On tlinon ipan nochiuas on rey Sedequías
34
Ijkuak Nabucodonosor, rey de Babilonia, iuan isoldados yejuan ualeuayaj nochiuiyan de on naciones kampa tlamandarouaya ken rey, ye kuijsoktikatkaj Jerusalén niman nochimej on uejueyikalpamej yejuan onkatkaj iyejyeualkan, toTEKO okinots Jeremías, niman okijlij: 2 "Nejua, nemoTEKO, iDios Israel, nimitsnauatia para ijkin xkijliti Sedequías, rey de Judá: 'Ijkin kijtoua toTEKO: Nejua nikchiuas para on rey de Babilonia ma kinoyaxkati in ueyikalpan niman ma kitlati. 3 Tejua xuelis timomanauis, yej mitsajsiskej. Mitstemakaskej itech irey Babilonia para tikselis tlajtlakolmakalistli niman mocastigo. Kemaj, mitsuikaskej Babilonia.' 4 Maski tla mitsajsiskej, tejua Sedequías rey de Judá, kuajli xkaki tlinon nejua, moTEKO nimitsijlis: 'Tejua xmitsmiktiskej ipan on uijsokilistli. 5 Tejua timikis ika kuajlotika, niman kitlatiskej ajuiyalistli ijkuak mitstȏkaskej no ijki ken okitlatijkej ijkuak okintȏkakej moachtojtajuan yejuan otlamandarojkej achtoj de tejua. Niman ijkin kijtoskej: ¡Ay, noteko! Ijkon kichiuaskej mopampa. Nejua moTEKO ijki nikijtoua, niman nimitsprometerouilia ika ijki nochiuas.'"6 On tiotlajtojketl Jeremías nochi in okijlij on rey Sedequías ne Jerusalén. 7 Chika ijkuakon, isoldados on rey de Babilonia ye kinuijsoktikatkaj Jerusalén, Laquis niman Azeca. Sa yejuamej on uejueyikalpanmej yejuan kuajli yeualtsakutikatkaj ikan tlakpak tejpantli xe kintlaniyaj.
Xmelauak okinmakajkej on hebreos yejuan esclavos
8 ToTEKO okinots Jeremías, más sakin ijkuak on rey Sedequías yokichijka sen pacto inuan nochimej on chanejkej Jerusalén para kinmakauaskej on esclavos yejuan kimpiyaj inchan. 9 On pacto kijtouaya ika san akinon yejuan kimpiya esclavos noso esclavas yejuan hebreos ika onkaj kinmakauas, para ijki xakaj kipiyas ken esclavo yakaj yejuan hebreo. 10 Nochimej on tlayekankej niman on chanejkej okichijkej ken kijtouaya on pacto, niman okinmakajkej iminesclavos. Yejua ika, xok okinchiualtijkej ma kintekichiuilikan, 11 pero más sankin onoyolpatlakej ika okinmakajkej on iminesclavos, niman okinchiualtikej para oksejpa ma nokuepakan niman ma kintekichiuilikan ken esclavos.
12 Kemaj toTEKO okinots Jeremías, niman okijlij para ma kinmijli on hebreos: 13 "Nejua, niiTEKO Dios Israel. Onikchiu sen pacto inmiuan nenmoachtojtajuan ijkuak onikinkixtij Egipto, kampa yejuamej tetekipanouayaj ken esclavos. Nejua onikinnauatij 14 para ipan cada chikome xipan kinmakauaskej nochimej on hebreos yejuan intech ononamakakej niman yokintekichiuilijka chikuasen xipan. Pero nenmoachtojtajuan xokinekkej onechkakkej niman xonechtlakamatkej. 15 San kemach nemejuamej yonenkipatlakaj nenmotlamachilis, niman yonenkichijkaj on tlinon nejua nechpaktia, ijkuak onenkinmakajkej nenmochanejkauan yejuan nenkimpiyayaj ken esclavos. Niman nixpan nejua onenmotlajtolmakakaj ika sen pacto, ipan on ueyitiopan yejuan tlakajtli san para nejua. 16 Pero más sankin onenmotlajtolpatlakej. Niman ijkon, tej, onenkijtlakojkej notokatsin, pampa onenkinchiualtijkej on esclavos yejuan yonenkinmakajkaj oksejpa ma nokuepakan niman oksejpa ma mechtekichiuilikan ken esclavos. 17 Tla ijkon, aman nejua, nemoTEKO, ijkin nikijtoua: 'Nemejuamej xonennechtlakamatkej, pampa xonenkinmakajkej nenmochanejkauan yejuan nenkimpiyayaj ken esclavos. Yejua ika, aman nejua nemechajtitlanilis nouisokilistli, kokolistli niman mayantli para ma mechchiuilikan on tlen sanoyej xkuajli. Ijkuakon, nochimej on reinojyomej ipan in tlaltikpaktli sanoyej mechmojkaitaskej. Nejua nemoTEKO ijki nikijtoua. 18-19 On tlayekankej de Judá niman Jerusalén, inmiuan on tekitij ipan on palacio, on tiopixkej niman nochimej on ompa chanejkej okichijkej sen pacto nixpan. Okitlajkokixtijkej sen uakaxkonetl niman okintlalijkej okan. Kemaj opanokej tlajkotian. Pero yejuamej xokichijkej ken kijtoua on pacto, niman xokichijkej ken nonekiya kichiuaskej. 20 Yejua ika, nejua nikchiuas para intlauelikniuan ma kinmajsikan yejuan kinmiktiskej, niman iminmikatlalnakayo kikuaskej on totomej nakakuanij niman on tepeyolkej. 21 No ijki, nikmaktilis Sedequías, on rey de Judá, inmiuan iuejueyitekiuajkauan intech isoldados on rey de Babilonia. Niman maski ipan in tiempo yejuamej xok kuijsokij Jerusalén, 22 nejua nikinnauatis para oksejpa ma uajlakan niman ma kuijsokikan, ma kinoyaxkatikan niman ma kitlatikan. Niman no nikchiuas para kuajli ma kixoxotonikan niman maka sa yakaj ompa ma chanti. Nejua nemoTEKO ijki nikijtoua.'"