BƏLƏ NII SAGƖ
(Gwaran 42—72)
Ndə naŋa nə sìrì nətʋ...
42
1 Gwàgá yáá tíú gwaran. Kore bɩ̀á bʋra.
2 Ndə naŋa nə yàá sìrì,
ka ma pɩ̀à nɩ́á nətʋ,
mə nətʋ nə, à jə̀rə́ tə sìrì,
ka ma pɩ̀à mʋ́, à tíú Yɩɩ!
3 À jə̀rə́ tə pɩ̀à n mʋ̀ Yɩɩ tə nə yɩ mɩɩ,
ndə nanyʋnɩ nə jə nə.
Dɩɩn kwà nə, à wá va à zɩgɩ Yɩɩ yáá con?
4 À yinɩa nə yɩ à wodiu yɩcaʋ də tɩtɩn.
Yá máŋá mama lɩ̀à yàá bwe nə, ba wʋ́:
«N Yɩɩ tə wulə yə̀n?»
5 À dàń yàá lìí yìə̀n tə tə də à bɩcan mama:
À yà twá lalʋʋ tə nə à vələ Yɩɩ dìə̀ tə con.
Lalʋʋ təntə yà mà pupwən cə̀rí,
sə ba ma bɩrɩ də ba yə̀ə́ jwɩan.
Lalʋʋ təntə yà wulə ba də́ cànà.
6 À jə̀rə́, bɛ̀ɛ̀ nə pɩn n pùə́ ma cʋ̀gʋ̀,
n ga kwi n pɩn nə?
À tə wá kwɛn à jələ Yɩɩ yuu wa.
Cɩ́gá, à tə wá bʋ ʋ nə.
Ʋ yɩ à jonu, ʋ ga yɩ à tíú Yɩɩ.
7 À tíú Yɩɩ, à jə̀rə́ tə pùə́ cʋ̀gʋ̀ à yuu wa.
Kʋ mʋ̀ nə pɩn, à lìí n yoo,
Zʋrədɛn mʋnaa tə lʋʋ nii tə wa,
də Hɛrəmɔn pɛɛn tə yuu wa,
də Miseyarə paan tə yuu wa.
8 N pɩn nacorən curi, tə kɩkarɩ nə.
N nakulə tə mama,
də n navwe tə mama twá à yuu wa.
9 Tɩa nə pʋrɩ,
Ba-Yígúrə́-Jə-Tiu yàá fwa wʋywaŋʋ* à yɩra.
Yá tɩtɩn nə, à yàá nun à ma bwɩ ʋ nə,
à ga jʋnɩ Yɩɩ tə ʋ nə yɩ à mɩɩ.
10 À swɩ̀n Yɩɩ con, ʋ nə yɩ à pɩ̀ʋ̀, à wʋ́:
«Kʋ yɩ nətə n ma swɛ̀ɛ́ à yoo?
Kʋ yɩ nətə à ma wulə pucʋnɩ wa?
Kʋ yɩ nətə n ma yá n pa
à dʋŋʋ kəni nə càn wa?»
11 À yɩra yàá wùrì, máŋá tə wa,
à dʋŋa tə nə twɩn nə.
Ba yàá swɩ̀n máŋá mama,
ba wʋ́: «N Yɩɩ tə wulə yə̀n?»
12 À jə̀rə́, bɛ̀ɛ̀ nə pɩn n pùə́ ma cʋ̀gʋ̀,
n ga kwi n pɩn nə?
À tə wá kwɛn à jələ Yɩɩ yuu wa.
Cɩ́gá, à tə wá bʋ ʋ nə.
Ʋ yɩ à jonu, ʋ ga yɩ à tíú Yɩɩ.