Kwìə̀ tə nə saŋa tə pɩn ba sóní Yɩɩ
37
1 Davidə gwaran.
Dàn ká pa n lɩŋa zàn wʋlwanyɩna yuu wa,
dàn ká pa yolwafwana yimən ja mʋ́.
2 Cɩ́gá, ba wá pɩ̀nɩ̀ lala, ndə vʋran nə,
ba ga kʋ̀, ndə galɩʋ nə.
3 Yá n tɩ̀àn Ba-Yígúrə́-Jə-Tiu jɩɩn wa, n ga tʋn zəni,
yá n wá ya lʋʋ nii tə wa də yazurə.
4 Də́ ywánɩ́ Ba-Yígúrə́-Jə-Tiu con,
yá ʋ wá pa mʋ́ kʋ tə n bɩcan nə pɩ̀à.
5 Kə n yoo mama Ba-Yígúrə́-Jə-Tiu jɩɩn wa,
n ga jələ ʋ yuu wa, yá ʋ wá san mʋ́.
6 Ʋ wá pa n cɩ́gá tə pwin ka nan, ndə poni nə,
kʋ tə nə mɛ də mʋ́ ga ya ndə yɩcaʋ gùlú poni nə.
7 Pú n nii Ba-Yígúrə́-Jə-Tiu yáá con, n ga cʋgʋ ʋ nə.
Dàn ká pa n lɩŋa zàn lìù tə yuu wa, ʋ yìə̀n nə kwɛn,
nə à yə̀ə́ lìù tə yuu wa, ʋ nə tʋŋa pubʋnlwan tʋ̀tʋ̀nán.
8 Yá lɩŋa nə, dàn ká pa tə pupwin.
Dàn ká pa n lɩŋa zàn,
sə tə pa n tʋn yolwan.
9 Cɩ́gá, yolwafwana wá tɩ ba zwɛ̀ mɩ́ámɩ́án,
yá lɩ̀à tə nə jələ Ba-Yígúrə́-Jə-Tiu yuu wa,
nə wá tɩnɩ lʋʋ nii tə.
10 Kʋ wá fwa mancɩn, də wʋlʋnyiən kʋ́ʋ̀ tə̀lə́!
N wá ywàń bwálɩ́ tə wa, ʋ yà nə wulə, də lìù kʋ́ʋ̀ tə̀lə́ lá!
11 Yá lɩ̀à tə, ba nə muŋə ba tɩ̀àn, nə wá tɩnɩ lʋʋ nii tə,
ba ga wá də́ ywánɩ́, sìə́ nəfarʋ wa.
12 Wʋlwanyiən yàá tanɩ pubʋnlwana,
ʋ ja zɩga cɩ́gá tíú nə,
də ʋ dɩŋɩ ʋ yelə, ʋ ja zɩga ʋ nə.
13 Yá Yuu-Tiu mʋŋa wá,
ʋ nə na ʋ talɩkwa dɩɩn, də kʋ bɩ̀àn yɩrɩ.
14 Wʋlʋnyɩna yàá cʋ̀rɩ̀ kwatara sɩ̀ʋ́,
ba van ba twɛn ba dɩ̀,
sə ba ma ta yinənyiən də zʋrʋ,
sə ba ma gʋ lɩ̀à tə, ba cwəŋə nə yɩ mənəmənə.
15 Yá ba kwatara sɩ̀ʋ́ tə wá pìí
kʋ zwa ba tətə bɩcan wa,
ba twɛn tə ga wá kɛ́n.
16 Mancɩn tə cɩ́gá tíú nə jə,
kʋ́kwà jɩjə nəfarʋ tə,
wʋlʋnyɩna kapʋpʋ nə jə.
17 Cɩ́gá, wʋlʋnyɩna vànà wá kɛ́n,
yá Ba-Yígúrə́-Jə-Tiu saŋa cɩ́gá tɩ̀án mʋ̀ nə.
18 Ba-Yígúrə́-Jə-Tiu yə̀ə́ lɩ̀à tə nə yɩ təgətəgə dɩan nii,
yá ba tori wá ya lá, máŋá mama wuuu.
19 Ba bá də́ cavɩra, yobɩbɩlʋ dɩɩn nə,
yá niən máŋá wa, ba wá də́ ba sú.
20 Yá wʋlʋnyɩna mʋ̀ wá tɩ.
Ba-Yígúrə́-Jə-Tiu dʋŋa tə wá kʋ̀, ndə kárɩ́ gaʋ nə.
Ba wá jɛ́n, ba wá jɛ́n ndə ŋwɩn nə.
21 Wʋlʋnyiən jɩŋɩ jɩŋa, yá ʋ ba ŋwɩ́n,
yá cɩ́gá tíú mʋ̀ dəri yinəgə, ʋ ga pɩn.
