Jeremía koua sen tlajli
32
ToTEKO okinots Jeremías ijkuak Sedequías ye kuikaya majtlaktli xipan ika tlamandarouaya Judá ken rey, niman Nabucodonosor ye kuikaya majtlaktli uan chikueyi xipan ika tlamandarouaya ken rey ne Babilonia. 2 Ipan on tonaltin, isoldados on rey de Babilonia kuijsoktikatkaj Jerusalén, niman on tiotlajtojketl Jeremías tsakutikatka ipan ikiauak on cárcej yejuan onkaj itech ipalacio on rey. 3 On rey Sedequías otlanauatij para ma kasikan Jeremías, pampa Jeremías okijtoj: "ToTEKO kijtoua: 'Nejua nikchiuas para in ueyikalpan ma uetsi ipan imauan on rey de Babilonia. 4 Niman on rey Sedequías xitlaj uelis kichiuas para nomanauis de intech insoldados on Babilonios, yej no uetsis ipan imauan on rey de Babilonia, niman ika onkaj yas ixpan on rey para ma kiseli tlajtlakolmakalistli niman icastigo. 5 Nabucodonosor kuikas Babilonia on rey Sedequías, niman yejua ompa nokauas hasta ijkuak ipan nochiuas ken nejua nikneki. Maski nemejuamej nenkinmixnamikiskej, xnenkintlaniskej. Nejua nemoTEKO ijki nikijtoua.'”6 Niman Jeremías okijtoj: "ToTEKO onechnots, niman onechijlij: 7 'Xkita, moprimo Hanamel, ikoneu motioj Salum, uajlas para mitsijlis xkouili itlal yejuan kipiya ne Anatot, pampa on ley kijtoua ika tejua mitstocaroua tikouas, antes kijliskej okse tlakatl.'"
8 Melauak ijki ken toTEKO onechijlij. Noprimo Hanamel ouajlaj onechitako nikan ipan on kiauak campa nemij on tiopantlajpixkej niman onechijlij ma nikouili on tlajli yejuan kipiya ne Anatot, ipan iueyitlalpan itribu Benjamín, pampa ijki kijtoua on ley ika nejua nechtocaroua nikouas, antes kijliliskej okse tlakatl, niman ijkon notech nokauas. Kemaj, onikmat ika toTEKO yejua kinekiya para nikouas on tlajli.
9 Yejua ika, nejua onikouilij itlal noprimo Hanamel. Nejua onikmakak majtlaktli uan chikome plata tomin para oniktlaxtlauilij on tlajli. 10 Otikchijchijkej sen amatlajli, niman otiksellarokej imixpan testigos yejuan okifirmarojkej. 11 Kemaj onikonkuik on ome copia de iamau on tlajli kampa kijtouaya ika onitlakou, se yejuan kipiyaya sello niman kijtouaya nochi de kenijki onitlakou niman on okse yejuan xkipiyaya on sello, 12 niman onikinmakak Baruc, on ikoneu Nerías yejuan teixuiu katka itech Maaseías. Ijkon onichiu ixpan: noprimo Hanamel, on testigos yejuan okifirmarojkej on amatlajli niman nochimej on judíos yejuan yejyeuatikatkaj ipan on kiauak.
13 Imixpan yejuamej onikijlij Baruc: 14 “ToTEKO yejuan nochi ueli kichiua, iDios Israel, kijtoua: 'Xkinkui in ome copia de amatlajli, on se yejuan tsaktikaj ikan sello niman on okse yejuan xtsaktikaj, niman xkinmejeua ijtik sen kontsintli de sokitl, para más uejkauiskej onyaskej.' 15 ToTEKO yejuan nochi ueli kichiua, iDios Israel, kijtoua: 'Ipan in país on israelitas oksejpa kinkouaskej kaltin, tlaltin niman uvasyoj.'”
