Ipromesas toTEKO para on israelitas
30
In yejua tlajtojli yejuan toTEKO okijlij Jeremías. Ijkin okijlij: 2 "NemoTEKO, iDios Israel, kijtoua: Xkijkuilo ipan sen amamoxtli nochi on tlinon yotimitsijlij, 3 pampa ajsis tonajli ijkuak nejua nikinkauilis nokoneuan de Judá niman Israel nokuepajskej hasta on tlajli yejuan onikinmakak intauan. Nejua nemoTEKO ijki nikijtoua."4 In yejua tlajtojli yejuan toTEKO okijtoj, itechkopa on tlinon ipan nochiuas Israel niman Judá. 5 ToTEKO ijkin kijtoua: "¡Kakisti ken mojkatsajtsiua, kakisti ika nochi tlakatl nomojtiaj niman mokamikij! 6 Xtetlajtoltikan, tla ueli nochiua para sen tlakatl kinemitia sen konetsintli. ¿Tline tej, nikinta on tlakamej hasta nokoltotsouaj pampa sanoyej nokokouaj ken tla ye kitlakatiliskiaj inkonetsin? ¿Tline nochimej yejuamej hasta yoistalejkej? 7 ¡Ye uajlau nisiu on temojmojtij tonajli, sen tonajli yejuan xkaman ijki oonyak! Ipan on tonaltin sanoyej tlajyouiskej on iuejkakoneuan Jacob, pero maski yejuamej sanoyej tlajyouiskej, nejua nikinmakixtis
8 'Nejua, nemoTEKO yejuan nochi ueli nikchiua, nikijtoua: 'Nikinmakixtis nokoneuan de on yejuan sanoyej kintekitiltiaj, niman xok kaman yeskej esclavos ipan okse país. 9 Niman nejua nechtekipanoskej, niinTEKO niman niiminDios, niman sen iuejkakoneu David nejua niktlalis para tlamandaros ken rey.'
On tonajli ijkuak toTEKO kinmakixtis ikoneuan
10 'Nejua, nemoTEKO, nikijtoua: 'Maka xmomojtikan, yejuan nenteuejkakoneuan itech notekitkau Jacob; maka xmomojtikan, yejuan nenisraelitas, pampa nemejuamej iuan nenmokoneuan nemechmakixtis ipan on uejka país kampa omechuikakej ken esclavos. Ijkuakon xok tikpiyas nouisokilistli, yej moyolika tinemis, xitlaj tikmakajsis.'
11 'Nejua nemoTEKO nikijtoua: 'Nejua mouan ninemi para timitsmakixtis. Nejua nikimpopolos nochimej on naciones kampa onemechseseman. Pero tejua xtimitspopolos; yej san timitscastigaros ken kimelaua tikselis. Nejua nimitscastigaros ipampa motlajtlakoluan.'
12 'ToTEKO kijtoua: 'Kampa timikokoua xuelis pajtis; on mokokolis xitlaj uelis kipajtis. 13 Xakaj nemi akin mopan tlachas; xnemi akinon kipajtis kampa timokokoua, niman tejua xok uelis tipajtis. 14 Yomitselkajkej on países yejuan mitspaleuiyayaj; yejuamej xok mitsajmatstokej. Nejua onimitstlajyouiltij ken sen motlauelikniu. Nejua sanoyej yotimitstlajyouiltij pampa sanoyej miyek xompayejyeualistli otikchiu, pampa sanoyej miyek motlajtlakoluan tikpiya. 15 ¿Tline tej, tejua tiajmankatsajtsi ika timokokoua? Kampa timokokoua xuelis pajtis. Pampa sanoyej miyek moxompayejyeualis pampa sanoyej miyek tlajtlakojli yotikchiu, nejua ijki yotimitschiuilij. 16 Pero nejua nikintlajyouiltis on yejuan mitstlajyouiltiskej, niman nochimej motlauelikniuan kinuikaskej ken esclavos ipan oksekimej países. Nikchiuas para ma kinkuilikan nochi on tlen omitskuilijkej, niman ma kintlachtekilikan on yejuan omitstlachtekilijkej. 17 Nejua nikchiuas para tipajtis. Nimitspajtilis kampa timokokoua, maski tla motlauelikniuan kijtoskej: Jerusalén sen kauajli, xok yakaj kelnamiki. Nejua, moTEKO, ijki nikijtoua.'
18 'ToTEKO kijtoua: 'Nejua nikchiuas para xok nemiskej esclavos on iuejkakoneuan Jacob; nejua nikiknelis nochi on país. On ueyikalpan Jerusalén kichijchiuaskej kampa xoxotonki katka, niman on ipalacio oksepa kichijchiuaskej ken onkatka achtoj. 19 Yejuamej nokuikatiskej tlaxtlauilkuikamej niman pakauejuetskasej. Yejuamej xsan keskimej yeskej, yej nejua nikchiuas ma miyekiyakan. Ijkuakon uej kintlakaitaskej, pampa nejua nikchiuas ma kintlakaitakan 20 On israelitas nemiskej ken achtoj nemiyaj. On chanejkej kipiyaskej poder nixpan, niman nejua nikincastigaros on yejuan kintlajyouiltiayaj. 21 Intech yejuamej kisas sen rey yejuan kinmandaros. Yejua xchanej yes. Xnochimej nikinkauilis ma nonisiuikan notech, pero yejua nikauilis ma nonisiui notetch. 22 Yejuamej yeskej nokoneuan niman nejua niinDios yes. Nejua nemoTEKO ijki nikijtoua.'"