Iueyikatsajtsilis sen tlakatl yejuan kualo
41
Kipiyas pakilistli yejuan ipan tlacha sen mayanki,pampa toTEKO kimanauis
ijkuak kipiyas pajsolouilistli.
2 ToTEKO kimanauis niman kejeuas inemilis.
Yejua kitiochiuas ipan on tlajli kampa nemis.
Niman xkitekauilis intech itlauelikniuan.
3 ToTEKO kimakas chikaualistli
ijkuak kualos niman kipatis.
4 Nejua onikijtoj:
“NoTEKO, maski onitlajtlakoj motechkopa,
xnechikneli* niman xnechpajti.”
5 Notlauelikniuan nechijtouiliaj on tlen sanoyej xkuajli.
Niman hasta kijtouaj:
"Ma nimiktetsi para nechelkauaskej".
6 Maski tla nechalitaj, xikan inyojlo uajlauij.
Yej, san kitejtemouaj itlaj tlen xkuajli notech,
niman kemaj yauij ipan ojtli,
niman nechtlajtolketsteuiliaj.
7 On yejuan sanoyej nechtlauelitaj,
nosentlaliaj para nechtlajtolketsteuiliaj.
Yejuamej kinemilia tlajtlamach* xkuajli de nejua.
8 Ijkin kijtouaj:
“On kokolistli yejuan kipiya,
sen xkuajli espíritu kichiuilijtikaj.
Youets ipan itlapech
niman xokaman uelis nokuiteuas.”
9 Hasta yejuan más kuajli notlajsojkaikniu
yejuan itech niktlalia noyojlo,
yejuan iuan nitlakuaya,
nopan yonokuep.
10 Pero tejua noTEKO, xnechikneli.
Xnechpajti niman ma ninokuiteua
para ma nikintlakuepilti.
11 Nikmati ika tejua tipaki nouan,
pampa xotikauilij onechtlan notlauelikniu.
12 NoTEKO, yotikitak ika xitlaj* nikpiya tlajtlakojli.
Yejua ika, nochipa xnechpaleui,
niman nochipa ma ninemi mouan.
13 ¡Ma tikyekteneuakan toTEKO, iminDios on israelitas,
aman niman para nochipa!
¡Ma ijki nochiua!