Jeremías noueyikatsajtsilia
16 Sakin ijkuak yonikmakak on amatlajli Baruc, ikoneu Nerías, nejua ijkin oninoueyikatsajtsilij itech toTEKO: 17 "Tejua, noTEKO, ikan moueyipoder otikchiu para ma onya cielo niman in tlaltikpaktli. Para tejua xitlaj ika tonteliui. 18 Tejua tikintitia motetlajsojtlalis hasta intech on ika mil tekoneuan, pero no tikincastigaroua on tlakamej ipampa intlajtlakoluan intajuan. ¡Tejua tiueyixtikaj Dios niman nochi tiueli tikchiua! ¡Tejua motoka ToueyiTEKO yejuan nochi tiueli tikchiua! 19 Sanoyej tetlatlachaltij on tlinon tiknemilia tikchiuas. Tejua tikita nochi tlinon kichiua cada tlaltikpaktlakatl, niman tikintlaxtlauilia ken kimelaua kiselis ika on tlen kichiua. 20 Tejua otikchiu Egipto, uejueyi milagros niman tlamauisoltin, niman hasta aman tikchiua intech ichanekauan Israel niman nochiuiyan itech nochi tlakatl, niman ijki motokatsin más miyekej kixmatij. 21 Tejua, ika moueyipoder, otikinkixtij on israelitas de Egipto, otikchiu milagros niman on tlamauisoltin niman nochi tlakatl sanoyej onomojtij. 22 Otikinmakak in tlajli on israelitas, nikan kampa nochi onkaj niman xitlaj poliui, ijkon ken tejua yotikimijlika tikinmakas inachtojtajuan. 23 Pero ijkuak yejuamej okalakkej ipan in país niman okiselijkej, yejuamej xomitstlakamatkej. Xokichijkej ken tejua otikinnauatij. Semi xitlaj okichijkej on tlen tejua otikinnauatij. Yejua ika, tejua otikinuajtitlanilij nochi in tlajyouilistin.
24 'Aman on babilonios yokinchijchijkej on tlinon ika ueliskej tlejkoskej ipan on tepantli niman ijki uelis kuisokiskej in ueyikalpan. Niman on nouisokilistli, on mayantli niman on kokolistin kichiuaskej para in ueyikalpan ma uetsi ipan inmauan intlauelikniuan. NoTEKO, tejua ye tikitskaj ika ye nochijtikaj on tlinon otikijtoj. 25 Pero tejua noTEKO, maski tikmatiya ika ijkon nochiuas, yej otinechnauatij ma nikoua on tlajli inmixpan testigos, niman tikmatiya ika in ueyikalpan uetsis ipan inmauan on insoldados on babilonios.”
26 Kemaj toTEKO okinankilij Jeremías: 27 "Nejua niiTEKO, niiDios nochi kech tlaltikpaktlakatl. Para nejua xitlaj ika nonteliui, yej nochi niueli nikchiua. 28 Nejua ijkin nimitsijlia: 'Nejua nikchiuas para in ueyikalpan mauetsi ipan imauan Nabucodonosor, on rey de Babilonia niman isoldados. 29 On soldados de Babilonia yejuan ye kuijsoktokej in ueyikalpan, kalakiskej ompa niman kitlatiskej. No teuan kintlatiskej on kaltin yejuan ipan inkuapan, kichiuayaj on tlen sanoyej nechkualania pampa kitlatiayaj kopajli niman kipopochuiyayaj Baal, niman kampa kinuentlaliliayaj vino on dioses yejuan xkinmixmatij. 30 Desde opejkej ken nación, inchanekauan Israel niman Juda okichijkej on tlen xnikuelita. On israelitas xkaman kauaj ika nechkuajkualaniaj pampa xkauaj ika kinmauistiliaj on ídolos yejuan sano yejuamej okinchijchijkej. Nejua, nemoTEKO, ijki nikijtoua. 