Yɩɩ nan sə ʋ bʋ̀rɩ̀ ʋ bʋra tə
50
1 Azafə gwaran.
Yɩa tə mɛ Yɩɩ, Ba-Yígúrə́-Jə-Tiu swɩ̀n,
ʋ bon tɩa tə, ʋ kə duən nə,
kʋ nə zɩgɩ yɩɩ yipɩan con,
kʋ va kʋ yí yɩɩ yizwɩa con.
2 Yɩɩ twi Siyon* tɩʋ tə wa, kʋ nə jə fɩra,
ʋ poni ga pɩpɩlɩ.
3 Nə tíú Yɩɩ bɩ̀àn,
yá ʋ bá pú ʋ nii.
Mənvwə naŋa ʋ yáá con kələkələ,
kùlì nəfarʋ ga kɩkarɩ wá.
4 Ʋ bon ʋ kə lanworu tə nə baan,
də tɩa tə nə, sə ʋ bʋ̀rɩ̀ ʋ lɩ̀à tə bʋra.
5 Ʋ swɩ̀n, ʋ wʋ́:
«Á kənə à lɩ̀à tə nə yɩ pùə́ nədʋ tɩ̀án*,
duən yáá, á pa nə.
À lɩ̀à tə, ba nə fwa joŋi,
ba ma tún nimarʋ də nə!»
6 Yá lanworu tə wá bɩrɩ Yɩɩ cɩ́gá cwəŋə tə,
cɩ́gá, Yɩɩ nə bʋ̀rɩ̀ bʋra. Zɩgɩ sìí bwálɩ́.
7 À lɩ̀à-ba, á cʋga kʋ tə à nə wá swɩ̀n á con.
Yɩzərayɛlə lɩ̀à-ba, à wá swɩ̀n à zɩgɩ á nə.
À mʋ̀ Yɩɩ nə yɩ á Yɩɩ.
8 Kʋ tà á jwəŋə tə yɩrɩ nə, à caga á nii nə.
Á jwəŋə tə mʋ̀ ba nə sʋ̀rɩ́*,
wulə à yáá con, máŋá mama.
9 À bá jon nabɩa á con,
à ma bá ja bʋtɩlan á tuu wa.
10 Cɩ́gá, ganaŋa tə mama yɩ à mʋ̀ nə tɩ,
pɛɛn tə yuu vàná mʋ̀rʋ̀ də mʋ̀rʋ̀ tə mama yɩ à mʋ̀ nə tɩ.
11 À yə̀ə́ zuŋi tə mama, tə nə wulə pɛɛn tə yuu wa,
yá vàná tə mama nə wulə gaʋ wa, yɩ à mʋ̀ nə tɩ.
12 Niən yà nə jə nə, à yà bá swɩ̀n kʋ á con.
Cɩ́gá, lʋʋ də kʋ wa wiən tə mama yɩ à mʋ̀ nə tɩ.
13 Á bʋŋa də à də́ nabɩran nàŋá naaa?
Á bʋŋa də à nywɩn bʋtɩlan jana naaa?
14 Á fwa joŋi tə nə bɩrɩ də á yə̀ə́ jwɩan,
á pa à mʋ̀ Yɩɩ nə.
Á twá á nipwələ tə nə,
á nə poli də à mʋ̀ Baan Yɩɩ,
á pa tə nii sú.
15 Á boŋə á kə à nə, á jɩgwarʋ dɩɩn nə,
à wá jon aba, yá á wá pa nə dun.
16 Yá Yɩɩ swɩ̀n wʋlʋnyiən mʋ̀ con, ʋ wʋ́:
«N swɩ̀n à yìə̀n tə mʋ̀ yoo,
à nə pɩn nii tə yuu wa,
də à nimarʋ tə yoo,
17 n mʋ̀ lìù tə, n nə ba bɩra sɛ̀,
n ga vɩ à sʋ̀ràn tə, n dʋga vàn nə!
18 N nə nɩ ŋwɩ̀àn, n yàá pa n də wá kə nimarʋ,
yá n də lɩ̀à tə nə cwàrɩ̀ nə twá duən.
19 N nii yɩ n ma swɩ̀n yolwana,
yá n nəndəli yɩ n ma kʋ̀nɩ̀ kʋ̀nkʋ̀n.
20 N yàá jə̀ə́, n swɩ̀n n zɩga n don nə,
n ga kʋnɩ kʋ̀nkʋ̀n n kəni n nubiu nii nə.
21 Mə yìə̀n təntə nə n tʋn, yá à wà yoo swɩ̀n.
N bʋŋa də à yɩ ndə n nə naaa?
À wá caga n nii nə,
à ga bɩrɩ mʋ́ kʋ tə mama, n nə tʋn.
22 Á nìə̀n kʋ yoo tə də̀ń,
á mʋ̀ lɩ̀à tə, á nə swɛ̀ɛ́ Yɩɩ yoo.
Kʋ nə tà nətʋ, à wá ca aba duən wa,
yá lìù mama bá wànɩ́ ʋ jon aba.
23 Lìù tə, ʋ nə fwa joŋi
tə nə bɩrɩ də ʋ yə̀ə́ jwɩan,
ʋ pa à mʋ̀ Yɩɩ nə,
kʋ tíú pɩn nə dun.
Yá lìù tə, ʋ nə twá cɩ́gá nə,
à wá bɩrɩ kʋ tíú, də à mʋ̀ Yɩɩ yɩ jonu.