Baruc okinomachtij on tlajkuilolamatli mimiltik
36
Ijkuak Joacim, ikoneu Josías, kuikaya naui xipan ika tlamandarouaya ken rey ne Judá, toTEKO okinots Jeremías, niman okijlij: 2 "Xkui sen tlajkuilolamatl mikiltik kampa tikijkuilos nochi on tlen yotimitsijlij de on tlen ipan nochiuas Israel, Judá niman oksekimej naciones. Tipeuas desde ijkuak opeu timitsnotsa ipan on tonaltin ijkuak Josías rey katka hasta aman. 3 Nikneki nikitas tla on chanejkej Judá ijkuak kimatiskej nochi on tlen xkuajli nikinuajtitlanilis, uej kemaj kajkauaskej on ika xkuajli nouikaj, niman nejua nikintlapojpoluilis iminxompayejyeualis niman intlajtlakoluan."4 Yejua ika tej, Jeremías okinots Baruc, ikoneu Nerías, niman okinauatij ma kijkuiloj nochi on tlen toTEKO okijlij, niman Baruc okijkuiloj ipan sen tlajkuilolamatl mikiltik. 5 Kemaj Jeremías okijlij Baruc kenijki kichiuas: "Nejua nitsakutikaj nejua xuelis nias ipan iueyitiopan toTEKO. 6 Yejua ika, tejua xuiya ipan on tonajli ijkuak nosaualo niman xkiminkakistili nochi on tlen otimitsijlij niman otikikuiloj ipan on amatlajkuilojli mimiltik, para on chanejkej ipan in ueyikalpan niman nochimej on yejuan chantij ipan inuejueyikalpanuan Judá yejuan oualakej nikan, ma kakikan itlajtoltsin toTEKO. 7 Kas ijki uej noueyikatsajtsiliskej itech toTEKO, niman kajkauaskej on tlen xkuajli kichiuaj, pampa toTEKO sanoyej kualantikaj niman yokintlajtouilij kintlajyouiltis." 8 Yejua ika, Baruc okichiu nochi ijkon ken on tiotlajtojketl Jeremías okinauatij. Oyaj ipan on ueyitiopan niman okinomachtij itlajtoltsin toTEKO ipan on amatlajkuilojli mimiltik.
9 Ijkuak Joacim, ikoneu Josías, ye kuikatkatka makuijli xipan niman chiknaui metstli, ijkin otlanauatijkej, para on chanejkej Jerusalén niman on yejuan oualejkej ipan oksekimej inuejueyikalpanuan Judá, ma nosauakan ixpan toTEKO. 10 Baruc oyaj ipan ikiauak on ueyitiopan yejuan onkaj tlakpak, ipan ikalakiyan on Yenkuik Ueyitsakuijlotl. Niman desde ompan ipan icuarto Gemarías, ikoneu Safán yejuan amatlajkuilojketl katka, okinomachtij inmixpan nochimej on tlajkuilojli kampa tlajkuilolnestikaj itlajtol Jeremías.
Baruc onomachtij on tlajkuilojli imixpan on uejueyitekiuajkej
11 Micaías, yejuan ikoneu Gemarías niman teixuiu katka itech Safán, okak nochi itlajtoltsin toTEKO yejuan Baruc okinomachtij ipan on tlajkuilolamatli mimiltik, 12 niman yejua oyaj ipan ipalacio on rey, ipan icuarto on amatlajkuilojketl kampa nemiyaj san sekan nochimej on uejueyitekiuajkej: Elisama, amatlajkuilojketl; Delaías, ikoneu Semaías; Elnatán, ikoneu Acbor; Gemarías, ikoneu Safán; Sedequías, ikoneu Hananías, niman oksekimej uejueyitekiuajkej. 13 Micaías okintlajtlajtouilij nochi on tlinon okak ijkuak Baruc okinomachtij nochi on tlajkuilojli ipan on tlajkuilolamatli mimiltik inmixpan nochimej on chanejkej. 14 On uejueyitekiuajkej okontitlankej Jehudi, (ikoneu Netanías, teixuiu itech Selemías niman ika okpa teixuiu itech Cusi,) ma kijliti Baruc para ma kuajki on amatlajkuilojli mimiltik yejuan onomachtika inmixpan on chanejkej. Kemaj Baruc okonkuik on amatlajkuilojli mimiltik niman oyaj intech on uejueyitekiuajkej. 15 Niman yejuamej okijlijkej:
—Xmotlali niman xmomachti on tlajkuilojli.
Yejua ika, Baruc ikinomachtij. 16 Ijkuak otlan kakij, yejuamej opejkej nootaj ikan miyek nemojtijli, niman onojlijkej:
—Nochi in, ika onkaj amanaman tikmachistiskej on rey.
