Lìù nə tɩga, won mama ba ʋ nə twá
49
1 Gwàgá yáá tíú gwaran. Kore bɩ̀á gwaran.
2 Á cʋga yoo kʋ tə, á mʋ̀ lʋʋ dwíə́ tə mama.
Á súrə́ á zɩan, á cʋgʋ, á mʋ̀ tɩa yuu ləzoni tə mama,
3 Ləzwənbii, də ləzwənfaran,
jɩjə tɩ̀án, də zʋra mama.
4 À nii wá swɩ̀n wʋbʋŋa sʋ̀ràn,
à bɩcan ga wá bʋ́n yənu pubʋŋɩ.
5 À cʋga zwansɩsarɩ zəni,
à yàá dú bànʋ́,
à ma gwìń à sɩsalwarɩ də̀ń.
6 Bɛ̀ɛ̀ nə wá pa fən ja nə,
də yobɩbɩlʋ nə yí nə,
də à dʋŋa nə kɩkarɩ nə,
sə ba tʋn lwanɩ à yɩra?
7 Ba yɩ ba jələ ba jɩjə yuu wa,
ba ga bwɩ ba tɩ̀àn nə,
ba jɩjə nə dáá yɩrɩ.
8 Yá lìù mama wàrɩ̀ ʋ don mɩɩ ʋ yə̀, ʋ joŋə,
nə à yə̀ə́ ʋ ŋwɩ́n ʋ tətə mɩɩ tə kwənə, ʋ pa Yɩɩ nə.
9 Ba mɩɩ tə kwənə dáá,
ba wàrɩ̀ kʋ ba ŋwɩ́n də mama.
10 Ləzwənə mɩɩ wàá lʋʋ wa kʋ mɛn naaa?
Ʋ mɩɩ tə bá zwɛ̀, ʋ ga zʋ libəri wa naaa?
11 Cɩ́gá, nə na də wʋbʋnyɩna tətə tɩ,
ləyirən də ləbibənən də ma tɩ,
ba ga yá ba jɩjə ba pɩn lɩ̀à duən nə.
12 Ba yàá bʋŋa də ba dìì tə wá ya lá, máŋá mama wuuu,
yá ba sànɩ́ tə wá ya lʋʋ wa, máŋá də máŋá mama wuuu,
ba mʋ̀ lɩ̀à tə, ba yɩra yà nə jìgə̀ bwálá yɩ́rá.
13 Ləzwənə tə nə jə dun,
ʋ ga ba pubʋŋa jə,
yàá yəri də ʋ wá tɩ dɩɩn don nə, ndə vànɩ́ nə.
14 Nə̀ń ləyirən tə ba nə jələ ba tətə yuu wa,
yígúrə́ nə wá ya nətʋ,
yoo tə nə dànɩ̀ lɩ̀à tə,
ba nə swə sə ba cʋgʋ ba sʋ̀ràn: Zɩgɩ sìí bwálɩ́.
15 Ba ken ba ciru* nə, ndə pee nə.
Ba jìgə̀ lɩ̀à, tɩan nə yɩ̀rɩ̀ ba.
Yá tɩa nə pʋrɩ,
lɩ̀à tə nə yɩ mənəmənə wá nɩŋa ba də nɛɛ,
ba zəni tə ga nyʋn lá.
Ciru nə yɩ ba lʋʋ.
16 Yá Yɩɩ wá van à mʋ̀ mɩɩ tə
ʋ jon tɩan jɩɩn wa.
Cɩ́gá, ʋ wá jon nə. Zɩgɩ sìí bwálɩ́.
17 Dàn ká pa kʋ gwárɩ́ mʋ́,
də lìù don nə jìgə̀ jɩjə tíú,
də ʋ dìə̀ jɩjə nə pùlì ka súrí.
18 Ʋ tɩan dɩɩn nə, ʋ bá tì won mama,
ʋ jɩjə tə bá twá ʋ nə, ka zʋ libəri wa.
19 Máŋá tə ʋ mɩɩ nə wulə lʋʋ wa,
ʋ wàá ʋ jələ də ʋ yɩ pupwən lìù,
ʋ ga bʋŋa ʋ waa con də,
lɩ̀à bwɩ ʋ nə, ʋ nə də́ ywánɩ́ yɩrɩ!
20 Yá də kʋ nətʋ mɛ,
ʋ tə wá va ʋ nɩbara-ba con ciru nə,
ba nə kʋ́ʋ̀ bá pìí ba na poni.
21 Ləzwənə tə nə jə dun,
ʋ ga ba pubʋŋa jə,
yàá yəri də ʋ wá tɩ dɩn don nə, ndə vànɩ́ nə.