Ba-Yígúrə́-Jə-Tiu pɩn fən kʋ́ʋ̀ ba nə jə
34
1 Davidə gwaran. Kʋ yɩn máŋá tə wa, ʋ nə ja ʋ tɩ̀àn ʋ fwa ndə nyɩnyaŋʋ nə, Abimelɛkə yáá con, kʋ pa Abimelɛkə dɩŋa wá, ʋ pa ʋ vìí.
2 À wá bʋ Ba-Yígúrə́-Jə-Tiu nə, máŋá mama.
Ʋ bʋra tə wá ya à nii wa, máŋá mama wuuu.
3 Ba-Yígúrə́-Jə-Tiu pɩn à jə̀rə́ tə swə ka tɩ̀àn!
Á mʋ̀ lɩ̀à tə á nə muŋə á tɩ̀àn, á cʋga á ga jwɛ!
4 Á bɩ̀án sə nə siən Ba-Yígúrə́-Jə-Tiu!
Nə twá duən nə bʋ ʋ yɩrɩ tə nə!
5 À twarɩ Ba-Yígúrə́-Jə-Tiu, yá ʋ le nə.
Ʋ jon nə à fən tə mama wa.
6 Lɩ̀à tə ba nə jələ ʋ yuu wa, yàá sú də pupwən,
yá ba yáá kʋ́ʋ̀ ba ŋwɩ̀ń.
7 Yinənyiən nə bubwi, Ba-Yígúrə́-Jə-Tiu yàá nì,
ʋ ga jon wá, ʋ jɩgwarʋ tə mama wa.
8 Ba-Yígúrə́-Jə-Tiu malɩka* tə kɩkarɩ lɩ̀à tə,
ba nə dəri ʋ fən, ka ma cɩ̀ ba nə,
yá ka yàá jon ba yobɩbɩlʋ wa.
9 Á də́də́ŋə́ Ba-Yígúrə́-Jə-Tiu á jə́n,
á wá na ʋ nə yɩ sonu tíú nətʋ!
Pupwən lìù nə yɩ lìù tə,
ʋ nə kwálɩ́ ʋ yuu Ba-Yígúrə́-Jə-Tiu con!
10 Á mʋ̀ lɩ̀à tə, á nə yɩ Ba-Yígúrə́-Jə-Tiu nə tɩ,
á dərə ʋ fən!
Cɩ́gá, won mama wà lɩ̀à tə ba nə dəri ʋ fən mùrì.
11 Wodiu yàá mùrì gərən, kʋ pa niən ja tə,
yá wozəŋu mama bá mùrì lɩ̀à tə mʋ̀,
ba nə pɩ̀à Ba-Yígúrə́-Jə-Tiu.
12 À bɩ̀á ba, á bɩ̀án á cʋgʋ à sʋgʋ!
À wá kàrɩ̀ aba,
ka dəri Ba-Yígúrə́-Jə-Tiu fən.
13 Wàà nə pɩ̀à sə ʋ mɩɩ ya lʋʋ wa?
Wàà nə swə sə ʋ ja mɩdarɩ,
ʋ ga nì ywánɩ́ lʋʋ wa?
14 Kʋ tíú mɛ sə ʋ cɩ̀ n nəndəli nə, də yolwan,
ʋ ga cɩ̀ ʋ nii nə, də gɩgɩra sʋ̀ràn.
15 Ʋ mɛ sə ʋ cɩ̀ ʋ tɩ̀àn nə, də yolwan fwaŋʋ,
ʋ ga tʋn kʋ tə nə ziən.
Ʋ mɛ sə ʋ pɩ̀à bɩcan sìə́, də ʋ kajaŋa mama.
16 Ba-Yígúrə́-Jə-Tiu yɩ́á cəə cɩ́gá tɩ̀án yuu wa,
ʋ zɩan ga cʋga ba bubwiə.
17 Yá Ba-Yígúrə́-Jə-Tiu zɩga lɩ̀à tə mʋ̀ nə,
ba nə tʋŋa yolwana,
sə ʋ cʋ̀gʋ̀ ba,
ʋ pa ba yoo nyʋn tɩa yuu.
18 Cɩ́gá tɩ̀án nə bubwi,
Ba-Yígúrə́-Jə-Tiu nə̀ń ba kori,
yá ʋ yàá jon ba, ba jɩgwarʋ tə mama wa.
19 Ba-Yígúrə́-Jə-Tiu wulə lɩ̀à tə səpuni nə,
ba pùə́ nə cʋ̀gʋ̀,
yá ʋ joŋə lɩ̀à tə ba jɩ̀àn nə gwarɩ.
20 Yojanan kapʋpʋ yàá yí cɩ́gá tíú,
yá Ba-Yígúrə́-Jə-Tiu yàá jon wá tə mama wa.
21 Ba-Yígúrə́-Jə-Tiu ywàŋá cɩ́gá tíú
nandaran tə mama yuu,
ʋ kuu nədʋ tətə ba kɛ́n.
22 Wʋlʋnyiən wʋlʋŋʋ tə nə wá gʋ wá,
yá càn wá yí lɩ̀à tə nə culi cɩ́gá tíú.
23 Ba-Yígúrə́-Jə-Tiu yàá jon
ʋ tʋ̀tʋ̀nà tə mɩɩ, ʋ kə lʋʋ,
yá lɩ̀à tə mama, ba nə kwálɩ́ ba yuu ʋ con,
càn bá yí ba ladʋa tətə.