Pɩ̀ʋ́ nəfarʋ tə tɩʋ
48
1 Nuŋə. Kore bɩ̀á gwaran.
2 Ba-Yígúrə́-Jə-Tiu wulə tə mɛ yuu wa,
ʋ mɛ də bʋra mama, nə tíú Yɩɩ tɩʋ tə wa,
ʋ paan tə yuu wa, ka nə yɩ parɩ*.
3 Paan təntə ziən,
ka pɩn pupwən lʋʋ mama nə.
Ka mʋ̀ nə yɩ Siyon paan tə,
ka nə wulə jɩzən saparʋ yuu,
ka ga yɩ pɩ̀ʋ́ nəfarʋ tə tɩʋ.
4 Yɩɩ wulə ʋ dɩ̀àn dəkuu bwálɩ́ tə wa,
lìù mama ga yə̀ə́ də kʋ yɩ yisəgə bwálɩ́.
5 Á nəŋə, pɛ̀gá yà vʋrɩ,
ba ga twá duən ba vəli.
6 Ba ywàń ba na, kʋ ga gwárɩ́ ba.
Fən zʋa ba, ba pìí ba dəri.
7 Ba vɩvaga kʋ bwálɩ́ tə wa,
ndə càn nə yí kan, ʋ pùə́ lɩrʋ máŋá wa,
8 ndə yɩɩ yipɩan con vʋʋa
nə cʋ̀gʋ̀ nɩ́á yuu bwərə nəfaran, tə nə vəli yiŋʋnɩ.
9 Kʋ tə nə nə nì,
nə nɩ kʋ Ba-Yígúrə́-Jə-Tiu,
ʋ nə yɩ kwatara Yɩɩ tɩʋ tə wa.
Nə tíú Yɩɩ wá pa ʋ tɩʋ tə ja dɩ̀àn máŋá mama wuuu. Zɩgɩ sìí bwálɩ́.
10 Ooo nə tíú Yɩɩ, nə bʋŋa n wʋywaŋʋ tə yoo,
n dìə̀ tə wa.
11 Nə tíú Yɩɩ, n bʋra tə vəli ka yí lʋʋ yígúrə́ bwálá,
ndə n yɩrɩ tə nə.
Máŋá mama, n tʋŋa kʋ twá cɩ́gá cwəŋə nə.
12 Lɩ̀à mɛ sə ba jwɛ Siyon paan tə yuu wa.
Zwida nagwanaa tɩan tə lɩ̀à mɛ
sə ba fwa pupwən n bʋra tə yɩrɩ, n nə bʋ̀rɩ̀.
13 Á naŋa á kɩkarɩ Siyon tɩʋ tə,
sə á gàlà kʋ dəyuu dìì tə.
14 Á bálá kʋ biritaŋʋ,
á zəŋə kʋ padii tə,
sə á wànɩ́ á man á bɩrɩ á bɩ̀á tə nə,
á nə wá lɩrɩ,
15 də Yɩɩ təntə yɩ nə tíú Yɩɩ,
máŋá mama wuuu, kʋ nə ba zwɛ̀.
Ʋ mʋ̀ nə wá yà nə yáá,
ʋ kə nəba cwəŋə wa,
kʋ va kʋ yí nə tɩan.