Onkaj tlamachalistli para on israelitas
33
Chika Jeremías sanken tsakutikatka ipan on kiauatk kampa on tiopantlajpixkej nemiyaj, toTEKO oksepa okinots Jeremías, niman okijlij: 2 "Nejua, moTEKO, yejuan onikchijchiu in tlaltikpaktli, nochi san sekan oniksetlalij, niman kemaj oniktlalij para xkaman nejkuanis kampa onkaj, nimitsijlia: 3 Xnechnotsa niman nejua nimitsnankilis, niman nimitsititis uejueyi tlajchamach, on tlen ichtaka onkaj yejuan tejua xtikmati. 4 Nejua, nemoTEKO, iDios Israel, nikpiya tlinon nemechijlis: Maski nenkinxoxotoniskej in kaltin ipan in ueyikalpan niman hasta ipalacio on rey de Judá, para nenkuiskej on kojtin niman ika nenkiometiliskej on tepantli para maka kalakiskej on Babilonios, 5 yejuamej kalakiskej. Yejuamej kinmiktiskej nochimej niman on kaltin temiskej ikan on mikatlakayomej. Ijkon nochiuas pampa ikan notemojtij tlauel nikchiuas para ma kinmiktikan nochimej. Nejua yoniktlalkauij in ueyikalpan pampa on chanejkej yokichijkej miyek on tlen sanoyej xkuajli. 6 Pero yejkos tonajli ijkuak nejua nikchiuas para xok kinekiskej kichiuaskej on tlen xkuajli, yej kintlakaitaskej. Kipiyaskej yolseuilistli niman xok yakaj kimpasolos. 7 Nejua nikchiuas para xok tlajyouiskej ken esclavos on chanejkej Judá niman Israel. Yej, nejua nikchiuas para oksejpa kuajli ma nemikan ken achtoj nemiyaj. 8 Nikinchipauas de nochi on tlajtlakoltin yejuan okichijkej; nikintlapojpoluilis nochi on xompayejyeualistli yejuan ika xonechtlakamatkej. 9 Ipampa Jerusalén sanoyej nipakis, niman nechtlakaitaskej. Nechueyiteneuaskej nochiuiyan ipan nochi naciones, niman sanoyej nechmojkaitaskej ijkuak kakiskej nochi on tlen kuajli niman nochi on tlatiochiualistli yejuan nikinmakas."10 ToTEKO kijtoua: "Nemejuamej nenkijtouaj ika nikan yonokau ken xalpatlajkan niman xok yakaj nemi nion yolkej xok nemij; no ijki ipan iuejueyiojuiuan Jerusalén niman ipan iuejueyikalpanuan Judá, xok yakaj chanti niman nion yolkej xokuitlaj nemij. Tla ijkon tej, kuajli xkakikan, ika nikan oksejpa kakistis, 11 on iluikuikamej niman on pakakuikamej, niman iminkuikau on novios. Niman no ijkuak kuajkiskej ipan in ueyitiopan tlaxtlauiluentli ijkin kijtoskej: 'Xmakakan tlaxtlauijli toTEKO yejuan nochi ueli kichiua, pampa toTEKO yejua sanoyej kuajli, pampa itetlajsojtlalis xkaman tlami.' Niman oksejpa kuajkiskej ipan in ueyitiopan tlaxtlauiluentli. Melauak, nejua nikchiuas para on yejuan okinuikakaj esclavos oksejpa uajchantiskej, niman oksejpa nemiskej ken achtoj nemiyaj. Nejua nemoTEKO ijki nikijtoua."
12 ToTEKO, yejuan nochi ueli kichiua, kijtoua: "Ipan in país yejuan aman yonokau ken sen xalpatlajkan, kampa xok yakaj nemi nion yolkej xok nemij, niman ipan on uejueyikalpanmej, oksejpa onyas sakatlan kampa on tlajpixkej kintlakuajkualtiskej inyolkauan. 13 No ijki ipan on uejueyikalpamej yejuan nokauaj ipan on región kampa tepeyoj, niman kampa ixtlauayoj, niman ipan on iueyitlalpan Négueb, iueyitlalpan Benajamín, niman no impan on kalpantsitsimej iyeualkan Jerusalén, niman ipan iuejueyikalpanuan Judá, oksejpa ompa kintaskej on tlajpixkej kimpojtokej iminborregos. Nejua nemoTEKO ijki nikijtoua."
14 NemoTEKO kijtoua: "Yejkos on tonajli ijkuak nejua nikchiuas para ma nocumpliro ijkon ken onikimprometerouilij nikintiochiuas on chanejkej Israel niman Judá. 15 Ijkuak ijkon nochiuas, ipan on tonajli, nejua nikiteneuas sen rey yejuan iuejkakoneu David para tlamandaros. Yejua yolmejlajki yes niman tlamandaros ken kitocaroua. 16 Ipan on tonaltin Judá kimakixtiskej de itlauelikniuan, niman Jerusalén nemis iyolika. In ueyikalpan ijkin kitokayotiskej: 'ToTEKO yejua totetlanilis'."
17 Nejua, nemoTEKO, ijkin nikijtoua: "Xkaman poliuis sen iuejkakoneu David yejuan notlalis ipan itrono Israel, 18 nion xkaman poliuiskej on tiopixkej teuejkakoneuan itech Leví yejuan mojmostla nechuentlaliliskej on uentli yejuan nochi tlatla. Kitlatiskej on uentli de trigo noso de cebada para nechmauistiliskej niman no nechmakaskej okseki uentin."
19 ToTEKO okinots Jeremías, niman okijlij: 20 "Nejua, nemoTEKO, nikijtoua ika xuelis ijki nokauas niman xnochiuas on pacto yejuan onikchiu iuan on tonaltsintli niman on yeuajli. Ika onkaj on tonaltsintli niman on yejuajli kichiuaskej ken onikinnauatij para kisaskej mojmostla ken noneki. 21 No ijki ika onkaj nochiuas on pacto yejuan onikchiu iuan notekitkau David, ika xkaman poliuis sen iuejkakoneu yejuan tlamandaros ipan itrono. No ijki ika onkaj nochiuas on pacto yejuan onikchiu iminuan on notekitkauan tiopixkej iuejkakoneuan Leví ika xkaman poliuis ika nechtekichiuiliskiej. 22 No ijki, iuejkakoneuan notekitkau David, niman on notiopixkauan, iuejkakoneuan Leví, nikchiuas sanoyej ma miyekiyakan ken on sitlalimej yejuan onokej ipan cielo niman ken on xajli yejuan onkaj itenko on mar, yejuan xakaj ueli kipoua."
23 ToTEKO okinots Jeremías, niman okijlij: 24 "¿Xtikmomaka cuenta ika kijtouaj kitl yonikintlalkauij on ome familia de Israel niman Judá yejuan sano nejua onikintlapejpenij? Yejua ika, sekimej kintlauelitaj niman xok kintlakaitaj ken sen nación! 25 Nejua tej, moTEKO, nikijtoua: 'Ijkon ken onikchiu sen pacto iuan tonaltsintli niman on yeuajli, niman oniktlalij on leyes para in tlaltikpaktli niman on cielo kitlakamatiskej, 26 no ijki, xkaman nikinkauas iuejkakoneuan Jacob, nion nopacto inuan inuejkakoneuan David. Niktlalis se de iuejkakoneuan David para kinmandaros inuejkakoneuan Abraham, Isaac niman Jacob. Nejua nikimiknelis, niman nikchiuas para maka sa ma nemikan ken esclavos.'"