On tlinon Sedequías kitlajtlania Jeremías
37
Nabucodonosor, rey de Babilonia, okitlalij Sedequías, ikoneu Josías, ken rey ne Judá, para okipatlak Jeconías, ikoneu Joacim. 2 Pero nion Sedequías nion inuejueyitekiuajkauan nion on chanejkej yejuan onokajkej ipan on país xokichiuilijkej cuenta itlajtoltsin toTEKO yejuan okinmijlij itechkopa on tiotlajtojketl Jeremías.3 On rey Sedequías okontitlan Jucal, on ikoneu Selemías, niman on tiopixki Sofonías, on ikoneu Maaseías, para ma kitatij on tiotlajtojketl Jeremías niman ma kijlitij para ma noueyikatsajtsili ipampa in nación itech toTEKO Dios. 4 Ijkuakon Jeremías xe kitsakuayaj ipan cárcel. Yejua ika ueliya yaya san kanon itsajlan on chanejkej. 5 Chika ijkuakon, isoldados on rey de Egipto yokalakkej Judá, para kuajpaleuiskiaj Judá. Yejua ika, ijkuak on soldados babilonios yejuan kuijsoktikatkaj Jerusalén okimatkej, totoka onejkuanijkej de ompa.
6 Kemaj toTEKO okinots on tiotlajtojketl Jeremías, niman okinauatij ijkin ma kinmijli 7 on yejuan okinuajtitlankej para kimatiskej tlinon nochiuas ipan on nación: "Xkijlikan on rey de Judá, yejuan omechajtitlan xnechtlajtoltikij, ika on isoldados on rey de Egipto, yejuan ye ualajtikatkaj para mechajpaleuiskej, ye nokueptokej para Egipto. 8 Pero, on babilonios oksejpa uajlaskej para kuajuijsokiskej in ueyikalpan Jerusalén, niman kinoyaxkatiskej niman kitlatiskej. 9 Nejua nemoTEKO nemechijlia: 'Maka xnemilikan, nion maka xneltokakan tla on babilonios xok uajlaskej, pampa xijki nochiuas. 10 Niman maski tla nemejuamej nenkintlaniskiaj nochimej on soldados babilonios yejuan mechuisoktokej, niman maski nokauaskiaj sa keskimej yejuan tlakokoltin, yejuamej noketsteuaskiaj niman kitlatiskiaj in ueyikalpan.'"
Jeremías kitsakuaj ipan cárcel
11 Ijkuak insoldados on babilonios ye kitlalkauijtikatkaj Jerusalén, pampa okimatkej ika ye uajlajtikatkaj isoldados on rey de Egipto, 12 Jeremías okis ipan on ueyikalpan Jerusalén para oyaj ipan iueyitlalpan Benjamín kampa konseliskia iherencia de sen tlajli intech on chanejkej. 13 Pero ijkuak oajsik ikalakiyan on ueyi tsakuijlotl itoka Iueyitsakuijlou Benjamín, sen tlakatl itoka Irías, (ikoneu Selemías niman teixuiu itech Hananías), yejuan intlayekankau katka on soldadojtlajpixkej, okitsakuilij Jeremías niman okijlij:
—¡Tejua ye timotemakatikaj intech on babilonios!
14 Jeremías okinankilij:
—¡Ka, on xmelauak! Nejua xninotemaka intech on babilonios.
Pero Irías xokinek okak. Yej okajsik Jeremías niman okuikak inmixpan on tekiuajkej. 15 In tlakamej sanoyej okualankej itechkopa Jeremías, niman otlanauatijkej ma kimajmailikan niman ma kitsakuakan ichan Jonatán, on amatlajkuilojketl, pampa yejuamej kikuiyaj ken cárcel. 16 Ijkon tej, Jeremías okitsakukej ijtik sen cuarto tlatsintlan ijtik tlajli, niman ompa onen miyek tonajli.
17 Kemaj, on rey Sedequías otlanauatij para ma kuikakan Jeremías ipan on palacio. Niman ijkuak okajxitijkej ixpan on rey, yejua okichtaka tlajtoltij:
—¿Tikpiya itlaj tlajtojli para nejua yejuan toTEKO omitsmakak?
Jeremías okinankilij:
—Kemaj, niman ijkin kijtoua: "Tejua ueyixtikaj rey, mitsajsis on rey de Babilonia."
18 Nejua no nikneki nimitstlajtoltis tejua rey Sedequías:
—¿Tlinon xkuajli onikchiu mixpan tejua ueyixtikaj rey, noso tlinon xkuajli onikinchiuilij mouejueyitekiuajkauan, noso on chanejkej, yejua ika onechtsakukej ipan cárcel? 19 ¿Kanon nemij on tiotlajtokej yejuan kijtouayaj ika on rey de Babilinia xmelauak mitsuijsokis, nion yejua in país? 20 Aman tejua xnechkaki ueyixtikaj Rey, niman xchiua on tlen nimitstlajtlanilis: Maka xtekauili para oksejpa ma nechuikakan ichan Jonatán on amatlajkuilojketl, tlamo yej ompa nimikis.
21 Kemaj on rey Sedequías otlanauatij para ma kitsakuatij Jeremías ipan on kiauak kampa on soldadojtlajpixkej nemiyaj, niman mojmostla ma kiktilikan pan yejuan kinamakaj ipan on ueyikalpan ojtli de on panchijkej. Niman ijki onochiu san chika onkatka pan ipan on ueyikalpan. Ijkin tej, onen Jeremías ipan ikiauak on tlapixkej.