Iamatlajkuilol Jeremías
29
1-2 Más sakin ijkuak on rey Jeconías yokuikakaj ipan okse país, iuan on reina nantli, inmiuan itlakeualuan yejuan nemiyaj ipan palacio, on inuejueyitekiuajkauan Judá niman Jerusalén, on tlamachijchijkej niman on teposchijchijkej, on tiotlajtojketl Jeremías okiuiloj se amatlajkuilojli. Desde Jerusalén okomintitlanilij on amatlajkuilojli yejuan sanken nemiyaj nepa kampa okinuikakej: on uejueyitekiuajkej, niman on tiopixkej, on tiotlajtojkej niman on chanejkej yejuan Nabucodonosor okinkixtij ne Jerusalén para okinuikak Babilonia. 3 In amatlajkuilojli okiktikej Elasa, ikoneu Safán, iuan Guemarías, ikoneu Hilcías, yejuan Sedequías, rey de Judá, okomintitlan Babilonia para ma kitatij on rey Nabucodonosor. On amatlajkuilojli ijkin kijtouaya:4 ToTEKO yejuan nochi ueli kichiua, iDios Israel, ijkin kinmijlia nochimej on yejuan okinkixtijkej ne Jerusalén para okinuikakej Babilonia: 5 "Xkinchijchiuakan nenmokaluan niman ompa xchantikan; xkintȏkakan kojtlakilyomej niman xkuakan itlakyo. 6 Xmonamiktikan, xkimpiyakan nenmokoneuan tlakamej niman siuamej, niman no xkinnamiktikan nenmokoneua niman ma kipiyakan inkoneuan. Sanoyej xmomiyekilikan ompa niman maka yej nenxayauiskej. 7 Xtekitikan para ma onya tlatiochiualistli ipan on ueyikalpanmej de Babilonia kampa onemechuikak, niman xmoueyikatsajtsilikan ipampa, pampa tla onkaj tlatiochiualistli, nemejuamej no nenkiseliskej tlatiochiualistli."
8 'Nejua, nemoTEKO yejuan nochi niueli nikchiua, iDios Israel, ijki nenmechijlia: "Maka xmokauilikan ma mechkajkayauakan on tiotlajtojkej niman on tetlatejtemouilikej yejuan ompa inmiuan nenchatij. Maka xchiuilikan cuenta on temiktli yejuan yejuamej kipiyaj. 9 On tlinon yejuamej mechijliaj ikan notokatsin xmelauak. Yejuamej xnejua onikomintitlan. Nejua nemoTEKO ijki nikijtoua."
10 'NemoTEKO kijtoua: “Ijkuak nenkajxitiskej 70 xipan ika nennemij Babilonia, nikchiuas tlen kuajli niman nikchiuas para oksejpa xmokuepakan ipan in nemopaís. 11 Nejua nikpiya planes para nemechchiuilis tlen kuajli, xpara nemechchiuilis tlen xkuajli, niman ijkon más sankin nochi kuajli kisas niman nenkipiyaskej on sanoyej kuajli tlamachalistli. Nejua nemoTEKO ijki nikijtoua. 12 Ijkuakon nemejuamej nenmoueyikatsajtsiliskej, niman nenuajlaskej notech niman nejua nemechnankilis. 13 Tla nennechtejtemoskej ikan nochi nenmoyojlo, nennechnextiskej. 14 Kemaj, ijkuakon, nennechnextiskej, niman nenmechmanauis para xok nenesclavos yeskej; nemechonnanas de nochiuiyan on naciones kampa onemechseseman. Nejua nemechsentlalis niman nikchiuas para oksejpa xuajlajkan nikan kampa onemechkixtij. Nejua nemoTEKO ijki nikijtoua."
