Xochikuikatl para on rey ijkuak nonamiktia
45
Ipan notlamachilis onkaj miyek kualtsin tlajtojli.Nonenepil ken ilapis sen kuajli tlajkuilojketl.
Ijkin nikijtos in xochikuikatl ixpan on rey.
2 Tejua más tikualtetsin de nochimej on tlakamej.
Sanoyej kualtsin ken titlajtoua.
Yejua ika, Dios omitstiochiu para nochipa.
3 Xmotlalili on espada ipan moxijlan, tejua yejuan xtimojki.
Tiueixtikaj rey, niman titetlatlachaltij.
4 Tejua ika moueyilis titetlanis
para tikmanauis on tlen melauak,
on tlen melajki niman on tlen yolyemanki.
Ikan mopoder tikchiuas uejueyi tetlanilistin.
5 Motlaminaluan yejuan yakapitstikej,
ma tlalakikan ipan inyoltsin motlauelikniuan.
Kemaj nochi naciones notlakuantelketsas mixpan, norey.
6 NoDios, tejua tirey niman titlamandaros para nochipa,
niman ipan motekiuajyo, tikchiuas nochi tlen melajki.
7 Mitspaktia nochi tlen kuajli,
niman sanoyej xtikuelita on tlen xkuajli.
Yejua ika, Dios yejuan moDios, tejua omitstlalij ken rey.
Niman omitsmakak más pakilistli
xken intech nochimej on oksekimej reyes.
8 Nochi motlaken ajuiyak ikan mirra, áloe niman canela.
Ne ipan mopalacios yejuan tlachijchijtli ikan marfil,
mitspaktiaj ikan on tlatsotsonaltin arpas.
9 Intsajlan on siuamej yejuan kipiyaj tlakaitalistli
para mitstekichiuiliaj,
nemij yejuan imichpochuan reyes.
On reina notlalia moyekmakopa,
kualnestikaj ikan oro yejuan más kuajli.
Xochikuikatl para on siuatl ijkuak nonamiktia
10 Nikijlis on siuatl yejuan iuan nonamiktis on rey:
“Xkaki kuajli tlen nimitsijlis.
Aman xkelkaua mofamilia niman mochanejkauan*.
11 On rey sanoyej mitsuelita pampa sanoyej tikualtetsin.
Yejua moteko yes, niman ika onkaj yejua tiktlakamatis.
12 On chanejkej ne Tiro kuajkiskej miyek tetlayokolijli*.
On tlakamej yejuan más ricos,
kichiuaskej kanika para nokauaskej kuajli mouan.”
Xochikuikatl yejuan kiteneua ken kualtsin onotlakentij on novia
13 Ichpoch sen rey yejuan nonamiktis,
ye kalaktiu ipan on palacio.
¡Yejua sanoyej kualtsin nesi!
Itlaken, kualtsin ikpanepanojloj ikan oro.
14 Yejua kinakijtiu sen tlakentli* sanoyej kualtsin,
chika kuikaj kampa nemi on rey.
Ompa kitokaj on ichpokamej yejuan nochipa kuikatinemij.
15 Nejnemij ikan miyek paktli,
niman ijki kalakij ipan ipalacio on rey.
Okse xochikuikatl para on rey yejuan nonamitia
16 Oh rey, motelpochuan tlamandaroskej
ipan imintrono moachtojtajuan,
niman tikchiuas ma tlamandarokan ipan nochi tlaltikpaktli.
17 Nejua nikchiuas para cada yenkuik tlakamekayotl
ma kelnamiki motokatsin,
niman nochi tlakatl ipan nochi naciones
nochipa ma mitsueyiteneuakan.