On israelitas oksejpa nokuepaskej ipan iminpaís
31
ToTEKO kijtoua: "Ipan on tonaltin nejua niiminDios yes nochimej on tribus de Israel, niman yejuamej yeskej nokoneuan."2 ToTEKO kijtoua: "Ijkuak nemiyaj inseltimej ipan on xalpatlajkan onikintitij noueyitetlajsojtlalis. On tlakamej yejuan onomanauijkej ipan on mikilistli, onikinmakak neseuili, 3 Desde yejuejkaui onikilij Israel: 'Otimitstlajsojtlak ika sen telajsojtlalistli yejuan hasta aman xtlami, niman para nochipa nimitstlajsojtlas.' 4 Israel, nejua nikchiuas para oksejpa timochiuas sen nación. Oksejpa tikpiyas miyek paktli niman timijtotis ikan mopanderos. 5 Oksejpa nenkitȏkaskej uvasyoj ipan itepeuan Samaria, niman yejuan kitȏkaskej uvasyoj, kikuaskej itlakyo. 6 Ijkin nochiuas pampa ajsis tonajli ijkuak on soldadojtlajpixkej ipan on tlamimiltin de Efraín, ijkin tsajtsiskej: 'Xuajlakan, ma tiuiyan san seknek ne Jerusalén, kampa nemi toTEKO Dios.'”
7 ToTEKO kijtoua: "Israelitas, xmokuikatikan ikan ueyipaktli. Nemejuamej más nenueyixtokej ipan nochi naciones. Xmokuikatikan chikauak niman xkijtokan: 'ToTEKO okinmakixtij ikoneuan, on israelitas yejuan onokajkaj.' 8 Xmokuikatikan niman chikauak xtsajtsikan pampa nejua nikchiuas para ma nokuepakan de on país norte, niman nikinsentlalis de nochiuiyan hasta itlankan in tlaltikpaktli. Inmiuan ualaskej on yejuan koxkatsitsimej, on koxotsitsimej, on siuamej yejuan yonokoneankej niman on yejuan yotlanemitijkej. ¡Uajnokuepaskej sanoyej tojlamej! 9 Uajnoueyikatsajtsilijtiaskej niman uajchokatiaskej. Nikinuajuikas kampaka yajtok atl kampa tlakualkan kampa xnokxitechakuaniskej. Nejua niitataj Israel, niman Efraín yejua noachtojkoneu."
10 ToTEKO kijtoua: "Naciones, xkakikan itlajtoltsin toTEKO niman xtemachistikan ipan on kalpanmej yejuan onokej itenko mar. Xkinmijlikan: 'ToTEKO okinseseman on israelitas, pero yejua oksejpa kinsentlalis niman kincuidaros ken on tlajpixki kincuidaroua iborregos.' 11 Ikin nochiuas pampa toTEKO okinmakixtij on israelitas. Okimakixtij de on nación yejuan sanoyej kojtik katka.
12 "Uajlaskej niman nokuikatiskej ikan paktli tlakpak ipan on tepetl Sión. Pakilistlamatiskej ikan itlatiochiualis toTEKO: on trigo, on vino niman aceite, on borregos niman on uakaxtin. Yes kenon tlatoktli yejuan kuajli katekiyaj, niman xokaman kipolos ifuerza. 13 On ichpokamej nijtotiskej ikan paktli, no ijki on telpokamej niman on ueuentsitsimej. Nejua nikinyoltlalis. Inchokilis nikimpatilis ikan pakilistli. Nikinmakas más ueyi pakilistli xkenon intlajyouilis. 14 On tiopixkej kikuaskej on más kuajli tlakuajli niman nokoneuan kiseliskej nochi notlatiochiualis. Nejua nemoTEKO ijki nikijtoua."
15 ToTEKO kijtoua: "Ne Ramá kakisti yakaj chokistlajtoua, niman ajmankachoka. On ajmankachoka yejua Raquel, yejuan kinchokilia ikoneuan, niman xkineki ma kiyoltlalikan pampa ikoneuan yomikkej."
16 Pero toTEKO kijlia: "Maka sa xchoka, Raquel. Maka sa xtoyaua mixayo, pampa motlajyouilis kipiyas itlaxtlauil. Mokoneuan oksejpa nokuepaskej de on impaís motlauelikniuan. Nejua, moTEKO, ijki nikijtoua. 17 Sanken onkaj tlamachalistli para tejua, pampa mokoneuan oksejpa nokuepaskej ipan intlal. Nejua moTEKO ijki nikijtoua. 18 Nejua yonikinkak iuejkakoneuan Efraín yejuan ijkin ajmankachokaj: 'Nejua nikatka ken on uakax yejuan xe kimachtiaj, pero aman tejua yotinechmachtij. Yejua ika, xchiua para nejua ma ninokuepa motech, pampa tejua tinoTEKO Dios. 19 Nejua tej otimitstlalkauij, pero aman nejua ninoyolkuepa. Yoninotak ika nitlajtlakolej, yejua ika nejua oninotlatsuitek notlakapan pampa onikchiu on tlen sanoyej xkuajli. Nejua nipinaua niman ninoknelia ipampa notlajtlakoluan yejuan onikchiu ijkuak nitelpochtli katka.'
20 'Iuejkakoneuan Efraín yejuamej notlajsokakoneuan. Yejuamej nokoneuan yejuan más nikintlajsotla. Maski tla nikinchikajkanotsa, nejua nochipa nikinmelnamiki. Ninajmana impampa niman sanoyej nikimiknelia. Nejua nemoTEKO ijki nikijtoua.
