəŋu.
15 À wá bɩrɩ n coŋi tə, cʋna lɩ̀à nə,
yá yolwafwana tə dàń wá pìí ba bà n con.
16 Ooo à tíú Yɩɩ, à jonu Yɩɩ,
jon nə jana tə yɩrɩ tə nə lwá,
yá à nəndəli wá bʋ n nə,
n nə yɩ cɩ́gá tíú tə yɩrɩ.
17 Yuu-Tiu, súrí à nii,
sə à kori bʋ n nə.
18 Cɩ́gá, à yə̀ə́ də joŋi bá poli n pùə́,
kʋ nə tà nətʋ, à yà wá fwa joŋi, à pa mʋ́.
N bá sɛ̀ n jon joŋi ba nə sʋ̀rɩ́*, ba pa mʋ́.
19 Joŋi tə nə poli Yɩɩ pùə́,
yɩ lìù tə ʋ pùə́ nə cʋ̀gʋ̀ ʋ cʋna yɩrɩ.
Ooo à tíú Yɩɩ, n ba lìù təntə vɩ n dʋga.
20 Fwa zəni Siyon tɩ̀án yɩra.
Pìí n lwà Zwerizalɛmə birinɛɛ tə!
21 Yá n dàń wá sɛ̀,
n jon jwəŋə tə nə poli n pùə́,
tə ga twá cɩ́gá cwəŋə nə,
də jwəŋə tə ba nə sʋ̀rɩ́ ba pɩn mʋ́,
də jwəŋə vàná tə, ba nə yàá sʋ̀rɩ́ tə mama,
ba pa mʋ́.
Yá ba dàń wá pa mʋ́ nabɩran,
n joŋi bwálɩ́ tə yuu wa.