Sen yenkuik kuikatl para noDios
(Sal. 70.1-5)
40
Onikchix ikan yolseuilistli ma nechpaleui toTEKO.Kemaj, yejua ikan iteiknelilis okak noueyikatsajtsilis.
2 Yejua onechkixtij de ijtik on temojti sokitlaltekontli para xonimik.
Onechmanauij para maka nipolakis ijtik on uejkatlan sokiatl
yejuan tetoloua.
Onechtelkets ipan sen ueyi tetl.
Onechikxikojtilij para xoniuets.
3 Okichiu para ma ninokuikati sen yenkuik kuikatl.
Ika on yenkuik kuikatl, nikueyiteneua toDios.
Miyekej, ijkuak ijkin kitaskej tlen okichiu Dios,
tlamojkaitaskej niman kitlaliskej nochi iminyojlo itech toTEKO.
4 ¡Sanoyej kipiya paktli on tlakatl yejuan kitlalia nochi iyojlo itech toTEKO,
niman xok kinta on yejuan noueyimatij,
nion kimauistiliaj ídolos.
5 NoTEKO Dios, miyek sesekneka tetlatlachalistin yotikchiu
para tejuamej,
niman titechpiyalia nochi tlen kualtsin, noDios.
¡Xakaj ijki ken tejua!
Tla niktetlajtlajtouiliskia nochi yejua in,
xueliskia nikimpouaskia nochi
pampa sanoyej miyek.
6 NoTEKO, tejua otinechpaleuij ma nikajsikamati
ika tejua xtiktlajtlani ma nimitsinuentlalili yolkej,
nion uentin de trigo noso cebada.
No, melauak tejua no xtitlajtlani uentin yejuan tlatla,
niman uentin yejuan kipopolouaj tlajtlakojli.
Yej, yotinechnakastlajtlapoj para nimitskaki.
7 Yejua ika, onikijtoj:
“Nikan ninemi para nikchiuas tlinon tejua tikneki
ijkon ken noka tlajkuilolnestikaj ipan on amamoxtli*.
8 Nejua nikuelita nikchiuas tlinon tejua tikneki noDios.
Motlanauatil nikejeua ipan noyojlo.”
9 Tejua kuajli tikmati noTEKO,
ika xitlaj* nikiyana.
Yej, imixpan miyekej motlapejpeniluan
kampa nosentlaliaj,
yonikimmijlij ika tejua tiyolmelajki.
10 NoTEKO, xonikiyan ika tejua tiyolmelajki,
para oksekimej uelis kitaskej.
Kampa motlapejpeniluan nosentlaliaj,
yonikteijlij ika tejua nochipa otinechpaleuij
niman ika otinechmakixtij.
Xitlaj onikiyan de motetlajsojtlalis*
yejuan xkaman tlamis,
niman de nochi tlen melauak
yejuan ualeua motech.
11 Niman tejua noTEKO, maka xnechnenekili moteiknelilis.
Nochipa ma nechmanaui motetlajsojtlalis*
yejuan xkaman tlamis,
niman motlajtolmakalisuan yejuan nochipa tikchiua.
12 Tlajtlamach tlen xkuajli nopan yonochiu
hasta xueli nikimpoua.
Sano nejua nopan nochiua noxopanyejyeualis,
hasta xok nikmati tlinon nikchiuas.
Notlajtlakoluan más miyek xken notson
yejuan nikpiya ipan notsontekon,
niman hasta xok niyolchikauak.
13 NoTEKO, nimitsiknotlajtlanilia,
xuajla xnechmanauiki.
¡NoTEKO, xuajla nimantsin niman xnechpaleuiki!
14 Sanoyej ma nopijpinajtikan
niman ma noyolpopolokan
on yejuan kinekij nechmiktiskej.
Ma cholojteuakan ika impinaualis,
on yejuan kinekij nechchiuiliskej tlen xkuajli.
15 Ma cholojteuakan ika impinaualis,
on yejuan noka uetskaj.
16 Pero nochimej on yejuan mitstejtemouaj
sanoyej ma yolpakikan.
Nochimej on yejuan kitlajsojtlaj motemakixtilis,
nochipa ma kijtokan:
“¡ToTEKO, yejua ueyixtikaj!”
17 NoTEKO, maka xnechelkaua nejua
yejuan nimayankanemi niman nitlajyouiya.
Tejua yejuan tinechpaleuiya, niman tinechmakixtia,
maka xmouejkaua para tinechpaleuis noDios.