21 'Israelitas, xtlalikan neskayomej ipan ojtli, para ijki oksejpa kuajli tiknextis on ojtli kampa onenkistinenkej. ¡Israelitas, oksejpa xmokuepakan, xmokuepakan oksejpa ipan nenmouejueyikalpanuan! 22 ¿Hasta kamanon tlamis ika tikijkistinemi, ken yakaj ichpochtli yejuan yonopopoloj? Nejua, moTEKO, yonikchiu ipan in tlaltikpaktli itlaj yejuan yenkuik. In kijtosneki nokoneuan nokuepaskej nouan ikan nochi inyojlo, ken sen siuatl yejuan kinejneki sen tlakatl hasta kaman kitlapololtia."
On tlen kuajli kiseliskej on israelitas
23 ToTEKO yejuan nochi ueli kichiua, iDios Israel, ijkin kijtoua: "Ijkuak nikinmanauis ikoneuan Judá para xok esclavos yeskej, niman yejuamej oksejpa chantiskej ipan intlal niman ipan inminuejueyikalpanuan, yejuamej oksejpa ijkin kijtoskej: '¡ToTEKO ma kitiochiua in yektepetl kampa onkaj yolmelajkanemilistli!' 24 On chanejkej Judá: on yejuan chanejkej ipan on uejueyikalpanmej, on tlakamej yejuan tlatȏkaj niman on yejuan kintlajpiyaj inyolkauan ompa chantiskej san sekan ika kuajlotika. 25 Ijkon nochiuas pampa nejua nikinmakas miyek tlen kikuaskej niman tlen koniskej on yejuan yosiaukej niman xok kojtikej."
26 Ijkuak ijkon nikitstikatka, onitlachixteu niman onikuelitak on notemik.
27 ToTEKO kijtoua: "Yejkos tonajli ijkuak nikchiuas para on tlakamej niman on yolkej miyekiyaskej ipan in país de Israel niman de Judá. 28 Niman ijkon ken onikchiu kanika para nochimej okinkixtijkej, okintlajkalkej, okinchajchayajkej, okinmijmiktijkej niman okintlajyouiltikej, aman no ijki impan nitlachas para oksejpa ma nochiua kotik nación niman ma nomiyekilikan. Nejua nemoTEKO ijki nikijtoua.
29 'Ipan on tonaltin xok yakaj kijtos on tlajtojli: 'On tatajtin kikuaj uvas xokok, niman yej inkoneuan tlanxokopetsiuij, 30 pampa ijkuakon, akin kikuas uvas yejuan xokok, yejua tlanxokopetsiuis. Nochi tlakatl mikis ipampa itlajtlakol yejua.'"
31 'ToTEKO kijtoua: "Ajsis on tonajli ijkuak nejua nikchiuas yenkuik pacto iuan Israel niman iuan Judá. 32 In yenkuik pacto xok ijki yes kenon yejuan onikchiu iminuan iminachtojtajuan, ijkuak nejua onikinkixtij Egipto. In pacto xok ijki yes pampa yejuamej xokitlakamatkej on achtoj pacto, maski nejua oninochiu iminTEKO. Nejua nemoTEKO ijki nikijtoua. 33 In yenkuik pacto yejuan nikchiuas iuan iuejkakoneuan Israel ipan on tonaltin ijkin yes: niktlalis notlanauatiluan ipan inyojlo, niman nikijkuilos ipan intlamachilis. Nejua niiminDios yes, niman yejuamej yeskej nokoneuan. Nejua nemoTEKO ijki nikijtoua. 34 Ijkuakon, xok nonekis yakaj kimachtis itlajsojkaikniu noso yejuan ken kita, para ma nechixmatikan, pampa ijkuakon nochimej nechixmatiskej, desde on más ueuentsin hasta on más konetl. Nejua nikintlapojpoluis inxompayejyeualis niman xok kaman nikelnamikis imintlajtlakoluan. Nejua, nemoTEKO, ijki nikijtoua."
Iueyi poder Dios
35 NemoTEKO, yejuan ikan itlanauatil okitlalij on tonaltsintli para tlauiloua tlajokaj, on metstli niman sitlalimej para tlauilouaj tlayoua, yejuan kichiua para on mar ma koxoni niman ma kakisti ikoxonalis, yejuan nenkuitiaj toTEKO, yejuan nochi ueli kichiua, ijkin kijtoua: 36 "Tla yejkoskia on tonajli ijkuak xok onyaskiaj in tlanauatiltin yejuan oniktlalij ipan on tonajli, nokoneuan israelitas xok nokoneuan yeskiaj. Nejua, nemoTEKO, ijki nikijtoua. 37 Tla yejkos on tonajli ijkuak yakaj uelis kitemachiuas on cielo, niman kixmatis in tlajli hasta ipan icimientos, on tonajli xok nikselis Israel ipampa on tlen xkuajli okichiu. Nejua nemoTEKO ijki nikijtoua."
38 ToTEKO ijkin kijtoua: "Yejkos on tonajli ijkuak Jerusalén, noueyikalpan oksejpa nechchijchiuiliskej, uajpeuas desde kampa onkaj on torre Hananeel niman ontlamis hasta kampa onkaj on ueyitsakuijlotl kuitiaj Esquina. 39 De nikan Esquina, san se melajki yas, niman ontlamis hasta on tepetl Gareb, niman ompa tlanekuilos para yas hasta Goa. 40 Nochi on ixtlauatl kampa kintȏkaj on mikatsitsimej niman kixiniaj tlikonextli, niman nochi on campos yejuan nokaua tlakpakkopa de on ayajtok Cedrón, hasta iyakapitsko on Inueyitsakuijlou on Caballos, yejuan nokaua kampaka ikisayan tonaltsintli, noteyaxkatia san para nejua. Niman on ueyikalpan xokaman oksejpa kitlajkaliskej nion kixoxotoniskej."