Iueyikatsajtsilis David para Dios ma kijli ika xkipiya tlajtlakojli niman ika nomanauis
43
Ay noDios, xkijto ika xnikpiya tlajtlakojli.Xnechmanaui intech on tlakamej yejuan xmitsneltokaj.
Xnechmanaui intech on xompayejyejkej tlakamej
yejuan nopampa istlakatij.
2 Nikijlia noDios:
“Tejua tinotemanauijkau.
Yejua ika, ¿Tline tinechejkuania motech?
¿Tline tikneki ma ninajmantinemi
niman ma nitlajyouijtinemi impampa notlauelikniuan?
3 Xkuajtitlani motlauil niman nochi tlen melauak
yejuan ualeua motech,
para nechyekanaksej ipan on ojtli.
Ma nechuikakan ipan moyektepeu
kampa tichanti ipan on moyektiopan.
4 Kemaj najsis motlaixpan* noDios,
niman ompa niktsotsonas noarpa
niman ninokuikatis sen kuikatl de ueyiteneualistli.
Ijkin nikchiuas pampa tejua noDios,
tiktemiltia nonemilis ikan paktli.
5 ¿Tline sanoyej ninajmana?
¿Tline sanoyej ninotemati?
Ika nochi noyojlo nikpiyas tlamachalistli* itech Dios.
Nikpiya tlamachalistli* ika oksejpa nikueyiteneuas,
yejua yejuan noDios niman noTemakixtijkau.