Jeremías okontlajkalkej ijtik sen atlaltekontli
38
Sefatías, ikoneu Matán; Gedalías, ikoneu Pasur; Jucal, ikoneu Selemías; niman Pasur, ikoneu Malquías, okakkej ijkuak Jeremías ijkin okijtoj inmixpan nochimej on chanejkej: 2 "ToTEKO kijtoua: 'Akin nokauas ipan in ueyikalpan mikis ikan nouijsokilistli, noso ikan mayantli, noso ikan kokolistli. Pero nochimej on yejuan kisaskej niman notemakaskej intech on babilonios, xmikiskej. Yej nomanauiskej niman nemiskej.' 3 ToTEKO no kijtoua: 'Yejua in ueyikalpan uetsis ipan imauan on rey de Babilonia. Yejua kinoyaxkatis niman xakaj uelis kiteltis.'”4 Kemaj, on uejueyitekiuajkej okijlijkej on rey:
—Ma tikmiktikan in tlakatl, pampa ika itlajtol kinmomojtia on soldados niman nochi tlakatl yejuan sanken nokauaj ipan in ueyikalpan. Yejua in tlakatl xkineki tlen kuajli para in chanejkej, yej kinnekilia on tlen xkuajli.
5 On rey Sedequías okinnankilij:
—Kuajli tla ijkon, xchiuilikan ken nemejuamej nenkinekiskej. Nejua xitlaj uelis nikchiuas para nemechteltis.
6 Kemaj on uejueyitekiuajkej okajsikej Jeremías niman okontemoltijkej ikan mekamej ijtik on atlaltekontli yejuan iyaxka Malquías ikoneu on rey, niman onkatka ipan on kiauak kampa nemiyaj on soldadojtlajpixkej. On atlaltekontli xkipiyaya atl, yej kipiyaya sokitl, niman Jeremías opolaktajsik ijtik on sokitl.
7 Sen tlakatl yejuan ualeuaya Etiopía itoka Ébed-mélec, niman itekitkau katka on rey, yejua okak ika Jeremías okontlajkalkej ijtik on atlaltekontli. Ipan on tonajli on rey nemiya ipan sen reunión ne ipan Iueyitsakuijlou Benjamín. 8 Yejua ika, Ébed-mélec okis ipan on palacio niman oyaj okijlito on rey:
9 — Ueyixtikaj rey, on tlen okichiuilijkej Jeremías in tlakamej sanoyej xkuajli. Okontlajkalkej ijtik sen atlaltekontli, niman yejua ompa ye miktikaj ikan apistli, pampa aman xokuitlaj pan ipan in ueyikalpan.
10 Kemaj on rey okinauatij Ébed-mélec para nimantsin ma kuika 30 tlakamej para ma kixtikan Jeremías de ijtik on atlaltekontli chika xe miki. 11 Yejua ika, Ébed-mélec okinuikak on tlakamej, niman oyaj ipan ibodega on palacio kampa onokej tlakentin yejuan ijsoltikej, niman okuik keski tlakentli. Kemaj okontemoltilij Jeremías ikan on mekamej ijtik on atlaltekontli, 12 niman okijlij:
—Xmotlalili momasekatitlan in tlakentin isoltikej para maka mitstexipeuas in mekatl.
Niman Jeremías ijki okichiu. 13 Kemaj, on tlakamej okontilankej ika on mekamej niman ijki okixtijkej ijtik on atlaltekontli. Más sankin ijkuak ijkin yonochiu, Jeremías onokau ipan on kiauak kampa nemiyaj on soldadojtlajpixkej.
Sedequías kitekuitlani Jeremías
14 On rey Sedequías otlanauatij para ma kuikakan ixpan on tiotlajtojketl Jeremías, kampa ika yeyi itsakuijlou on ueyitiopan. Ompa on rey okijlij:
—Nejua nikneki san se nimitstlajtoltis, pero nikneki maka itlaj tinechiyanilis.
