Jeremías niman ikoneuan on Recab
35
Ipan on tonaltin ijkuak Joacim, ikoneu Josías, rey katka Judá, toTEKO onechnots, niman onechijlij: 2 "Xuiya ne kampa chantij ifamilias on recabitas niman inmiuan xtlajto. Kemaj, xkinuika ipan sen cuarto de on ueyitiopan, niman ompa xkinmaka vino ma konikan."3 Yejua ika, nejua, Jeremías, oniaj oniktejtemoto Jaazanías (ikoneu okse tlakatl yejuan no itoka Jeremías niman teixuiu katka itech Habasinías), niman iminikniuan niman iminkoneuan, niman nochimej on familia de Recab. 4 Ijkuak onikintejtemoto, onikinuikak ipan on ueyitiopan, ipan incuarto ikoneuan Hanán, yejuan tekoneu katka itech Igdalías, yejuan tiotlajtojketl katka itech Dios. Yejua in cuarto onkatka inakastlan incuarto on tlayekankej de on ueyitiopan, niman in cuarto nokauaya ikuapan icuarto Maaseías, yejuan tekoneu katka itech Salum. In tlakatl yejua tlajpixki katka ipan ikalakiyan on ueyitiopan. 5 On recabitas onikintêkilij vino ipan jarritos niman copas. Niman kemaj onikimijlij: "Xkonikan achijtsin vino."
6 Pero yejuamej onechnankilijkej: "Tejuamej xtikonij vino, pampa Jonadab, ikoneu Recab, on toachtojtataj otlanauatij para tejuamej niman touejkakoneuan maka kaman tikoniskej vino. 7 No ijki, otechnauatij para maka ma tikinchijchiuakan kaltin, maka ma titôkakan, maka ma tikpiyakan uvasyoj. Otechnauatij para nochipa ma tichantikan ipan totojtonkajli, para ijki uejkauis tinemiskej ipan in tlajli kampa tinemij kenon yejuan xchanejkej. 8 Tejuamej tiktlakamatij nochi on tlanauatiltin yejuan toachtojtataj Jonadab otechnauatij, niman xkaman tikonij vino, nion tejuamej nion tosiuauan nion tokoneuan. 9 No ijki xtikinchijchiuaj kaltin, nion xtikimpiyaj ovasyoj nion xtikintȏkaj tlaltin. 10 Tichantij ipan totojtonkaltin, niman tikchiuaj nochi on tlinon toachtotataj Jonadab otechnauatij. 11 Pero ijkuak Nabucodonosor, rey de Babilonia, okuisok in país, tejuamej otikijtojkej kas más kuajli ma tiualakan nikan Jerusalén para ijki ouel oticholojkej de intech insoldados on babilonios niman no intech on sirios. Yejua ika, aman tichantij nikan Jerusalén."
12 Kemaj toTEKO okinots Jeremías, niman okijlij: 13 "Nejua, niiTEKO Dios Israel, yejuan nochi niueli nikchiua. Nimitsnauatia para xuiya niman xkinmijliti on chanejkej Judá niman Jerusalén: 'Xixtojtomikan ika on tlakamatilistli, niman xnechtlakamatikan. Nejua nenmoTEKO nikijtoua. 14 On iuejkakoneuan Jonadab, ikoneu Recab, kichiuaj tlinon okinnauatij ijkuak okimijlij maka koniskej vino, niman hasta aman yejuamej xkonij vino pampa yejuamej kitlakamatij itlanauatil iminachtojtataj. Nejua no ijki miyekpa yonemechmakak tlanauatiltin, pero nemejuamej uej xnennechtlakamatij. 15 Nejua yonemechinuajtitlanilij, miyekej on notekitkauan tiotlajtojkej, para ma mechijlikan: Xkajkauakan ika xkuajli nenmouikaj, niman on tlinon xkuajli nenkichiuaj. Maka xkintekipanokan oksekimej dioses, niman maka xkinmauistilikan. Tla nenkichiuaskej ken nenmechnauatia, sanken nennemiskej ipan in tlajli yejuan onemechmakak nemejuamej niman nenmoachtojtajuan. Pero xonenkinekej onennechchiuilijkej cuenta, nion xnennechtlakamatkej. 16 On inuejkakoneuan Jonadab, ikoneu Recab, uej kichiuaj on tlinon okinnauatij iminachtojtataj, pero on israelitas uej xnechtlakamatij.'
17 'Yejua ika, nejua nemoTEKO yejuan nochi ueli nikchiua, niman nejua yejuan niiDios Israel, nikijtoua: 'Nejua nikchiuas para impan on chanejkej Judá niman Jerusalén ma uajla nochi on temojtij tlajyouilistin yejuan yonikijtojka nikuajtitlanis. Ijkon nikchiuas pampa nejua onitlajtoj, niman nemejuamej xonennechchiuilijkej cuenta; nejua onemechnots niman xonennechnankilijkej.'”
18 No ijki, Jeremías okimijlij on recabitas: "ToTEKO yejuan nochi ueli kichiua niman iDios Israel kijtoua: 'Pampa nemejuamej onenkitlakamatkej itlanauatiluan nenmoachtojtataj Jonadab, niman onenkichijkej on tlinon yejua omechmachtij niman onenkichijkej nochi on tlinon yejua omechnauatij, 19 nejua, nemoTEKO yejuan nochi niueli nikchiua, niman niiDios Israel, nemechmelajkaijlia ika xkaman poliuis se iuejkakoneu Jonadab yejuan nochipa nechtekipanos.