Ba-Yígúrə́-Jə-Tiu tʋn zəni ʋ tʋtʋnʋ tə yɩra
40
1 Gwàgá yáá tíú gwaran. Davidə gwaran.
2 À ken à yala Ba-Yígúrə́-Jə-Tiu nə,
yá ʋ guni ʋ kə à con, ʋ cʋgʋ à bubwiə.
3 Ʋ van nə, ʋ lɩ tɩan bʋʋ wa.
Ʋ van nə, ʋ lɩ bulu mʋrʋ wa,
ʋ zɩgɩ à nɛɛ yuu, pɩ̀ʋ̀ yuu wa,
ʋ ga pa à nɛɛ jə dɩ̀àn.
4 Ʋ ken nuŋə nədʋn à nii wa,
ka nə bwɩ nə tíú Yɩɩ nə.
Lɩ̀à zənzən wá na kʋ nətʋ tə, yá fən wá zʋ ba,
kʋ pa ba jələ Ba-Yígúrə́-Jə-Tiu yuu wa.
5 Pupwən lìù nə yɩ lìù tə,
ʋ nə jələ Ba-Yígúrə́-Jə-Tiu yuu wa,
yá ʋ yáá tə̀lə́ də fwìə́ lɩ̀à,
nə à yə̀ə́ lɩ̀à tə nə swə kʋ̀nkʋ̀n!
6 Ba-Yígúrə́-Jə-Tiu, à tíú Yɩɩ,
n yomɩlan tə, də n pubʋŋa yìə̀n tə,
n nə tʋn, n pa nəba, yɩ kapʋpʋ.
N ba kamandon jə.
À tə wá bwɛ́ à swɩ̀n tə,
à ga bòrì tə, à bɩrɩ.
Yá tə dáá zənzən,
kʋ pa tə mama wàrɩ̀ tə gàlɩ̀.
7 Joŋi, nə à yə̀ə́ zìlə́ won fɩra ba mʋ́ jə.
N súrí à zɩan, n pa à nì kʋ də̀ń.
N wà joŋi tə ba nə sʋ̀rɩ́,
nə à yə̀ə́ cʋna kwɩan joŋi bwiə bwe.
8 À dàń swɩ̀n, à wʋ́: «Nə̀ń à nə à bɩ̀àn,
də sagɩ tə, à yoo nə pʋ́pʋ́nɩ́ kʋ wa.
9 À tíú Yɩɩ, à swə sə à tʋn n fɩra!
Yá n nii* yìə̀n tə wulə, à bɩcan də̀ń nə.»
10 À swɩ̀n n sʋywáŋʋ́ tə,
à bɩrɩ púlí nəfarʋ tə titəŋi wa,
də Ba-Yígúrə́-Jə-Tiu pɩn
lɩ̀à jì cɩ́gá tɩ̀án, ʋ yáa con.
À bá pú à nii də mama,
Ba-Yígúrə́-Jə-Tiu, n yə̀ə́ kʋ nətʋ tə!
11 À ba n cɩ́gá cwəŋə tə səgə, à bɩcan wa.
À swɩ̀n də n yɩ təgətəgə, n ga yɩ jonu.
À wà n wʋywaŋʋ* tə, də n cɩ́gá tə səgə,
púlí nəfarʋ tə yáá nə.
12 N mʋ̀ Ba-Yígúrə́-Jə-Tiu bá vwəŋə nə n pubwanʋ tə.
N wʋywaŋʋ tə, də n cɩ́gá tə wá pú à yuu nə, máŋá mama.
13 Cɩ́gá, yobɩbɩlan kɩkarɩ nə, à nə wàrɩ̀ tə à gàlɩ̀ à zwɛ̀.
À yolwana tə púə́ à yuu nə,
à kʋ́ʋ̀ wàrɩ̀ tə à ywàŋá.
Tə dáá tə doni à yukʋran tə, à yuu wa,
yá à jɩ̀àn gwàrɩ̀ mɩ́ámɩ́án.
14 À lòrì sə n sɛ̀, n jon nə, Ba-Yígúrə́-Jə-Tiu!
Ba-Yígúrə́-Jə-Tiu, bà lala, n san nə!
15 Pa ba tə mama, ba nə pɩ̀à ba lɩ à mɩɩ tə,
twá duən ba də́ cavɩra də fʋfʋlʋ!
Pa ba mʋ̀ lɩ̀à tə, ba nə ba à zəni pɩ̀à,
pìí ba kə ba kwa, ba ga viviə!
16 Pa ba tə nə mʋŋa nə «ha ha» tə,
də́ cavɩra, kʋ dɩ ba yuu!
17 Pa ba tə mʋ̀ mama, ba nə pɩ̀à mʋ́,
làrɩ̀ də pupwən, n yɩrɩ!
Pa ba tə nə swə n mʋ̀ jonu tə,
swɩ̀n máŋá mama, ba wʋ́:
«Ba-Yígúrə́-Jə-Tiu yɩ dun tíú!»
18 À mʋ̀ yɩ yinənyiən, à ga yɩ zʋrʋ,
yá Yuu-Tiu bʋŋa à yoo.
N yɩ à sáŋʋ́, n ga yɩ à jonu.
À tíú Yɩɩ, dàn ká dán!