Ka jələ Yɩɩ yuu wa, càn máŋá wa
31
1 Gwàgá yáá tíú gwaran. Davidə gwaran.
2 Ba-Yígúrə́-Jə-Tiu, n mʋ̀ con nə à kwálɩ́ à yuu:
Dàn ká yá n pa cavɩra yí nə də mama!
Jon nə, n nə wulə cɩ́gá cwəŋə wa yɩrɩ!
3 Guni n zɩɩn, n kə à con,
n ga kə dɩ̀àn, n jon nə lala!
Ya ndə pɩ̀ʋ̀ nə, kʋ nə yɩ à dɩ̀àn dəkuu bwálɩ́,
n ma jon nə!
4 Cɩ́gá, n mʋ̀ nə yɩ à pɩ̀ʋ̀, n yɩ à dɩ̀àn dəkuu bwálɩ́.
Tàá n tətə yɩrɩ, n ya à yáá, n kə nə cwəŋə wa.
5 Lɩ nə gəgəlu tə wa, ba nə ken, sə ba ma ja nə.
Cɩ́gá, n mʋ̀ nə yɩ à cɩ̀rʋ́.
6 À ken à jə̀rə́ tə n jɩɩn wa,
yá n mʋ̀ Ba-Yígúrə́-Jə-Tiu, n nə yɩ cɩ́gá Yɩɩ, jon nə!
7 À culi lɩ̀à tə nə vwe ba tɩ̀àn woŋwanan nə.
N mʋ̀ Ba-Yígúrə́-Jə-Tiu jɩɩn wa nə, à yá à tɩ̀àn.
8 À wá jwɛ, à ga fwa pupwən n wʋywaŋʋ* tə wa.
Cɩ́gá, n na à yinəgə tə,
n ga yə̀ə́ à jə̀rə́ tə yojanʋ.
9 Yá n wà nə dʋŋʋ jɩɩn wa ken.
N pìí n zɩ̀n nə, n zɩgɩ à nɛɛ yuu, n pa à tɩ à tɩ̀àn.
10 Ba-Yígúrə́-Jə-Tiu, à lòrì sə n fwa pubwanʋ à yɩra!
Cɩ́gá, à wulə jɩgwarʋ wa.
Pucʋnɩ nəfarʋ pɩn à yáá, də à pùə́, də à yɩra cʋ̀gʋ̀.
11 À mɩɩ wulə kʋ zwɛ̀ pucʋnɩ wa,
à bɩna də ga zwɛ̀ surə wa.
À dɩ̀àn wulə tə zwɛ̀, à yolwana tə yɩrɩ,
à kurən tə ga də́ tə jì mun.
12 À jarɩduən mama twɩ̀n nə,
kʋ pa à jì ləzwənkʋkwɩʋn, à jənduən yáá con.
À jìgə̀ bɩcapuri lìù, à pa à ləyənə nə.
Ba nə nɩ nə kàrá wa, ba dəri ba səgə.
13 Ba swɛ̀ɛ́ à yoo ba bɩcanɩ wa, ndə tɩgɩ nə.
À jìgə̀ ndə woboru nə, ba nə dɩlɩ ba dʋgʋ.
14 À nì sʋkʋkwɩnan tə, lɩ̀à zənzən nə swɩ̀n, ba zɩga à nə.
Bɩcapuri kɩkarɩ nə, tɩa mama.
Ba ken nimarʋ, sə ba zɩgɩ à nə.
Ba vʋrɩ, sə ba lɩ à mɩɩ.
15 Yá n mʋ̀ jɩɩn wa nə,
à mʋ̀ yá à tɩ̀àn, Ba-Yígúrə́-Jə-Tiu!
À swɩ̀n də, n mʋ̀ nə yɩ à Yɩɩ!
16 À mɩɩ tə wulə n jɩɩn wa.
Jon nə à dʋŋa, də lɩ̀à tə nə fɩfɩn nə, jɩɩn wa!
17 Pa n yáá poli à mʋ̀ n tʋtʋnʋ tə yuu wa,
n ga jon nə də n wʋywaŋʋ tə!
18 Ba-Yígúrə́-Jə-Tiu, à nə bon à kə n nə,
dàn ká pa à də́ cavɩra.
Pa wʋlʋnyɩna tə mʋ̀ʋ́ də́ cavɩra.
Pa ba nii də̀ŋə̀, ba va ciru*!
19 Pa kʋ̀nkʋ̀na jì bìrə̀n,
ba mʋ̀ lɩ̀à tə nə yàá swɩ̀n bɩyɩrɩ sʋ̀ràn,
ba zɩga cɩ́gá tíú nə, də fwiə də yigwənə!
20 Ooo! N pubwanʋ tə dáá,
n nə tanɩ n tún lɩ̀à tə nə, ba nə dəri n fən!
Yá lʋʋ ləzoni nɩ də,
n tʋŋa kʋ lɩ̀à tə yɩra,
ba nə kwálɩ́ ba yuu, n con!
21 N səgə ba n yɩ́á yuu,
sə ba ya yiŋʋnɩ də lɩ̀à tə nə zɩga ba nə.
N ken ba yisəgə bwálɩ́ nə,
lɩ̀à tə yɩrɩ, ba nə swɩ̀n ba zɩga ba nə.
22 À bwɩ Ba-Yígúrə́-Jə-Tiu nə!
Cɩ́gá, ʋ bɩrɩ nə ʋ wʋywaŋʋ tə,
ndə à nə wulə tɩʋ wa,
kʋ nə lwə̀ kʋ kɩkarɩ də biritaŋʋ.
23 Yá à mʋ̀ jɩgwarʋ tə wa, à yà swɩ̀n, à wʋ́:
«N dɩŋɩ nə, n lɩ n yáá con!
Yá n nì à lòrì kori tə,
máŋá tə wa, à nə bubwi, à kə n nə.
24 Á swənə Ba-Yígúrə́-Jə-Tiu,
á mʋ̀ ʋ lɩ̀à tə mama, á nə yɩ pùə́ nədʋ tɩ̀án!
Ba-Yígúrə́-Jə-Tiu ywàŋá lɩ̀à tə yuu,
ba nə ken ba waa ʋ nə.
Yá ʋ kəni càn nəfarʋ lìù tə mʋ̀ nə, ʋ nə fwa fwiə.
25 Á pɩan á jɩɩn dàn, á ga ja wʋdɩʋ,
á mʋ̀ lɩ̀à tə mama, á nə ken á waa Ba-Yígúrə́-Jə-Tiu nə!