Ba-Yígúrə́-Jə-Tiu yɩ labwana sáŋʋ́
35
1 Davidə gwaran.
Ba-Yígúrə́-Jə-Tiu, à lòrì mʋ́
sə n zɩgɩ lɩ̀à tə nə, ba nə zɩga à nə!
Ta ba tə, ba nə tɛ nə!
2 Tì nàtànà nəmanbiə tə, də nəfarʋ tə,
n ja zàn n san nə!
3 Zɩ̀n cwiin tə, də dənveli tə,
n ma cɩ̀ ba tə yáá nə, ba nə dɩŋɩ à kwa!
Swɩ̀n à bɩcan wa də, n mʋ̀ nə yɩ à jonu!
4 Pa ba tə nə pɩ̀à ba lɩ à mɩɩ tə,
də́ cavɩra də fʋfʋlʋ!
Pa ba mʋ̀ lɩ̀à tə, ba nə ba à zəni pɩ̀à,
pìí ba kə ba kwa, ba ga viviə!
5 Pa ba ya ndə ywərən nə,
vʋʋ nə jànɩ̀, máŋá tə wa,
Ba-Yígúrə́-Jə-Tiu malɩka* tə nə wá dɩŋa ba!
6 Pa ba cwəŋə ya yikunu,
ka ga ya sɩsɩrʋ, máŋá tə wa,
Ba-Yígúrə́-Jə-Tiu malɩka tə nə wá dɩŋa ba kwa!
7 Cɩ́gá, ba ken gəgəlu gwàlʋ́ yuu con,
sə ba ma ja nə tʋtʋ.
Ba kʋa gwàlʋ́ təntə,
sə ba ma lɩ à mɩɩ tʋtʋ.
8 Pa sə ba cʋ̀gʋ̀ mɩ́ámɩ́án naa nədʋ, kʋ dɩ ba yuu.
Pa ba gəgəlu tə ba nə səgə,
pìí kʋ ja ba tətə.
Pa ba tətə pìí ba tʋ kʋ wa,
ba cʋ̀gʋ̀ ba tɩ̀àn mɩ́ámɩ́án!
9 Yá à jə̀rə́ tə wá jwɛ, Ba-Yígúrə́-Jə-Tiu yɩrɩ,
ka ga fwa pupwən, ʋ nə jon nə yɩrɩ.
10 Yá à nandaran tə mama dàń wá swɩ̀n, tə wʋ́:
«Ba-Yígúrə́-Jə-Tiu, wàà nə yɩ ndə n nə?»
N joŋə yinənyiən lìù tə jɩɩn wa, ʋ dɩ̀àn nə dwə wá.
N joŋə yinənyiən də zʋrʋ lìù tə jɩɩn wa, ʋ nə vɩrɩ ba.»
11 Kʋnkʋna nyɩ́n ba zàn,
ba bwe nə yìə̀n, à nə yəri tə yoo.
12 À zəni yɩ lwanɩ ba ma ŋwɩ́n.
À dàń nə, à yɩ à cɩcɩ.
13 Yá ba mʋ̀ nə yɩ̀, à yàá zʋ pucʋnɩ gànàn,
à twá nivori nə, à ma mun à jə̀rə́ tə,
à ga jʋnɩ Yɩɩ à pɩn ba wuuu.
14 Kʋ yàá wʋwalɩ nə,
ndə kʋ yɩ à dabɛɛ, nə à yə̀ə́ à nubiu nə yɩ̀.
Kʋ yàá kə nə pucʋnɩ wa,
ndə kʋ yɩ à nuu nə tɩga.
15 Yá à mʋ̀ nə mà à naa nə,
ba yàá kun duən nə, ba mʋŋa.
Wʋlʋnyɩna nə kun duən nə,
ba zɩga à nə, yá à yəri.
Ba swɩ̀n sʋkʋkwɩnan,
ba zɩga à nə wuuu.
16 Ba də bɩyɩrɩ də́rə́ tə nə yɩ cʋna lɩ̀à nə kɩkarɩ nə,
yá ba dàń dɩŋɩ ba yelə, ba zɩga à nə.
17 Yuu-Tiu, kʋ yɩ nətə
n ma ywàŋá kʋ nətʋ, yá n ba yoo fwa?
Jon à jə̀rə́ tə ba cʋcʋran tə jɩɩn wa!
Jon à mɩɩ tə gərən tə nafʋran wa!
18 À wá siən mʋ́, púlí nəfarʋ tə wa.
À wá bʋ n nə, lɩ̀à kapʋpʋ titəŋi wa.
19 Dàn ká yá sə lɩ̀à tə nə dʋŋa nə tʋtʋ, mʋn nə!
Dàn ká yá sə lɩ̀à tə nə culi nə tʋtʋ, gwɩ̀án nə!
20 Cɩ́gá, ba ba sìə́ yoo swɩ̀n mɩ́ámɩ́án.
Gɩgɩra yìə̀n nə ba bʋŋa sə ba tʋn lɩ̀à tə yɩra,
ba nə wulə lʋʋ nii tə wa sənbwen.
21 Ba súrí ba nii, ba zɩga à nə,
ba swɩ̀n, ba wʋ́:
«An haan! Nə yii də̀gə̀ wá!»
22 Ba-Yígúrə́-Jə-Tiu, n nɩ kʋ nətʋ tə,
dàn ká pú n nii!
Yuu-Tiu, dàn ká va yiŋʋnɩ, n yá nə!
23 Zàn dwiən nə,
zàn yɩɩ nə, n pa nə cɩ́gá!
À tíú Yɩɩ, à Yuu-Tiu, zàn n zɩgɩ à jɩrɩmʋ!
24 Ba-Yígúrə́-Jə-Tiu, à tíú Yɩɩ,
bʋ̀rɩ̀ à bʋra, kʋ twá n cɩ́gá tə nə!
Dàn ká yá n pa ba mʋn nə!
25 Dàn ká yá n pa ba swɩ̀n ba waa con, ba wʋ́:
«Aaa! nə jɩɩn zʋa wá! Nə pɩn ʋ nyʋn lá!»
26 Pa lɩ̀à tə mama, ba nə jwɛ à yobɩbɩlʋ tə yɩrɩ, də́ cavɩra də fʋfʋlʋ!
Pa ba tə nə zàn ba zɩga à nə, də́ cavɩra, ba ga viviə!
27 Yá pa lɩ̀à tə mʋ̀ nə jwɛ, à nə yɩ cɩ́gá tíú tə yɩrɩ,
mà pupwən cə̀rí, ba ga làrɩ̀!
Pa ba swɩ̀n máŋá mama, ba wʋ́:
«Nə bwɩa Ba-Yígúrə́-Jə-Tiu nə,
ʋ nə swə, sə ʋ tʋtʋnʋ tə nì nywánɩ́ yɩrɩ!»
28 Yá à dàń wá swɩ̀n n nə yɩ cɩ́gá tíú tə yoo, à bɩrɩ,
à ga bʋ n nə, dɩɩn mama.