Á maga jɩ̀àn á pa pɩ̀ʋ́ nəfarʋ tə nə
47
1 Gwàgá yáá tíú gwaran. Kore bɩ̀á bʋra.
2 Á mʋ̀ lʋʋ dwíə́ tə mama maga jɩpwələ!
Á maga pupwən cə̀rí,
á ma pa dun Ba-Yígúrə́-Jə-Tiu nə!
3 Cɩ́gá, Ba-Yígúrə́-Jə-Tiu, Baan Yɩɩ ba kamandon jə.
Ʋ yɩ pɩ̀ʋ́ nəfarʋ, tɩa yuu mama wa.
4 Ʋ pɩn nə də́ dɩ̀àn lʋʋ dwíə́ tə yuu wa,
ʋ ga kə dwíə́ nəkaran* tə nə nɛɛ də̀ń.
5 Ʋ kúrí nə lʋʋ nii tə ʋ pa nəba.
Kʋ yɩ Zwakɔbə dun,
ʋ swə nə mʋ̀ Zwakɔbə dwíí tə. Zɩgɩ sìí bwálɩ́.
6 Yɩɩ vəli, ba ga mà jɩpwələ ba pɩn wá.
Ba-Yígúrə́-Jə-Tiu vəli,
ba ga wúrí nabwanan ba pɩn wá.
7 Á dɩa gwaran á ma siən Yɩɩ!
Á sənə!
Á dɩa gwaran á ma siən nə pɩ̀ʋ́ tə!
Á sənə!
8 Cɩ́gá, Yɩɩ yɩ pɩ̀ʋ́ tɩa yuu mama wa,
á dɩa gwaran tə nə ywán á ma siən wá.
9 Yɩɩ də́ pàrɩ̀ dwíə́ nəkaran tə yuu wa,
ʋ jə̀ə́ ʋ padaʋ tə yuu wa, kʋ nə yɩ parɩ.
10 Lʋʋ dwíə́ tə pàbɩ̀á twi ba súrí
Abərahamə Yɩɩ tə lɩ̀à tə nə.
Cɩ́gá, tɩa yuu dɩ̀àn tɩ̀án tə yɩ Yɩɩ nə tɩ.
Ʋ pàrɩ̀ tə wulə tə mɛ yuu wa.