Ləzwənə mɩɩ yɩ kukuə
39
1 Gwàgá yáá tíú Yedutunəa gwaran. Davidə gwaran.
2 À yà swɩ̀n à wʋ́: «À wá ja à tɩ̀àn,
à dàn ká tʋn cʋna à nii sʋgʋ wa.
À wá ja à nii,
də wʋlʋnyiən nə wulə à yáá con.»
3 À yɩn ndə bəru nə, à zɩgɩ sííí,
à pɩ́án, à wà yoo swɩ̀n,
yá à càn tə dàń doni jɩɩn.
4 À bɩcan yà wiri bábá, à waa.
À nə nɩ́, kʋ yɩ ndə mən nə dí nə,
yá sʋgʋ dàń twi à nii wa.
5 À swɩ̀n, à wʋ́:
«Ba-Yígúrə́-Jə-Tiu, à lòrì sə n pa
à lwarɩ máŋá tə, à mɩɩ nə wá zwɛ̀.
Pa sə à yəni à dɩan nii, tə nə ga,
yá à dàń wá lwarɩ də à tà kaka.
6 N pɩn à dɩan tə, à nə wá fwa lʋʋ wa,
dánɩ́ yɩ ndə jɩtalɩ nə,
yá à mɩɩ danɩ lʋʋ wa dàń yɩ ndə tʋtʋ nə, n yáá con».
Kʋ yɩ cɩ́gá, ləzwənə nə swə ʋ jə dɩ̀àn də, ʋ tə yɩ vʋʋ! Zɩgɩ sìí bwálɩ́.
7 Kʋ yɩ cɩ́gá, ləzwənə yɩ ʋ vəli də ʋ twi, ndə ywárɩ́ nə.
Kʋ yɩ cɩ́gá, ʋ kajaŋa tə mama yɩ vʋʋ!
Ʋ pɩ̀à jɩjə wiən ʋ túŋə́, yá ʋ yəri lìù tə nə wá tɩnɩ tə.
8 Sɩ́ʋ́n nə, Yuu-Tiu, bɛ̀ɛ̀ yala nə, à wàá à janɩ?
N mʋ̀ yuu wa nə, à jələ.
9 Jon nə à cʋna tə mama wa!
Dàn ká yá sə ləbibənu fʋfʋlɩ nə!
10 Sɩ́ʋ́n nə, à dàń jìgə̀ bə̀rù, à kʋ́ʋ̀ ba à nii súrí.
Cɩ́gá, n mʋ́ nə tʋŋa kʋ nətʋ.
11 À lòrì mʋ́, kʋ́ʋ̀ dàn ká mà nə!
À jɛ n jɩgulə tə də̀ń nə.
12 N yàá kə càn ləzwənə nə, ʋ yolwan yɩrɩ,
n ga fɩrɩ wá, n kə cwəŋə wa.
N yàá cʋ̀gʋ̀ kʋ tə, ʋ nə swə zənzən, ndə sabadaʋ nə dí kʋ.
Kʋ yɩ cɩ́gá, ləzwənə mama yɩ vʋʋ.Zɩgɩ sìí bwálɩ́.
13 Ba-Yígúrə́-Jə-Tiu, à lòrì mʋ́ sə n cʋgʋ à yɩjʋnɩ tə,
n ga guni n zɩɩn, n cʋgʋ à bubwiə tə!
Dàn ká fwa ndə n ba à kwirə tə nə̀ń!
Cɩ́gá, à yɩ vee n con,
à wulə máŋá mancɩn wa, ndə à nɩbara-ba mama nə.
14 Kʋ́ʋ̀ dàn ká ywàń nə, yá à wá wànɩ́ à mʋn,
də à mɩɩ tə wà zwɛ̀, sə à va ciru*!