15 Niman Jeremías ijkin okinankilij:
—Tla nejua nimitsnankilis on tlinon tinechtlajtoltia, tejua ueyixtikaj rey titlanauatis ma nechmiktikan, niman tla nejua nimitsmakas tetlakanonotsalistli, tejua xtiknekis tikakis.
16 Kemaj, san ichtaka on rey Sedequías ijkin onotlajtolmakak ixpan on tiotlajtojketl Jeremías:
—Nimitsmaka notlajtol ika itokatsin toTEKO, akin techmaka nemilistli, ika nejua xnitlanauatis ma mitsmiktikan, nion xnimitstemakas intech on tlakamej yejuan mitsmiktisnekij.
17 Kemaj Jeremías ijkin okijlij Sedequías:
—ToTEKO yejuan nochi ueli kichiua, iDios Israel, kijtoua: "Tla tejua nimantsin timotemakas intech iuejueyitekiuajkauan on rey de Babilonia, tejua niman mofamilia xnenmikiskej, niman in ueyikalpan xkitlatiskej. 18 Pero tla tejua xtimotemakas intech, on babilonios, kinoyaxkatiskej in ueyikalpan, kitlatiskej, niman tejua xtiuelis timomanauis.”
19 Sedequías okinankilij:
— Nejua nikinmakajsi on judíos yejuan yonotemakakej intech on babilonios, pampa tla nechtemakaskej intech, yejuamej tlamach ika nechtlajyouiltiskej.
20 Jeremías okinankilij:
—Pero tejua ueyixtikaj rey xtiuetsis ipan inmauan yejuamej. Tejua ueyixtikaj rey, por favor xtlakamati on tlinon toTEKO mitsijlia ken nejua yonimitsijlij, niman tejua xtimikis, yej timomakixtis. 21 ToTEKO yonechkauilij ma nikita on tlinon nochiuas, niman tla tejua noteko rey xtikneki timotemakas intech yejuamej: 22 nochimej on siuamej yejuan nokauaskej ipan mopalacio tejua rey de Judá, kinkixtiskej niman kintemakaskej intech iuejueyitekiuajkauan on rey de Babilonia. Niman in siuamej inkin kijtoskej: “On itlajsojkaikniuan on rey okajkayajkej niman okitlankej; yejuamej okauilikej para ma sokipojpolaki, niman yejuamej iselti okajkej.”
23 Niman Jeremías más kijliaya on rey:
—Nochimej mosiuauan niman mokoneuan kintemakaskej intech on babilonios, niman tejua ueyixtikaj rey xtiuelis timomanauis. Yej no teuan mitstemakaskej itech on rey de Babilonia, niman in ueyikalpan kitlatiskej.
24 Kemaj Sedequías ijkin okinankilij Jeremías:
—Tla tejua melauak xtikneki timikis, maka yakaj tikijlis nochi in. 25 Tla on uejueyitekiuajkej kimatiskej ika mouan onitlajtlajtoj, yejuamej mitstlajtoltiskej tlinon otinechijlij, niman no mitstlajtoltiskej tlinon otimitsijli. Niman san para xmitsmiktiskej, kinekiskej nochi xkinmijli. 26 Pero tejua xkinmijli ika tejua otinechiknotlajtlaniliko para maka oksejpa nimitstitlanis ichan Jonatán, para maka ompa timikis.
27 Niman melauak ijki onochiu. On uejueyitekiuajkej oyajkej okitatoj Jeremías niman okitlajtoltijkej. Pero yejua okinmijlij ken yokinauatijka on rey. Yejua ika xokuitlaj okitlajtoltijkej, pampa xakaj okak on tlinon okijtojkaj. 28 Niman Jeremías onokau ipan on kiauak kampa nemiyaj on soldadojtlajpixkej hasta on tonajli ijkuak Jerusalén okitlankej niman okinoyaxkatijkej on babilonios.