17 Kemaj okijlijkej Baruc:
—Xtechtlajtlajtouili kenijki otikijkuiloj nochi in.
18 Niman Baruc okinnankilij:
—Jeremías yejua onechijlijtiaj nochi, niman nejua onikijkuilojtiaj ipan in amatlajkuilojli mimiltik.
19 Kemaj okijlijkej Baruc:
—¡Tla ijkon, tejua niman Jeremías xmiyanatij, niman maka kauilikan yakaj ma kimati kanon nennemij!
On rey Joacim okitlatij on amatlajkuilojli mimiltik
20 On uejueyitekiuajkej okajkej on amatlajkuilojli mimiltik ipan icuarto Elisama, on amatlajkuilojketl, niman okijlitoj on rey nochi on tlinon yejuamej okakkej. 21 On rey Joacim okinauatij Jehudi para ma kuiti on amatlajkuilojli mimiltik ipan icuarto Elisama, on amatlajkuilojketl. Niman ijkuak Jehudi okuajkik, okinomachtij ixpan on rey niman inmixpan nochimej on uejueyitekiuajkej yejuan nemiyaj iyeualkan. 22 On onochiu ipan on chiknaui metstli. Yejua ika, on rey nemiya ipan on cuarto kampa nokaua ijkuak seua. No ompa onkatka on tlikuijli kampa kitlaliayaj tlixochtli para tlatotonkan katka. 23 Ijkuak Jehudi tlamiya kinomachtiaya yeyi noso naui tlatekpantli de on tlajkuilojli, on rey kitetekiya kampa onomachtij on amatlajkuilojli mimiltik ikan cuchillo niman conchapaniaya ipan on tlixochtli. Ijki okichiu hasta kaman otlan kitlatia nochi on amatlajkuilojli mimiltik. 24 Nion on rey nion iuejueyitekiuajkauan yejuan okakkej nochi on nomachtijli, xonomojtijkej nion xoneskej tla onoyolajmankej. 25 Elnatán, Delaías niman Gemarías okiknotlajtlanilijkej on rey para maka ma kitlati on amatlajkuilojli mimiltik, pero yejua xokinchiuilij cuenta. 26 Yej on rey okinauatij Jerahmeel, on ichtoj koneu; Seraías, ikoneu Azriel; niman Selemías, ikoneu Abdeel; para ma kajsikan on tiotlajtojketl Jeremías niman Baruc on iamatlajkuilojkau. Pero toTEKO okinmiyan.
Jeremías oksejpa okijlij Baruc matlajkuilo ipan okse amatlajkuilojli mimiltik
27 Mas sakin, ijkuak on rey yokitlatij on amatlajkuilojli mimiltik ikan itlajtol Jeremías yejuan okijlij Baruc makijkuilo, toTEKO okinots Jeremías niman okijlij: 28 "Xkui okse amatlajkuilojli mimiltik niman ompa xkijkuilo oksejpa nochi on tlen otikijkuilojka achtopa, on yejuan Joacim, rey de Juda, okitlatij. 29 Kemaj ijkin xkijli on rey: 'Ijkin kijtoua toTEKO: Tejua otiktlatij on amatlajkuilojli mimiltik, niman otikajuak Jeremías pampa okijkuiloj ika on rey de Babilonia melauak uajlas, kuajxoxotonis in país niman xok yakaj chantis nikan nion yolkej xok nemiskej. 30 Yejua ika, nejua moTEKO, nimitsixkoijlia ika tejua, Joacim rey de Judá, xitlaj tikimpiyas mokoneuan yejuan tlamandaroskej ipan itrono David. Momikatlalnakayo xkitôkaskej, yej kitlajkaliskej kampa chikauak tona niman ipan sekutli ijkuak tlayoua. 31 Tejua niman mouejkakoneuan, mouejueyitekiuajkauan, nikincastigaros ipampa intlajtlakoluan. Nejua nikchiuas para nenmopan uajlas, niman impan nochimej on chanejkej Jerusalén, niman on chanejkej Judá nochi on tlajtlamach yejuan yonemechijlij nemechajtitlanilis pampa nemejuamej xonennechchiuilijkej cuenta.'”
32 Kemaj Jeremías okonkuik okse amatlajkuilojli mimiltik niman okimakak Baruc, on imatlajkuilojkau, niman okijkuiloj nochi on tlen Jeremías okinauatij, on kijtosneki nochi on tlinon tlajkuilolnestikatka ipan on amatlajkuilojli mimiltik yejuan on rey Joacim okitlatij. Jeremías no okijlij Baruc miyek más tlajtlamach para ma kijkuilo.