31 No ijki, on chanejkej ipan in ueyikalpan, desde ijkuak opeu kichijchiuaj hasta aman, nochi tlen kichiuaj san para ika nechkualaniaj. Yejua ika, nejua nikpopolos, 32 ipampa nochi on tlen ika yonechkualanijkej on inchanekauan Israel niman itech Judá, niman on iminreyes, imintlayekankauan, intiopixkauan, intiotlajtojkauan niman nochimej yejuan chantij ne Judá niman yejuan chantij Jerusalén. 33 Maski nejua nikinnotsaya. yejuamej xokinekej onechkakkej, niman maski nejua nochipa nikinmachtia, yejuamej xnechchiuiliaj cuenta niman xkinekij ma nikinkueklali. 34 Yejuamej yokijtlakojkej on ueyitiopan yejuan onoteyaxkatij san para nejua, pampa ompa okintlalikej imindolos yejuaj tetlajyelojkej. 35 No ijki, okinchijchijkej itlaixpanuan Baal ne ipan on ixtlauatl Ben-hinom, para okintlatijkej inkoneuan yejuan tlakamej niman siuamej itech Moloc, niman ijki okinchiualtijkej ma tlajtlakokan on chanejkej Judá. Ijkon okichijkej on tlen sanoyej xkuajli yejuan xonikinnauatij nion siquiera xkaman ijki oniknemilij.'"
ToTEKO okiprometeroj kichiuas tlen kuajli más sankin
36 Nejua, nemoTEKO, iDios Israel, nikneki más nikteneuas de in ueyikalpan yejuan tejua tikijtoua ika uetsis ipan imauan on rey de Babilonia ika on nouisokilistli, mayantli niman on kokolistli: 37 "Nejua nikinsentlalis on chanejkej yejuan nejua onikinseseman ipan oksekimej países ijkuak yejuamej okichijkej para sanoyej ma nikualani, nejua nikchiuas para oksejpa ma nokuepakan ipan in tlajli niman chantiskej kuajlotika niman xitlaj kimpajsolos. 38 Yejuamej nokoneuan yeskej niman nejua niiminDios yes. 39 Nejua nikchiuas para yejuamej ikan nochi inyojlo niman para nochipa san nejua ma nechtlakaitakan, para yejuamej kiseliskej on tlinon kuajli niman no ijki on inuejkakoneuan. 40 Nikchiuas inmiuan sen pacto yejuan xkaman tlamis. Nejua nikimprometerouilia ika xkaman nikauas nikinchiuilis tlen kuajli, niman niktlalis ipan inyojlo para ma nechtlakaitakan niman para maka kamantika ma nechtlalkauikan. 41 Nejua ikan paktli nikinchiuilis nochi tlen kuajli, niman ikan nochi noyojlo nikchiuas para oksejpa ma chantikan ipan in país."
42 ToTEKO no okijtoj: "Ijkon ken onikinuajtitlanilij on tlinon xkuajli yejuamej in tlakamej, no ijki nejua nikinuajtitlanilis nochi tlen kuajli yejuan yonikimprometerouilij nikinmakas. 43 Niman ipan in país, yejuan tejua tikijtoua ika nokauas ken on xalpatlajkan, xok yakaj nemis nion on yolkej, niman ika kinmajsiskej on babilonios, oksejpa nokouaskej on tlaltin. 44 Nokouaskej tlaltin niman kinamatlaliskej ikan sello niman kinfirmaroskej on testigos. Ijkon nochiuas ipan iueyitlalpan Benjamín, no ijki nochiuas nochiuiyan ipan on kalpantsitsimej iyeualkan Jerusalén, niman ipan inuejueyikalpanuan Judá, nochiuiyan kampa tepeyoj. niman ipan ixtlauayoj, niman ipan iuejueyikalpanuan Négueb. Ijkon nochiuas pampa nejua nikchiuas para kisaskej ne Babilonia. Nejua nemoTEKO ijki nikijtoua."