Iueyilis Jerusalén yejua iueyikalpan Dios
48
Sanoyej ueyixtikaj toTEKO.ToDios kitocaroua kiueyiteneuaskej ipan iueyikalpan
yejuan onkaj ipan iyektepeu.
2 ¡Sanoyej kualtetsin nesi on uejkapan tepetl Sión,
yejuan kualnestikaj ne norte ika!
¡Yejua kimpaktia nochimej ipan in tlaltikpaktli!
¡Yejua onkaj kampa onkaj Jerusalén
yejuan iueyikalpan on ueyixtikaj Rey!
3 Dios nemi ipan on torres
yejuan kimanauiyaj on ueyikalpan Jerusalén.
Dios yonoteititij ika yejua melauak ueli temanauiya.
4 On reyes onosentlalijkej,
niman san sekan oyajkej para kuijsokiskej on ueyikalpan.
5 Pero ijkuak okitakej on ueyikalpan,
okimojkaitakej niman sanoyej omojkamikkej.
Kemaj ontlatlaksakej.
6 Yejuamej sanoyej onomojtijkej,
ken nomojtia sen siuatl yejuan ye tlakatis ikonetson.
7 Noso onomojtikej ken kimakajsiskiaj on ajakatl
yejuan ualeua kampaka ikisayan tonaltsintli,
niman kinxoxotonia on barcos kojtikej de Tarsis.
8 Ipan iueyikalpan toTEKO Dios yejuan kipiya nochi poder,
yotikitakej ikan tixtololojuan on tlen otechtlajtlajtouilijkej:
“Dios kichiuas para nochipa ma onya Jerusalén”.
9 Ay noDios, ijtik moueyitiopan titlanemiliaj
ika on moueyitetlajsojtlalis* yejuan xkaman tlamis.
10 Ipan nochi tlaltikpaktli mitsyekteneuaj,
ken kinamiki motokatsin.
Ikan moueyipoder, tikchiua nochi tlen melajki.
11 ¡Ma pakikan on chanejkej ipan on tepetl Sión!
¡Ma tsikuinikan ikan paktli on chanejkej
impan on uejueyikalpanmej de Judá
ipampa on tlen melajki tikchiua!
12 Xnejnemikan iyeualkan Sión,
niman xkimpouakan on torres yejuan kimpiya.
13 Xkitakan on ueyi tepantli yejuan ika yeualtsakutikaj,
niman xkitakan itorres,
para ijkon uelis nenkintlajtlajtouiliskej on tlajtlamach*
nochimej on yejuan tlakatitiuij intech nemotlakamekayouan.
14 Nenkintlajtlajtouiliskej ika in yejua toDios,
niman yejua toDios yes para nochipa.
Nochipa yejua techyekanas.