Noalmajtsin tlamacha itech Dios
42
Ijkon ken sen masatl kitejtemoua sen ríoyejuan kipiya asesek ijkuak sanoyej amiki,
no ijki nimitstejtemoua tejua noDios.
2 Noalmajtsin mitstejtemoua tejua noDios, tejua yejuan tiyoltikaj.
¿Kamanon oksejpa nias
niman nimitsmauistilis Dios
ne ipan on yektiopan?
3 Nochi tonajli niman nochi yeuajli sa ika ninemi nichoka,
hasta xok nitlakua ipampa nochokilis,
pampa notlauelikniuan sa ika nemij nechtlajtoltiaj:
“¿Kanon nemi moDios?”
4 Sanoyej ninajmana niman nichoka
ijkuak nikelnamiki ken niaya
niman nikyekanaya miyek tlakatl,
para tiayaj ipan iyeuitiopan Dios ne Jerusalén,
ipan on iluimej yejuan tikinchiuayaj.
Titsajtsitiayaj ikan pakilistli niman ikan tlaxtlauijli
inuan on yejuan yayaj ipan on ueyi iluitl.
5 ¿Tline sanoyej ninajmana?
¿Tline sanoyej ninotenmati?
Ika nochi noyojlo nikpiyas tlamachalistli* itech Dios.
Nikpiya tlamachalistli* ika oksejpa nikueyiteneuas,
yejua yejuan noDios niman noTemakixtijkau.
6 NoDios, nion achijtsin xnoyolika nikan
kampa onechajtotokakej.ika sanoyej nimitselnamiki
desde nikan ipan iueyitlalpan in río Jordán,
desde ipan in tepemej Hermón niman Misar.
7 On ueyi atl yejuan uejkatlan uajchayajtikaj ipan in tepemej
chikauak kakisti.
On kakistilistli kenon ajmantli
yejuan nikpiya
yejuan tikuajtitlani.
Nechtlapachoua niman nechijyomiktia.
8 Pero ipan tonajli noTEKO nechajtitlanilia itetlajsojtlalis*
yejuan xkaman tlamis.
Yejua ika, ipan yeuajli nejua ninokuikatia sen kuikatl,
ken sen oración itech on Dios
yejuan onechmakak nonemilis.
9 Nejua niktlajtoltia noDios yejuan nechmanauiya:
“¿Tline yotinechelkau?
¿Tline tikneki ma ninajmantinemi,
niman ma nitlajyouijtinemi impampa notlauelikniuan?”
10 Hasta noomiyouan nechkokouaj
pampa tlamach nechijliaj notlauelikniuan.
Yejuamej nochi tonajli sa ika nemi nechtlajtoltiaj:
“¿Kanon nemi moDios?”
11 ¿Tline sanoyej ninajmana?
¿Tline sanoyej ninotenmati?
Ika nochi noyojlo nikpiyas tlamachalistli* itech Dios.
Nikpiya tlamachalistli* ika oksejpa nikueyiteneuas,
yejua yejuan noDios niman noTemakixtijkau.