Ueyikatsajtsilistli para itlapeleuil Dios
44
Ay noDios, otikajkej ikan tonakasuanon tlen otechijlijkej touejkatajuan.
Otechijlijkej ika ye uejkaui ijkuak yejuamej nemiyaj,
otikchiu uejueyi tetlatlachalistin.
2 Otechijlijkej ika tejua, ikan moueyipoder otikinkixtij
on yejuan xmitsneltokaj.
Otikincastigaro on chanejkej ipan on naciones,
niman imintlaluan otikinmakak on touejkatajuan.
3 Xikan iminpoder nion iminespada okichiu ma tetlanikan.
Xejuamej okitekuilijkej on tlajli ika iminpoder,
yej otiktekuilij tejua ika mopoder niman ika moueyilis,
pampa otikimpakaitak touejkatajuan. niman otikintlajsojtlak.
4 ¡NoRey! ¡NoDios!
Tejua tikchiua ma tetlanikan motlapejpeniluan.
5 Tejua tikchiua para ma tikintlanikan totlauelikiniuan.
Ikan mopoder tikchiua para ma tikintlanikan
on yejuan techuijsokij.
6 Nejua xniktlalia noyojlo itech noarco nion noespada,
pampa on xejua ika nitetlanis.
7 Pero tejua otikchiu para ma tikintlanikan totlauelikniuan.
Tejua otikchiu ma nopijpinajtikan
on yejuan sanoyej techtlauelitayaj.
8 Nochipa timitsueyiliskej, niman nochipa timitsmakaskej tlaxtlauijli.
9 Pero aman yotitechejkuanij motech.
Yotitechkau ipan miyek pinaualistli,
pampa otichiu para ma techtlanikan.
Xok tiau iminuan tosoldados.
10 Otikchiu para ma tichojloteuakan inmixpan totlauelikniuan.
On yejuan sanoyej techtlauelitaj,
techtlachtekiliaj niman kiktij tlen kinekij.
11 Otitechtemaktilij kenon borregos yejuan kinmiktiaj.
Otitechseseman ipan okseki naciones.
12 Otitechnamakak semi xpatioj.
Xitlaj otiktlan ika otitechnamakak.
13 Tonisiuchanejkauan kitaj on tlen titechchiuilia
niman toka uetskaj.
Yejuamej tlamach techteneuiliaj niman techpijpinauiyaj.
14 Otichiu para toka ma uetskakan on yejuan xmitsneltokaj.
Ijkuak techitaj, hasta nokuauiuixouaj ika techpijpinauiyaj.
15 Nochipa nechchiuiliaj ma nipinaua.
Ijkuak on tlakamej kitaj noxayak, kitaj ika nipinaua,
16 ipampa notlauelikniu yejuan nechtlauelita
niman nechuijuikaltia,
niman pampa yejua kineki nechtlakuepiltis.
17 In tlen topan yonochiu xpampa tla otimitselkajkej,
nion xotiktlalkauijkej mopacto*.
18 Xtimitstlalkauiskej,
nion xtiktlalkauiyaj motlanauatiluan.
19 Pero yotitechkau para xuelis titopaleuiskej,
ne ipan xalpatlajkan kampa nemij tepeyolkej.
Yotitechkau ipan on temojtij tlayouajlotl.
20 Tla timitstlalkauaskiaj toDios,
niman yej tikmauistiliskiaj sen dios
yejuan on xchanejkej kimauistiliaj,
21 tejua tikitaskia, pampa tejua nochi tikita
maski sanoyej kuajli iyantikaj ipan toyojlo.
22 Pero mopampa tejua, nochipa techmiktisnekij.
Totlauelikniuan techpiyaj ken borregos
yejuan kinuikaj kampa kinmiktiaj.
23 ¿Tline tikochi noTEKO?
¡Xtlacha! ¡Maka xkochi!
¡Maka xnechtlalkaui para nochipa!
24 ¿Tline timiyana?
¿Tline tikelkaua ika tejuamej sanoyej titlajyouiyaj?
25 Techchiualtiaj ma titoknelikan
hasta tixakamanij ipan on tlalkuechtli
niman titotejchiuilantinemij ipan tlajli.
26 Xmokuiteua; xuajla xtechpaleuiki.
Xtechmakixtiki ipampa moueyitetlajsojtlalis*
yejuan xkaman tlamis.