15 'Nemejuamej nenkijtouaj: "ToTEKO otechinmakak tiotlajtojkej ne Babilonia.” 16 (ToTEKO kijtoua de on rey yejuan nemi ipan itrono David niman de on chanejkej ipan in ueyikalpan, yejuan ken nenkitaj, yejuan xokinuikakej ken esclavos nemouan ijkuak omechuikakej: 17 Nejua nemoTEKO yejuan nochi niueli nikchiua, ijkin nikijtoua: "Nikinuajtitlanilis nouisokilistli, mayantli niman kokolistli. Nikchiuas para yejuamej nochiuaskej ken on tlakyotl itoka higos yejuan palanki, sanoyej palanki yes hasta xok yakaj uelis kikuas. 18 Nikintlaueltokatinemis ikan nouijsokilistli, mayantli niman kokolistli. Nikchiuas para nochimej naciones de in tlaltikpaktli sanoyej ma kinmojkaitakan, niman para ma kitakan ika nejua oniktlauelij, niman para inka ma uetskakan, imanian on naciones kampa nikinsesemanas. 19 Ijkon nochiuas pampa xokitlakamatkej on ixkuitijli yejuan onikimijlij intechkopa on notekitkauan tiotlajtojkej, yejuan nejua sejpa niman oksejpa onikinuajtitlanilij, pero nemejuamej xonenkinekkej onenkinkakkej. Nejua nemoTEKO ijki nikijtoua. 20 Xtlakamatikan tej, notlajtoltsin, nochimej yejuan onemechkixtij Jerusalén para omechuikakej Babilonia.”)
21 ToTEKO yejuan nochi ueli kichiua, kijtoua tlinon ipan nochiuas Acab, ikoneu Colaías, niman no tlinon ipan nochiuas Sedequías, ikoneu Maaseías, yejuan ikan notokatsin mechijlia on tlen xmelauak. Ijkin kijtoua: “Nejua nikintemakas itech Nabucodonosor rey de Babilonia, niman yejua kinmiktis nenmixpan. 22 Ijkon tej, on yejuan okinkixtijkej Judá para okinuikakej Babilonia ijkuak kinekiskej kitlaueliskej yakaj, ijkin kijtoskej: 'ToTEKO no ijki ma mitschiuili ken on rey de Babilonia okintliuats Sedequías iuan Acab ikan tlitl.' 23 Ijki impan nochiuas pampa okichijkej on tlinon sanoyej xkuajli ne Israel: inmiuan onotekakej on siuamej yejuan oksekimej insiuauan, niman okijtojkej ika notokatsin on tlinon xmelauak yejuan nejua xonikinnauatij. Nejua nochi nikmatstikaj ika melauak ijki onenkichijkej. Nejua nemoTEKO ijki nikijtoua."
Tlajtojli yejuan okijlijkej Semaías
24 ToTEKO okinauatij Jeremías para ma kijli Semaías in tlajtoltin yejuan ualeua Nehelam, pero aman nemi ne Babilonia: 25 "ToTEKO yejuan nochi ueli kichiua, iDios Israel, kijtoua: “Tejua ika motoka otikintitlanilij sen amatlajkuilojli nochimej on chanjkej Jerusalén, niman on tiopixki Sofonías, ikoneu Maaseías, niman nochimej on tiopixkej. Ipan on amatlajkuilojli otikijlij Sofonías: 26 'ToTEKO omitstlalij tiopixki para otikpatlak Joiada, niman tejua tiueyitlayekankitiopixki ipan on ueyitiopan. Niman tla yakaj loco yejuan notlamiya kitl yejua tiotljtolketl, tejua noneki tiktsakuas ipan cárcel, niman tiktlalis ikxiuan ipan cepo, niman tiksalos ikan teposcadena. 27 Tla ijkon, ¿tline hasta aman xtiktsakua Jeremías yejuan ualeua Ananot, niman yopeu tlajtoua ken tiotlajtojketl? 28 Niman hasta otechajtitlanilij sen amatlajkuilojli nikan Babilonia, kampa techijliaya ika sanoyej tiuejkauiskej techpiyaskej ipan in tetlalpan. Niman no otechijlij ma titokaltikan niman ompa ma tichantikan, niman ma tikintȏkakan kojtlakijlomej, niman ma tikuakan itlakyo.'”
29 On tiopixki Sofonías onomachtij on amatlajkuilojli ixpan Jeremías. 30 Kemaj toTEKO okinots Jeremías, on tiotlajtojketl, niman okijlij: 31 "Xtlanauati para ma kinmijlitij nochimej on yejuan okinuikakej Babilonia ken esclavos, ika nejua iminTEKO, nikimijlia: 'Pampa Semaías yejuan chanej Nehelam omechnots ikan notokatsin maski xnejua onikontitlan, niman okichiu para xtlalikan nenmoyojlo itech on tlen xmelauak, 32 nejua nemoTEKO nikijtoua ika nicastigaros Semaías niman iuejkakoneuan. Yejuamej xkimpiyaskej iuejkakoneuan iuan nokonejuan, nion xkipiyaskej on paktli yejuan nikinmakas nokoneuan, pampa ika itlajtol okinchiualtij nokoneuan para maka ma nechtlakamatikan. Nejua nemoTEKO ijki nikijtoua.'"