22 Cɩ́gá, lɩ̀à tə Ba-Yígúrə́-Jə-Tiu nə fwa zəni ba yɩra,
wá tɩnɩ lʋʋ nii tə,
yá lɩ̀à tə mʋ̀, ʋ nə zɩrɩ ʋ kə ba nə,
wá tɩ ba zwɛ̀ mɩ́ámɩ́án.
23 Lìù tʋtʋnɛɛ nə ywán də Ba-Yígúrə́-Jə-Tiu,
ʋ yàá pa kʋ tíú nɛɛ jə dɩ̀àn.
24 Yá ʋ nə mà ʋ naa, ʋ ba twɩ.
Cɩ́gá, Ba-Yígúrə́-Jə-Tiu jə ʋ jɩɩn nə.
25 À yɩn ləzwəndʋn, yá à dàń kwɩn.
Yá à tə wà cɩ́gá tíú nɩ, də ba vɩga ba dʋgʋ,
nə à yə̀ə́ ʋ bɩ̀á, də ba lòrì ba nii wodiu.
26 Máŋá mama, cɩ́gá tíú yàá dəri yinəgə,
ʋ ga pɩn jɩŋa.
Yá Yɩɩ yàá fwa zəni ʋ bɩ̀á yɩra.
27 Cɩ̀ n tɩ̀àn nə də yolwan fwaŋʋ,
n ga tʋn kʋ tə nə ziən,
yá n wá ya lá wuuu.
28 Cɩ́gá, Ba-Yígúrə́-Jə-Tiu swə yoo tə nə yɩ mənəmənə,
ʋ ga ba ʋ lɩ̀à tə nə yɩ pùə́ nədʋ tɩ̀án vɩ ʋ dʋga.
Ʋ ywàŋá ba yuu máŋá mama,
yá wʋlʋnyɩna mʋ̀ dwíí wá tɩ kʋ zwɛ̀ mɩ́ámɩ́án.
29 Cɩ́gá tɩ̀án nə wá tɩnɩ lʋʋ nii tə,
ba ga wá ya kʋ wa, máŋá mama wuuu.
30 Cɩ́gá tíú nii swɩ̀n wʋbʋŋa sʋ̀ràn,
ʋ nəndəli ga bòrì yoo tə nə yɩ mənəmənə.
31 Ʋ Yɩɩ tə nii yìə̀n* tə wulə ʋ bɩcan wa,
ʋ nɛɛ ba vɩvaga.
32 Wʋlʋnyiən yàá bʋlɩ cɩ́gá tíú nə,
ʋ pɩ̀à wá sə ʋ gʋ.
33 Yá Ba-Yígúrə́-Jə-Tiu ba wá vɩ
ʋ dʋga, wʋlʋnyiən jɩɩn wa.
Ʋ ba yá ʋ pɩn bʋra janɩ wá,
də ba nə bʋ̀rɩ̀ ʋ bʋra.
34 Jələ Ba-Yígúrə́-Jə-Tiu yuu wa, n ga tì ʋ cwəŋə tə,
yá ʋ wá zɩ̀n mʋ́ yɩɩ nə, ʋ pa n tɩnɩ lʋʋ nii tə.
Yá n wá na də wʋlʋnyɩna tə tɩga ba zwɛ̀ mɩ́ámɩ́án.
35 À nɩ wʋlʋnyiən də ʋ jìgə̀ dɩ̀àn nəfarʋ tíú,
ʋ ga súrí ndə tɩ̀ʋ́ nə, kʋ nə twè vʋran.
36 Yá ʋ nyʋan lá, ʋ kʋ́ʋ̀ tə̀lə́.
À twarɩ wá, yá à wà wá nɩ.
37 Zəən lìù tə, ʋ nə yɩ təgətəgə,
n ga ywàń ʋ tə nə yɩ mənəmənə.
Kwa nəzəŋu wulə, kʋ pa sìə́ lìù nə.
38 Yá Yɩɩ wá cʋ̀gʋ̀ lɩ̀à tə mʋ̀ mama, ba nə vɩ nii.
Wʋlʋnyɩna mʋ̀ kwa zwɛ̀ mɩ́ámɩ́án.
39 Ba-Yígúrə́-Jə-Tiu yɩ cɩ́gá tɩ̀án jonu.
Ʋ yɩ ba dɩ̀àn dəkuu bwálɩ́, jɩgwarʋ máŋá wa.
40 Ba-Yígúrə́-Jə-Tiu saŋa ba, ʋ ga joŋə ba.
Ʋ lɩ ba wʋlʋnyɩna jɩɩn wa, ʋ ga joŋə ba,
ba nə kwálɩ́ ba yuu ʋ con yɩrɩ.