Yɩɩ tə ʋ nə fwa lʋʋ, ʋ ga yɩ kʋ jonu, mɛ də bʋra
33
1 Á mʋ̀ cɩ́gá tɩ̀án ba, á maga pupwən cə̀rí,á ma pa dun Ba-Yígúrə́-Jə-Tiu nə!
Lɩ̀à tə ba nə yɩ mənəmənə nə mɛ sə ba bʋ ʋ nə.
2 Á dwiə bànʋ́ á ma siən Ba-Yígúrə́-Jə-Tiu.
Á dwiə bànʋ́ tə, ba nə san də ŋoni fugə,
á ma bʋ ʋ nə.
3 Á nuŋə nundʋn, á ma bʋ ʋ nə!
Á dwiə gwaran zɩla tə zəni,
á ma siən wá.
4 Cɩ́gá, Ba-Yígúrə́-Jə-Tiu sʋgʋ tə yɩ mənəmənə.
Yá ʋ tʋ̀tʋ̀nán tə mama nii yàá twá cɩ́gá nə,
ndə kʋ nə mɛ nətʋ.
5 Ʋ swə cɩ́gá cwəŋə, də yoo tə nə yɩ mənəmənə.
Ba-Yígúrə́-Jə-Tiu wʋywaŋʋ* tə súə́ tɩa yuu mama.
6 Ba-Yígúrə́-Jə-Tiu sʋgʋ nə fwa lanworu tə,
yá ʋ nii vʋʋ nə fwa wiən tə mama,
tə nə jə poni lanworu tə wa.
7 Ʋ ken mʋʋ nɩ́á tə mama duən yáá,
bwálɩ́ nədʋ, ndə kàŋʋ́ nə,
ʋ ga kə mʋran nəfaran tə bʋran nəfaran wa.
8 Lʋʋ mama mɛ, sə kʋ dəri Ba-Yígúrə́-Jə-Tiu fən!
Lʋʋ ləzoni tə mama mɛ, sə ba vɩvaga, ʋ yáá con!
9 Cɩ́gá, ʋ mʋ̀ nə swɩ̀n, yá kʋ jìgə̀.
Ʋ pɩn nii, yá kʋ tʋn.
10 Ba-Yígúrə́-Jə-Tiu gugurə kʋ tə
dwíə́ nəkaran* tə nə vʋrɩ, sə ba tʋn.
Ʋ cʋ̀gʋ̀ kʋ tə, lʋʋ lɩ̀à nə tanɩ, sə ba tʋn.
11 Kʋ tə Ba-Yígúrə́-Jə-Tiu nə tanɩ,
sə ʋ tʋn tə mʋ̀ wulə máŋá mama wuuu,
ʋ pubʋŋa yìə̀n tə ga tʋŋa
máŋá də máŋá mama wuuu.
12 Pupwən lʋʋ nii nə yɩ lʋʋ nii tə
Ba-Yígúrə́-Jə-Tiu nə yɩ kʋ Yɩɩ!
Pupwən lɩ̀à nə yɩ dwíí tə ʋ nə kúrí,
sə ba ya ʋ mʋ̀ nyiən!
13 Ba-Yígúrə́-Jə-Tiu wulə lanworu tə wa,
ʋ ywàŋá, yá ʋ na ləzoni tə mama.
14 Ʋ wulə ʋ sàń tə wa,
ʋ ywàŋá tɩa yuu ləzoni tə mama.
15 Ʋ mʋ̀ nə fwa ba lìù mama bɩcan,
ʋ ga mɩnɩ ba tʋtʋnɛɛ mama.
16 Kʋ tà kwatara kapʋpʋ nə joŋə pɩ̀ʋ́,
babɩa də ma tà dɩ̀àn nəfarʋ nə joŋə wá.
17 Səsən yɩ ba ma fùgə̀,
kʋ tà ka mʋ̀ nə pɩn lìù də́ dɩ̀àn.
Ka dɩ̀àn tə mama wàrɩ̀ lìù tə joŋə.
18 Nə̀ń, Ba-Yígúrə́-Jə-Tiu ywàŋá lɩ̀à tə yuu,
ba nə dəri ʋ fən.
Ʋ ywàŋá lɩ̀à tə yuu,
ba nə jələ ʋ wʋywaŋʋ tə yuu wa.
19 Ʋ yàá jon ba tɩan jɩɩn wa,
ʋ pa ba mɩɩ yanɩ lʋʋ wa, niən máŋá wa.
20 Nə mʋ̀ yɩ Ba-Yígúrə́-Jə-Tiu nə dànɩ̀,
ʋ mʋ̀ nə yɩ nə sáŋʋ́, də nə nàtànà.
21 Cɩ́gá, ʋ pɩn nə bɩcan sú də pupwən,
yá nə dàń ken nə waa ʋ yɩrɩ tə nə,
kʋ nə yɩ parɩ*.
22 Fwa n wʋywaŋʋ tə nə yɩra, Ba-Yígúrə́-Jə-Tiu,
nə nə jələ n yuu wa yɩrɩ.