Lìù nə yɩ̀gà ʋ zàn, Yɩɩ lɛ̀ɛ̀ kənu gwaran
30
1 Davidə gwaran. Gwaran təntə nə ba nun, ba ma súrí Yɩɩ dìə̀ tə nii.
2 À bwɩ n nə, Ba-Yígúrə́-Jə-Tiu,
n nə pìí n van nə, n zɩ̀n yɩrɩ.
N wà yá, n pa à dʋŋa mʋn nə.
3 Ba-Yígúrə́-Jə-Tiu, à tíú Yɩɩ,
à bubwi à kə n nə,
yá n pɩn nə yazurə.
4 Ba-Yígúrə́-Jə-Tiu, n pɩn à jə̀rə́ tə pìí ka nan ciru*, ka bà.
N pìí n jon à mɩɩ tə, n kə lʋʋ wa,
sə à ya ŋʋ́nɩ́ də lɩ̀à tə, ba nə kəni libəri wa.
5 Á dɩa gwaran á ma siən Ba-Yígúrə́-Jə-Tiu,
á mʋ̀ ʋ lɩ̀à tə, á nə yɩ pùə́ nədʋ tɩ̀án.
Á bwɩa ʋ yɩrɩ tə nə, kʋ nə yɩ parɩ.
6 Cɩ́gá, ʋ lɩŋa ba dánɩ́ tə ma twɩ,
yá ʋ wʋywaŋʋ* tə mʋ̀ wulə, mɩɩ lʋʋ wúlú mama.
Didəni yɩ kwirə,
yá jɩjʋ jə pupwən nəfarʋ.
7 À yà jə̀ə́ də yazurə, à ga swɩ̀n à waa con, à wʋ́:
«Won mama bá wʋwalɩ nə!»
8 Ba-Yígúrə́-Jə-Tiu, n yà tʋn wʋywaŋʋ à yɩra,
n pa à dəkuu zʋ tɩa zəni, ndə paan nə.
Yá n dàń pìí, n viviri n yáá, n kə kwa, n ga yá nə,
kʋ pa à pubʋŋa gugurə.
9 Ba-Yígúrə́-Jə-Tiu, à bubwi à kə n nə,
à ga lòrì mʋ́ pwəpwə.
10 Ba nə gʋa nə, ba kə libəri wa,
kʋ nywarɩ nə yɩ bɛ̀, kʋ pa mʋ́?
À nə jìgə̀ pùrú, à kʋ́ʋ̀ wá wànɩ́, à pa mʋ́ dun naaa?
Pùrú tə wá wànɩ́ kʋ bɩrɩ də, n yɩ təgətəgə naaa?
11 Cʋgʋ à con, Ba-Yígúrə́-Jə-Tiu,
n ga fwa pubwanʋ à yɩra!
San nə, Ba-Yígúrə́-Jə-Tiu!
12 N lwàń à lúə́ pucʋnɩ tə, n pa kʋ jì pupwən.
N lɩ à pucʋnɩ gànàn tə,
n ga ja pupwən gànàn, n ma zʋ nə.
13 À dàń wá dɩ gwaran də à waa mama,
à ma siən mʋ́, à bá pú à nii.
Ba-Yígúrə́-Jə-Tiu, à tíú Yɩɩ,
à wá bʋ n nə, máŋá mama wuuu.