On tomin xsan yejua kitemaka pakilistli
49
¡Xkakikan yejua in, nochimej nemejuamej tlakamej!¡Kuajli xkakikan nochimej chanejkej nochiuiyan ipan in tlaltikpaktli,
2 on yejuan ricos niman on yejuan mayankej,
on yejuan uejueyixtokej
niman yejuan xuejueyixtokej!
3 Nitlajtos ikan tlamatkilistli,
niman nikijtos on tlen niknemilia ipan noyojlo
yejuan temakas kajsikamatilistli.
4 Kuajli niknemilis tlinon kijtosneki on uejueyitlajtoltin,
niman chika niktsotsona on arpa,
nemechijlijtias tlinon kijtosnekij.
5 Xninomojtia ijkuak nopan uajlau on tlen tejmojti,
ijkuak nechyejyeualouaj notlauelikniuan.
6 Yejuamej kipiyaj iminyojlo ipan on ricojyotl,
niman noueyimatij ika kipiyaj miyek tlajtlamach*.
7 Xakaj nomakixtis sano yejua ikan tomin,
nion uelis kitlaxtlauilis Dios
para ma kimakixtili inemilis.
8 On tomin xkajxilia para kouas inemilis sen tlakatl,
9 para nochipa nemis niman xkaman mikis.
10 Nemejuamej ueli nenkitaj
ika yejuan tlamatkej* mikij
no ijki kenon yejuan xtlamatkej*,
niman on yejuan xintlajtlamachilis*.
Niman kemaj on ricojyotl yejuan kipiyayaj,
nokaua para oksekimej.
11 Maski okinamatlalijkej imintlauan ikan imintoka,
ipan tlalkontli iminchan yes para nochipa.
¡Ompa nokauaskej para nochipa!
12 Sen tlakatl xnochipa nemis,
maski sanoyej rico yeskia.
Yejua mikis no ijki kenon yolkej.
13 Ijkon tlamij on yejuan sa no yejuamej noconfiarouaj.
Ijkon tlamij on yejuan sa no yejuamej noueyiteneuaj.
14 On kenon tlakamej yaskej ipan intlalkon,
pampa on mikilistli kinyekanas
ken sen tlajpixki kinyekana iborregos
kampa kinmiktiaj.
On kuajkualtin tlakamej kinmandaroskej on mikatsitsimej
chika imintlalnakayo palaniskej
ne ipan imintlalkon uejka de iminchan.
15 Pero Dios nechmakixtis itech ipoder on mikilistli
niman itech on tlalkontli,
niman nechuikas yejua itech.
16 Maka ajmankamiki tla yakaj ricojtia
niman más kualtsintilia ichan,
17 pampa ijkuak mikis, xuelis itlaj kiktis;
nion on iricojyo uelis kiktis ipan itlalkon.
18 Maski ma paki chika nemi,
niman on tlakamej ma kiueyiteneuakan pampa rico,
19 yejkos on tonajli ijkuak mikis
ken iuejkatauan omikkej,
niman xkaman oksejpa kitas tlastajlotl.
20 On tlakatl xnochipa nemis,
maski sanoyej rico yeskia.
Yej no ijki mikis ken sen yolki.