Ba-Yígúrə́-Jə-Tiu nə pɩn mɩɩ
36
1 Gwàgá yáá tíú gwaran. Ba-Yígúrə́-Jə-Tiu tʋtʋnʋ Davidə gwaran.
2 Cʋna swɩ̀n wʋlʋnyiən con,
tə cwí tə janɩ ʋ bɩcasii nə.
Ʋ yəri won tə yɩrɩ,
ʋ nə mɛ sə ʋ dəri Yɩɩ fən.
3 Cɩ́gá, ʋ yàá gɩgarɩ ʋ tɩ̀àn,
sə ʋ ma pú ʋ yolwana tə yuu nə,
tə yoo dàn ká yɩ̀ wá.
4 Ʋ nii sʋ̀ràn yɩ ŋwɩ̀rɩ̀ də gɩgɩra cɩcɩ.
Ʋ kʋ́ʋ̀ ba wʋbʋŋa jə, sə ʋ ma tʋn zəni.
5 Ʋ nə tígə́, ʋ yɩ ŋwɩ̀rɩ̀ yoo nə ʋ bʋŋa.
Ʋ wulə cwəŋə wa, ka nə ba ziən.
Ʋ ba yolwan vɩ ʋ dʋga.
6 Ba-Yígúrə́-Jə-Tiu, n wʋywaŋʋ* tə dɩ̀gà
kʋ yí lanworu wa,
yá n nə yɩ pùə́ nədʋ tíú tə dɩ̀gà
kʋ yí bakwan tə wa.
7 N cɩ́gá tə yuu dara, ndə pɛɛn nədaran tə nə.
N bʋra tə də̀ń lu, ndə bʋʋ nəfarʋ* tə nə.
Ba-Yígúrə́-Jə-Tiu, n joŋə ləzoni də vàná mɛ.
8 À tíú Yɩɩ, n wʋywaŋʋ tə jə funə zənzən!
Ləzoni kwálɩ́ ba yuu n vànà ywárɩ́ wa.
9 N pɩn ba də́ ba swí, n dìə̀ tə wa,
n ga pɩn ba nywɩn nɩ́á nacoru tə wa,
kʋ nə súə́ də n nywánɩ́ tə.
10 Cɩ́gá, mɩɩ nabuliyii wulə n con,
n poni tə ga nə pɩn nə na poni.
11 Tʋn n wʋywaŋʋ tə,
n pa kʋ yí lɩ̀à tə nə yə̀ə́ mʋ́,
n ga tʋn n cɩ́gá tə lɩ̀à tə yɩra,
ba bɩcanɩ nə yɩ mənəmənə!
12 Dàn ká yá n pa fwìə́ lìù nɩŋa nə də ʋ nɛɛ,
nə à yə̀ə́ sə wʋlʋnyiən jɩɩn pa à dəri!
13 Mə lá nə, lɩ̀à tə nə tʋŋa kʋ̀nkʋ̀n yìə̀n twɩ.
Ba lwàń ba tʋ, yá ba kʋ́ʋ̀ wàrɩ̀ ba zaŋa.