ToueyiTEKO touan nemi
46
ToueyiDios yejua totemanauijkau niman yejua toyolchikaualis.
Yejua nochipa nemi touan para techpaleuiya san kamanon
ijkuak tlajtlamach* xkuajli topan nochiua.
2 Yejua ika, xtitomojtiskej,
maski tla xoxotonis in tlaltikpaktli,
maski apolakiskej on tepemej itlajkotian on mar,
3 maski chikauak kakistis on mar,
ijkuak sanoyej chikauak koxoni,
maski sanoyej uiuixkaskej on tepemej.
4 Onkaj sen río, yejuan kimpaktia on chanejkej
ipan iueyikalpan Dios,
on ueyikalpan yejua más yektli,
kampa chanti on Dios yejuan más ueyixtikaj.
5 Dios nemi itlajkotian on ueyikalpan Jerusalén
niman yejua kejeuas para xkaman xoxotonis.
Dios, desde ijkuak uajtlalchopajtiu ipan on tonajli, kipaleuis
ijkuak itlaj xkuajli nochiuas.
6 Ijkuak Dios tlajtoua, on naciones nomojtiaj, on reinos kuekuetlakaj, niman in tlaltikpaktli uiuixka.
7 ¡ToueyiTEKO yejuan kipiya nochi poder touan nemi!
¡IDios Jacob yejua techmanauiya!
8 Xuajlakan niman xkitakij on uejueyi tlajtlamach*
yejuan toTEKO yokichiu ipan in tlaltikpaktli.
Sanoyej tetlatlachaltij on tlen toTEKO okichiu:
9 Yokichiu para nochiuiyan ipan in tlaltikpaktli
maka ma onyaj guerras,
yokimpojpostek on arcos,
yokimpojpostek on lanzas,
niman yokintlatij on carretas de guerra.
10 “Maka sa xmouisokikan, yej xmatikan ika nejua niDios.
¡Nochimej on naciones nechueyiteneuaskej!
¡Nochi tlakatl ipan in tlaltikpiktli nechueyiteneuas!
11 ToueyiTEKO yejuan kipiya nochi poder, touan nemi.
¡IDios Jacob yejua techmanauiya!