Lìù tə ba nə fɩfɩn yɩjʋnɩ
41
1 Gwàgá yáá tíú gwaran. Davidə gwaran.
2 Pupwən lìù nə yɩ lìù tə, ʋ nə bʋŋa labwana yoo!
Yobɩbɩlʋ dɩɩn nə, Ba-Yígúrə́-Jə-Tiu yàá jon wá.
3 Ba-Yígúrə́-Jə-Tiu cɩ̀ ʋ nə, ʋ pɩn wá mɩdarɩ,
də pupwən tɩa yuu wa.
Ʋ ba wá yá,
ʋ pɩn ʋ dʋŋa tʋŋa ba fɩra, ʋ yɩra.
4 Ba-Yígúrə́-Jə-Tiu saŋa wá, ʋ càn gədo yuu,
ʋ ywarɩ wá, də ʋ yɩra nə ba zurə.
5 À mʋ̀ swɩ̀n, à wʋ́:
«Ba-Yígúrə́-Jə-Tiu, tʋn pubwanʋ à yɩra!
Pa yazurə à jə̀rə́ tə nə.
Cɩ́gá, à tʋn cʋna à zɩgɩ n nə.»
6 À dʋŋa swɩ̀n wʋlʋŋʋ sʋ̀ràn, ba wʋ́:
«Dɩɩn doo nə, ʋ wá tɩ mʋ̀?
Dɩɩn doo nə, ʋ yɩrɩ wá jɛ́n?»
7 Ba wa lìù nə twi sə ʋ na nə,
ʋ yàá swɩ̀n tɩjaŋa sʋ̀ràn,
ʋ bɩcan ga sú də wʋlʋŋʋ.
Yá ʋ dàń nə nan kàrá,
ʋ yàá pìí ʋ cəgi nə.
8 Lɩ̀à tə mama ba nə culi nə,
yàá sʋsʋnɩ duən con, ba zɩga à nə.
Ba zɩga à nə, ba ga swɩ̀n à yobɩbɩlʋ tə yoo.
9 Ba yàá swɩ̀n, ba wʋ́:
«Kʋ yɩ yayɩlwan nə jə wá.
Ʋ nə tígə́ nətən, ʋ kʋ́ʋ̀ bá zàn!»
10 À dabɛɛ basɩa tə də tətə,
à yà nə jələ ʋ yuu wa,
ʋ yà nə twá ʋ də́ à wodiu,
dàń viviri ʋ zɩga à nə.
11 Yá n mʋ̀ Ba-Yígúrə́-Jə-Tiu, à lòrì
sə n tʋn pubwanʋ à yɩra,
n ga pìí n zɩ̀n nə!
Yá à dàń wá fwi à lɩŋa ba yuu wa.
12 Nə̀ń nətʋ tə, à nə wá twá à ma lwarɩ,
də n swə à yáá yoo:
Kʋ yɩ sə à dʋŋʋ dàn ká də́ dɩ̀àn, à yuu wa.
13 Yá n san à mʋ̀ nə, à nə yɩ təgətəgə tə yɩrɩ,
n ga pa à wulə n yáá con, máŋá mama wuuu.
14 À bwɩ Ba-Yígúrə́-Jə-Tiu nə,
ʋ nə yɩ Yɩzərayɛlə lɩ̀à Yɩɩ,
máŋá də máŋá ka nə ba zwɛ̀.
Amɩɩna! Amɩɩna!