Yɩɩ nə kwɛn lìù cʋna ʋ lɩ, kʋ jə pupwən
32
1 Davidə bʋra.
Pupwən lìù yɩ lìù tə,
Yɩɩ nə lɩ wá ʋ cʋna wa.
Ʋ yɩ lìù tə Yɩɩ nə kwɛn ʋ cʋna ʋ lɩ,
ʋ mʋ̀ də wá pwə́rə́ wa!
2 Pupwən lìù yɩ lìù tə,
Yɩɩ nə kʋ́ʋ̀ ba ʋ yolwan jələ,
ŋwɩran ga tə̀lə́ kʋ tíú pubʋŋa wa!
3 À yà púə́ à nii kʋ pa à dɩ̀àn mama zwɛ̀,
à ga bubwi dɩɩn mama.
4 Cɩ́gá, tɩtɩn də yɩcaʋ,
n vàn tə yà kəni nə càn wa.
À dɩ̀àn mama yà wulə tə zwɛ̀,
ndə tɩ̀ʋ́ nə wulə kʋ tɩ tɩpwən wa. Zɩgɩ sìí bwálɩ́.
5 À swɩ̀n à cʋna tə à bɩrɩ mʋ́,
à wà à yolwan tə yuu nə pwí.
À swɩ̀n à wʋ́:
«À lwɛ̀ Ba-Yígúrə́-Jə-Tiu nə, à cʋna tə yɩrɩ!»
Yá n dàń kwɛn à cʋna tə n lɩ. Zɩgɩ sìí bwálɩ́.
6 Kʋ mʋ̀ nə pɩn, lìù tə mama,
ʋ nə yɩ pùə́ nədʋ tíú, mɛ sə ʋ bʋ n nə,
dɩɩn tə nə, ʋ nə na mʋ́.
Yojanʋ nə swə kʋ mɛ nətʋ mama,
kʋ bá wànɩ́ wá kʋ cʋ̀gʋ̀.
7 N yɩ à yisəgə bwálɩ́,
n cɩ̀ à nə, jɩgwarʋ dàn ká yí nə.
N jon nə, n pa lɩ̀à mà pupwən cə̀rí,
ba ma kɩkarɩ nə. Zɩgɩ sìí bwálɩ́.
8 À wá kàrɩ̀ mʋ́,
à ga bɩrɩ mʋ́ cwəŋə tə, n nə mɛ sə n tì.
À wá kwè mʋ́, à ga ywàń n yuu zəni.
9 Dàn ká ya ndə səsən nə,
nə à yə̀ə́ ndə bɩnasəsən nə,
tə nə ba pubʋŋa jə,
yá yoo bá yí mʋ́.
Tə mʋ̀ yɩ ba yàá nàn tə də kwiən də cʋra,
ba ma kəni tə cwəŋə nə.
10 Wʋlʋnyiən wá də́ càn zənzən,
yá Ba-Yígúrə́-Jə-Tiu wʋywaŋʋ* tə kɩkarɩ lìù tə mʋ̀,
ʋ nə jələ ʋ mʋ̀ Ba-Yígúrə́-Jə-Tiu yuu wa.
11 Á mʋ̀ cɩ́gá tɩ̀án ba, á maga pupwən cə̀rí
Ba-Yígúrə́-Jə-Tiu yuu nə, á ga jwɛ!
Á mʋ̀ lɩ̀à tə, á bɩcanɩ nə yɩ mənəmənə,
á maga pupwən cə̀rí.