Dios yejua Rey ipan nochi tlaltikpaktli
47
¡Xmomatlaxkalokan nemochimej chanejkej ipan in tlaltikpaktli!
¡Xkueyiteneuakan Dios ikan pakatsajtsilistli!
2 Xchiuakan ijkon
pampa toTEKO, yejua sanoyej temojtij.
Yejua más ueyixtikaj Rey ipan nochi tlaltikpaktli.
3 Okintlan kalpanmej niman naciones,
niman otechinmaktilij para ma tikinmandarokan.
4 Okitlapejpenij toueyitlalpan kampa tichantij
niman otechmakak ken sen herencia para tejuamej.
Yejua on toueyitlalpan aman ueyixtikaj para on israelitas
yejuan iuejkakoneuan Jacob,
yejuan Dios okintlajsojtlak.
5 ToTEKO Dios yotlejkok ipan itrono.
Otlejkok ikan ueyi pakatsajtsilistli,
niman okimpitskej tlapitsaltin.
6 ¡Xmokuikatikan, xmokuikatikan yekteneualistli itech Dios!
¡Xmokuikatikan, xmokuikatikan yekteneualistli itech toRey!
7 ¡Xomokuikatikan sen kualtsin salmo,
pampa yejua Rey ipan nochi tlaltikpaktli!
8 Dios yeuatikaj ipan iyektrono.
Dios yejua Rey niman kinmandaroua
nochimej on chanejkej ipan in tlaltikpaktli!
9 On tlakamej yejuan tlayekankej ipan naciones,
nosentlaliaj iuan itlapejpeniluan on Dios de Abraham.
Ijkon kichiuaj pampa Dios yejua más ueyixtikaj
ipan nochi tekiuajyotl de in tlaltikpaktli.
¡Yejua más ueyixtikaj nouiyan!