Yayɩŋʋ tə nə tʋn cʋna yɩjʋnɩ
38
1 Davidə gwaran, sə Yɩɩ ma lìí ʋ yoo.
2 Ba-Yígúrə́-Jə-Tiu, dàn ká kə nə càn wa,
də lɩŋa tə nə pupwin.
Dàn ká fɩrɩ nə, n kə cwəŋə wa,
də lɩŋa tə nə fʋrɩ.
3 Cɩ́gá, n cɩan tə jɩn nə,
yá n jɩɩn tə mà nə.
4 Bwálɩ́ tə̀lə́ à yatanaŋʋ tə wa, kʋ nə ba yɩ̀,
n lɩŋa tə nə pupwin yɩrɩ,
yá sìə́ tə̀lə́ à kurən tə wa, à cʋna tə yɩrɩ.
5 Cɩ́gá, à yolwana tə púlí zàn kʋ kɛ̀ń à yuu,
tə dun ga jə nə, ndə zɩlɩ nəfarʋ nə.
6 À nʋran tə pʋa, tə lwán sùrì,
à ləyiri yìə̀n tə yɩrɩ.
7 À pùə́ cʋ̀gʋ̀ zənzən,
à vànà ga gwàrɩ̀ mɩ́ámɩ́án.
À wulə pucʋnɩ wa dɩɩn mama.
8 Cɩ́gá, à tàŋá wiri bábá,
yá bwálɩ́ tə̀lə́ à yatanaŋʋ tə wa, kʋ nə ba yɩ̀.
9 À kʋ́ʋ̀ ba dɩ̀àn jə, à ŋʋnan mama karɩ.
À nɩ́, à bɩcan nə gugurə yɩrɩ.
10 Yuu-Tiu, n yə̀ə́ kʋ tə mama, à nə pɩ̀à,
yá à nɩ́ʋ́n tə wà n yuu dɩ̀.
11 À bɩcan mà gùlú, à dɩ̀àn zwɛ̀ tə yá nə,
yá à yɩ́á də tətə də̀ŋì tə yá nə.
12 À dabara də à twaduən nyáŋá nə, à nʋran tə yɩrɩ,
yá à dìə̀ lɩ̀à də tətə ba à yɩra yí.
13 Lɩ̀à tə ba nə pɩ̀à à tɩan, và vɩnvan.
Ba tə nə pɩ̀à sə yobɩbɩlʋ yí nə,
swɩ̀n ba zɩga à nə,
yá dɩɩn mama, ba kʋ̀nɩ̀ kʋ̀nkʋ̀n,
ba kəni à nii nə.
14 Yá à mʋ̀ fwa ndə zɩbʋŋʋ nə,
à ba ba con taŋa.
À yɩ ndə bəru nə,
à ba à nii súrí.
15 À yɩ ndə bɛɛ nə, à zɩan nə ba nə̀ń,
à nii də ga wàrɩ̀ yoo kʋ le.
16 N mʋ̀ Ba-Yígúrə́-Jə-Tiu yuu wa nə, à jələ.
N mʋ̀ Yuu-Tiu, à tíú Yɩɩ nə wá le, n pa nə!
17 Cɩ́gá, à swɩ̀n, à wʋ́: «Dàn ká yá, n pa ba mʋn nə,
ba mʋ̀ lɩ̀à tə, ba nə yàá fwa fwiə, də à nə mà à naa!»
18 Cɩ́gá, à tʋrɩ máŋá yí,
yá à càn tə ba zwɛ̀.
19 Cɩ́gá, à swɩ̀n à yolwan tə à bɩrɩ,
yá à wulə twara wa, à cʋna tə yɩrɩ.
20 Yá à dʋŋa tə mʋ̀ ga jə mɩɩ də dɩ̀àn.
Ba tə nə culi nə tʋtʋ dáá zənzən.
21 Yá ba tə nə ja lwanɩ ba ŋwɩ́n à zəni,
zàn ba zɩga à nə, à nə pɩ̀à zəni yɩrɩ.
22 Ba-Yígúrə́-Jə-Tiu, dàn ká vɩ nə, n dʋgʋ!
À tíú Yɩɩ, dàn ká va yiŋʋnɩ, n yá nə!
23 Yuu-Tiu, à jonu,
bà lala, n san nə!